Astana – Qazaqstannyŋ altyn qazyǧy
Käsıpkerlıktıŋ bererı köp
Juyrda Prezident N.Nazarbaev «Egemen Qazaqstan» gazetınde jariialaǧan «Astana – Qazaqstannyŋ ūly däuırı jäne strategiialyq vektory» atty maqalasynda elordanyŋ serpindi damuyna airyqşa toqtaldy.
Bügınde Astananyŋ kelbetıne süisınbeitın jan joq. Kün sanap biıktei tüsken eŋsesınen täuelsızdıgımızdıŋ tegeurının, elımızdıŋ eren qasietın, jaŋaşyldyq pen jasampazdyqtyŋ jaŋǧyryǧyn aiqyn baiqaimyz. Al, ärbır azamat öz elordasyn jäne onyŋ qazırgı zamanǧa sai jetıstıkterın maqtan tūtady, jüregıne quanyş ūialatyp, erteŋge degen senımın şyndai tüsedı. Elbasy aitqandai, Qazaqstannyŋ jas elordasy – qazaqtyŋ mereiı, märtebesı, ūlt kelbetı, qaryştap damudyŋ, jetıstıktıŋ, maqtanyştyŋ, mäŋgılık dostyqtyŋ simvoly bola bıldı. Prezident öz sözınde «…Eŋbek etuşı halyqtyŋ 60%-y şaǧyn jäne orta bizneste jūmys ıstegen kezde Qazaqstan tūraqtylyqqa qol jetkızetın bolady…» degen bolatyn, al maqalasynda astanalyqtardyŋ 60 paiyzdan astamy şaǧyn jäne orta biznes salasynda ekendıgın jazady. Būl – öte quantarlyq nätije, sebebı, elımız üşın şaǧyn biznestı damytu – eŋ basty mındetterdıŋ bırı, ärı jas memleket bolǧandyqtan, şaǧyn jäne orta biznestı damytuǧa zor mümkındıkterdıŋ bar ekendıgın körsetedı.
Sondai-aq, «Qazaqstan-2050» strategiiasynda käsıpkerlıktı – ūlttyq ekonomikanyŋ jetekşı küşın jan-jaqty qoldau, älemnıŋ damyǧan 30 memleketınıŋ qataryna kıru kerektıgı atalyp ötken bolatyn. Demek, bäsekege qabılettı Qazaqstandy qūru üşın qoǧamnyŋ belsendı müşesı bolyp jastardy käsıpkerlıkke barynşa tartu maŋyzdy ekendıgı anyq. Al, memleket ekonomikany tūraqtandyrudyŋ negızgı baǧyty retınde käsıpkerlıktı damytuǧa barynşa qoldau körsetıp otyrǧany belgılı. Osy mümkındıkterdı paidalanyp, maŋyzdy mındettı oryndauda jas käsıpkerlerdıŋ alatyn özındık orny bar dep sanaimyn. Jastar – bolaşaǧymyz jäne ärqaşan memlekettıŋ erekşe nazarynda bolyp keldı. Sondyqtan, asqaq armanyna qol jetkızudıŋ joldaryn köbı osy qalamen bailanystyrǧysy keledı. Al, Elbasynyŋ armanynan boi köterıp, saiyn Saryarqanyŋ tösınde totydaiyn taranǧan Astanamyz bai dästürımen, bıregei säulettı qūrylystarymen, mädeni eskertkışterımen Euraziianyŋ şoqtyǧy biık qalalarynyŋ bırıne ainalatynyna senımdımın.
Maqsat QOJAMBEK,
Qazaqstannyŋ jas käsıpkerlerı
qauymdastyǧynyŋ töraǧasy
ELORDANYŊ ŪLY DÄUIRI BASTALDY
El men jer taǧdyrynyŋ eleŋdetpeitın kezı joq. Arǧy, bergı atalarymyzdyŋ tu köterıp, tuyrlyq tıger, qūttyhana şaŋyraǧynyŋ uyǧyn şanşar maily da jaily, qoi üstıne boztorǧai jūmyrtqalardai jūmaq meken taŋdauy tegınnen tegın bolmaǧan. Aŋyz ben aqiqattyŋ şyraiyndai Asan babamyzdyŋ jelmaiamen jahandy kezıp, halqyna qūt meken bolatyn jerūiyqty ızdeuınde jan tebırenterlıktei syr jatyr emes pe? Ūlytaudan bastalar ūly köşımızdıŋ keŋes däuırı kezınde Astana qazyǧyn bırde Orynbor, bırde Qyzylordaǧa qadap, odan Almatyǧa tūraqtauy Mäskeudıŋ pärmenımen bolǧan edı.
El egemendıgın alǧannan keiın Nūrsūltan Nazarbaevtyŋ elordany Almatydan Astanaǧa köşıru turaly şeşım qabyldauy täuelsız memlekettıŋ alǧaşqy strategiialyq batyl baǧyttarynyŋ bırı bolatyn.
Astana – Prezidenttıŋ Jarlyǧymen 1997 jylǧy 10 jeltoqsanda «Qazaqstan Respublikasynyŋ elordasy» degen resmi atau aldy. Tura bır jyldan soŋ 1998 jyly 10 şıldede Qazaqstannyŋ jaŋa elordasy – Astananyŋ tūsauy kesıldı. Bır jyl ötkennen keiın Astanaǧa IýNESKO-nyŋ «Beibıtşılık qalasy» degen nagradasy berıldı. Halyqaralyq baǧa Astananyŋ äleumettık-ekonomikalyq, saiasi jäne mädeni damuyna igı äser ettı. Braziliiada ötken baiqauda Astana barlyq ölşemder boiynşa älemnıŋ ärtürlı elderınıŋ on ekı qalasynan ozyq tūrdy.
«EKSPO-2017» halyqaralyq körmesın Astanada ötkızu turaly qabyldanǧan şeşım de asa ırı uaqiǧaǧa ainaldy. Bız älı osy jeŋısımızdıŋ asa zor maŋyzyn sezınıp bolǧan joqpyz. Būl körme ötetın eldı, şyn mänınde, bükıl älem taŋdady. Qazaqstan aiqyn basymdyqpen jeŋıske jettı. Būl – bükıl jer-jahannyŋ bızdı tüstep tanyp, üstep senım artuy.
Būl Qazaqstan elordasynyŋ ūly däuırı bastalǧanyn bıldıredı.
Bibıgül BÖLEGENOVA,
saiasi ǧylymdar
kandidaty
Köŋılımızdı kökke örlettı
Elordamyzdyŋ 15 jyldyq mereitoiyna orai Elbasymyz jariialaǧan maqala bärımızdıŋ bolaşaqqa degen ümıtımızdı eselei tüskendei boldy. «Astana – Qazaqstannyŋ ūly däuırı jäne strategiialyq vektory» degen taqyrybynyŋ özı qaladaǧy mekemelerdıŋ qanşalyqty ülken jauapkerşılıkke ie ekenın aŋǧartatyn tärızdı. Äsırese, qala tarihyna qatysty derekter öte maŋyzdy.
«Astanany qūru tarihynyŋ da qyrlary köp, aitary mol. Keleşekte bızdıŋ barlyq mektepterımızde Qazaqstan tarihy boiynşa «Astana tarihy» atty jeke arnauly kurs ötkızıletınıne senımdımın» deidı Prezidentımız. 1995 jylǧy qaraşanyŋ 23-ınde aşylǧan Astana qalasynyŋ memlekettık mūraǧatynyŋ moinyndaǧy mındet te, mıne, osy.
Bızdıŋ mekemede alǧaşqy künnen bastap osy qala tarihyna qatysty qūjattar men derektemeler molynan jinaqtaldy. Bügınde mūraǧat qory 313 myŋnan astam derektı qūjatty saqtap otyr. Olardy jinaqtau barysynda mekeme qyzmetkerlerı aianbai eŋbek etıp keledı. Būl baǧytta şet elderdıŋ mūraǧattaryna da ıssaparlar ūiymdastyrylyp, talai qūndy derekter men jädıgerler qolǧa tüsırıldı. Atap aitqanda, Omby tarihi mūraǧatyna, Orynbor oblysynyŋ memlekettık mūraǧatyna, sol sekıldı Tatarstannyŋ ūlttyq mūraǧatyna barǧan sapar barysynda köptegen qūndy mälımetter tabyldy. Jalpy, bızdıŋ qalanyŋ tüpkı tarihyna qatysty negızgı derekterdıŋ şekara syrtynda ekendıgı belgılı. Öitkenı, qalamyzdyŋ ırgetasy qalanǧan uaqytta bızdıŋ eldı baǧyndyrǧan ortalyq sol jaqtarda bolǧan. Sol sebeptı, äsırese, ötken ǧasyrdaǧy töŋkerıske deiıngı kezeŋderdıŋ tarihyna qatysty materialdar atalǧan qalalarda molynan saqtalyp kelgen. Mäselen, qalada polisiia, poşta qyzmetı qalai qalyptasqany, qalai tyŋ igeru jūmystary jürgızılgenı, äskeri diviziialardyŋ qalai qūrylǧany, olardyŋ qalai qyzmet ıstegenı – bärı-bärı sol qūjattarda keŋınen jazylǧan.
Al täuelsızdıkten keiıngı kezeŋnen eŋ maŋyzdy qūjattar qoryn el astanasyn Almatydan Aqmolaǧa köşıru barysyndaǧy mälımetter qamtidy.
Jalpy, bızdıŋ mūraǧat uaqyt ötken saiyn baii tüsude. Olardy nasihattap, köpşılıkke jariia etu maqsatynda da türlı şaralar ūiymdastyrylyp jür. Jekelep toqtalatyn bolsaq, bızdıŋ mekemede körme zaly bar. Onda är atauly uaqiǧalar men belgılı bır datalarǧa bailanysty körme ūiymdastyrylyp tūrady. Odan bölek aqparat qūraldarymen tyǧyz bailanys ornata otyryp, būqara halyqqa Astana tarihyn jariialau maqsatyndaǧy türlı materialdardy taratyp otyramyz. Sol sekıldı, ǧalymdardy, qoǧam qairatkerlerın şaqyryp, türlı basqosular ötkızemız. Mäselen, biylǧy qala künı qarsaŋynda halyqaralyq deŋgeidegı ǧylymi-täjıribelık ülken konferensiia ūiymdastyryldy.
Eŋ maŋyzdysy, bızde qazırgı kezde arnaiy oqu zaly bar. Mekemege kelıp, Astana tarihymen tanysuǧa talpynǧan azamattarǧa mūraǧat qūjattary tanysuǧa berıledı. Aşyq taqyryptar boiynşa qalamyzdyŋ tūrǧyndary ǧana emes, şetel azamattary da kelıp, aqparat ala alady.
Mūnyŋ bärı, Prezidentımız Nūrsūltan Nazarbaev aityp ötkendei, qyr-syry mol Astana tarihyn aişyqtau maqsatynda jüzege asyrylary dausyz. Al Elbasy «Astana – Qazaqstannyŋ ūly däuırı jäne strategiialyq vektory» atty maqalasynda atap ötken Astana tarihy turaly pännıŋ mazmūnyn qalyptastyruǧa bızdıŋ mekeme ärdaiym mūryndyq bolaryna senım mol.
Balqiia BAIMAǦANBETOVA,
Astana qalasy memlekettık mūraǧatynyŋ direktory