«Astana» – Euroligada
Ötken jeksenbı künı elımızdıŋ biylǧy futbol mausymy märesıne jettı. Soŋǧy oiyndy «Astana Arena» stadionynda tamaşaladyq. Dästür boiynşa Qazaqstan kubogynyŋ jeŋımpazy anyqtaldy. Jasyl alaŋda «Astana» men «Ertıs» küş synasty.
Būl oiyn, şyny kerek, «Astana» üşın öte maŋyzdy bolatyny aldyn ala belgılıtın. Öitkenı, ūlttyq bırınşılıkte jüldesız qalǧan elordalyq komanda aldaǧy jyly UEFA-nyŋ Europa ligasy turnirıne qatysuy tek Qazaqstan kubogyn jeŋıp alǧan jaǧdaida ǧana mümkın bolar edı. Al biylǧy chempionatta kümıs jüldeger atanǧan «Ertıs» üşın europalyq turnirdıŋ mäselesı şeşılıp qoidy degenmen, pavlodarlyq komandanyŋ el kubogyn ūstamaǧaly on jyldai bolyp qalǧan eken. Sondyqtan da Talǧat Baisufinovtyŋ şäkırtterı üşın de kubokty jeŋıp alu kün tärtıbınde tūrǧany sözsız edı.
Osylaişa, ekı jaqtyŋ da jeŋıske degen jıgerı qatar tüsken tartysty oiyn şynymen de qyzyqty öttı. Elordalyq komandanyŋ ärı Qazaqstan ūlttyq qūramasynyŋ bas bapkerı Miroslav Beranek öz futbolşylaryn däl osy matchqa äbden äzırlegenı bırden baiqaldy. Olai deitınımız, oiynnyŋ besınşı minutynda alaŋ ielerı esep aşyp ülgerdı. Legioner Foksi Keteovamonyŋ «Ertıs» qaqpasyna qarai baǧyştaǧan aiypdobyn komanda kapitany Qairat Nūrdäuletov baspen ūryp, Kotliar qorǧaǧan qaqpaǧa tulatyp tüsırdı. Odan ärı de astanalyqtar oiyn qarqynyn bäseŋdetken joq. «Ertıs» te qarap qalmady. Bırneşe ret Erich qaqpasyna qauıp töndıre bıldı. Alaida, astanalyqtardyŋ jeŋıske degen qūştarlyǧynda şek bolmaǧandai. Sonyŋ nätijesınde oiynnyŋ 85-şı minutynda Taŋat Nöserbaev taǧy bır tamaşa gol soqty. Esep 2:0! Būl joly da kamerundyq Keteovamo ädemı pas şyǧaryp bergenın aituǧa tiıspız. Al pavlodarlyqtar qanşa tyrysqanymen eseptı özgertuge şamalary jetpedı. Söitıp, «Astana» Qazaqstan kubogynyŋ iegerı atandy.
Qazaqstan kubogy elordalyq komanda üşın jaŋa tarihi kezeŋ aşty. Aldaǧy jyly «Astana» Europa ligasynda öner körsetetın bolady.
Astanalyqtarmen qatar 2013 jyly Europa ligasy turnirınde biyl premer-liga chempionatynda kümıs jüldeger atanǧan «Ertıs» pen qola medal iegerı «Aqtöbe» synǧa tüsetın bolady. Al qatarynan ekınşı ret el chempiony atanǧan Qaraǧandynyŋ «Şahter» komandasy taǧy bır märte UEFA-nyŋ Chempiondar ligasynda öner körsetedı. Mūndai märtebelı jarysqa bırınşı ret qatysatyn astanalyq komandaǧa sättılık tıleimız.
Biylǧy chempionattyŋ qorytyndysynda premer-ligadan «Oqjetpes» jäne «Sūŋqar» şyǧyp qalsa, bırınşı ligada top jarǧan Almaty oblysynyŋ «Ile-Säulet» jäne Öskemennıŋ «Vostok» komandalary küştılerdıŋ qataryna qosylady.
2014 jyly ötetın älem chempionatynyŋ ırıkteu turnirıne qatysyp jatqan Qazaqstan qūramasynyŋ Germaniia qūramasymen ötkızetın kezektı oiyny aldaǧy jyldyŋ 22 nauryz künı būryn habarlanǧandai Almaty qalasynda emes, elordamyzdaǧy «Astana Arena» stadionynda ötetın bolady.
Ǧalym QOJABEKOV