Futboldan Qazaqstan chempionaty märesıne jettı. Elordanyŋ «Astana» kluby jetınşı ret el chempiony atandy.
Jeksenbı künı ötken soŋǧy turda köşbasşy komandalardyŋ bärı jeŋıske jettı. Atap aitqanda, «Astana» Qaraǧandyda jergılıktı «Şahter» komandasyn 3:2 esebımen ūtsa, elımızdıŋ bes dürkın chempiony «Aqtöbe» öz alaŋynda soŋǧy turǧa deiın qola jüldege ümıtker bolyp kelgen «Qairat» komandasyn 4:1 esebımen tıze büktırdı. Esesıne qoladan qol üzbegen qostanailyq «Tobyl» syrt alaŋda «Aqjaiyqty» ūtyp (3:1), turnir kestesın üşınşı bolyp aiaqtady.
Chempionattyŋ üzdık mergenı bolyp «astanalyq» Pedro Enjenio (Portugaliia) tanyldy. Ol qarsylastar qaqpasyna 18 gol soqty. Taǧy bır «astanalyq» Marin Tomasov (Horvatiia) mergender bäsekesınde 15 goldyŋ avtory atanyp, ekınşı körsetkışke qol jetkızdı.
Al soŋǧy orynda qalǧan «Tūran» (Türkıstan) men «Aqjaiyq» premer-ligamen qoştasty. Al bırınşı ligada üzdık şyqqan «Oqjetpes» (Kökşetau) pen «Aqjaiyq» (Qyzylorda) araǧa bır jyl salyp premer-ligaǧa oralatyn boldy.
Sonymen, 2022 jyldyŋ futbol chempionaty tarih qoinauyna öttı. «Astana» komandasy jetınşı ret Qazaqstan chempiony atanyp, ūlttyq futboldyŋ rekordyn jaŋartty.
Jaqyn arada Qazaqstan futbol federasiiasy atalymdar boiynşa jyldyŋ üzdık futbolşylaryn jariialaidy.
Chempionattyŋ qorytyndysy boiynşa 2023 jylǧy UEFA turnirlerınde: «Astana» – Chempiondar ligasynda, «Aqtöbe» – Europa ligasynda, «Tobyl» men «Qairat» Konferensiia ligasynda oinaityn boldy.
Fuboldan Qazaqstan chempiondary: «Astana» – 7 ret; «Aqtöbe» – 5 ret; «Ertıs» (Pavlodar) – 5 ret; «Qairat» (Almaty) – 3 ret; «Elım-ai» (Semei) – 3 ret; «Jeŋıs» (Astana) – 3 ret; «Şahter» (Qaraǧandy) – 2 ret; «Tobyl» (Qostanai) – 2 ret; «Taraz» – 1 ret.
