Juyrda ötken elordany damytu mäselelerı jönındegı jinalysta äkım Altai Kölgınov qala mektepterınde şamamen 25 myŋdai orynnyŋ jetıspeitının mälımdegen edı. Sondai-aq 14 myŋǧa juyq balanyŋ balabaqşa kezegınde tūrǧany da belgılı. Osy problemalardyŋ qalai şeşıletını jaily bız Bılım basqarmasynyŋ ökılderınen sūradyq.
14 mektepte oquşy sany şekten asady
Vedomstvo ūsynǧan resmi derekke süiensek, bügınde şahardaǧy 14 mektepte oquşy sany normadan artyq. Onyŋ ışındegı 8-ı, naqtyraq aitsaq, №13, 14, 27, 31, 40, 53, 59, 85 mektepter üş auysymdy rejimde oqytuǧa mäjbür (byltyr būl körsetkış 5-eu bolǧan-dy).
– Nūr-Sūltan qalasyn damytudyŋ besjyldyq keşendı josparynda 37 jaŋa mektep pen 10 janama qūrylys salu qarastyrylǧan. Qazırgı taŋda 5 obekt salynyp, paidalanuǧa berıldı, – deidı Bılım basqarmasynyŋ Strategiia, taldau jäne sifrlyq tehnologiialar bölımı basşysy Jazira Asanova.
Mamannyŋ aituynşa, osy jyldyŋ soŋyna deiın 2 myŋ orynǧa arnalǧan 3 obektını paidalanuǧa beru josparlanǧan. Onyŋ 2-uı qoldanystaǧy mektepterdıŋ aumaǧyna salynatyn janama qūrylys bolmaq (№64 mektepke – 425 oryndyq, №28 mektepke 300 oryndyq janama qūrylys). Al №31 köşenıŋ oŋtüstıgıne jäne Nūra-Esıl kanalynyŋ şyǧysyna qaraiǧy aumaqta 1200 oryndyq su jaŋa mektep aşylady.
Sondai-aq 2020 jyly 9400 oryndyq 12 obektınıŋ qūrylysy aiaqtalady, onyŋ 5-euı – janama ǧimarattar.
Qalada 377 mektepke deiıngı ūiym jūmys ısteidı, onyŋ 94-ı – memlekettık balabaqşa, 3-euı – vedomstvolyq balabaqşa, 43-ı – şaǧyn ortalyq, 237-sı – jekemenşık balabaqşa.
14 myŋǧa juyq bala balabaqşa kezegınde tūr
Al balabaqşa jaiyna kelsek, Bılım basqarmasy qyzmetkerlerı elorda boiynşa balabaqşa jasyndaǧy balalardyŋ 96 paiyzy mektepke deiıngı mekememen qamtylǧanyn alǧa tartady. Olardyŋ 40 paiyzy memlekettık tapsyryspen jūmys ısteitın jekemenşık balabaqşalarǧa barady. Şamamen 14 myŋǧa juyq bala kezekte tūr.
Elordada jalpy bılım beretın 88 mektep, 1 respublikalyq mektep (Respublikalyq fizika-matematika mektebı), 3 Nazarbaev ziiatkerlık mektebı, 17 jekemenşık mektep bar.
2019-2021 jyldar aralyǧynda astanada 4 mektepke deiıngı ūiym paidalanuǧa berıledı. Onyŋ 1-euı memlekettık-jekemenşık ärıptestık şeŋberındegı 360 oryndyq balabaqşa bolsa, 2-uı – ūlttyq kompaniialarmen jasalǧan memorandumǧa säikes boi köteretın 480 oryndyq 2 balabaqşa. Al qalǧan 1-euı – köru qabıletı būzylǧan balalarǧa arnalǧan 90 oryndyq balabaqşa. Esterıŋızge sala keteiık, qazırgı taŋda erekşe qajettılıgı bar balalar üşın 2 arnaiy balabaqşa (tırek-qimyl apparatynyŋ būzylystary bar balalarǧa arnalǧan №64 «Asyl böbek» arnaiy balabaqşasy, köru qabıletı būzylǧan balalarǧa arnalǧan №23 «Altyn besık» balabaqşasy) jūmys ısteidı.
