Jeksenbı künı Almaty oblysynda Astana qalasynyŋ mädeni künderı aşyldy. Elordanyŋ ärtısterı men öner ūjymdarynyŋ bas qalanyŋ 20 jyldyǧyna arnalǧan biylǧy gastroldık tury Taldyqorǧan qalasynda jalǧasyn tapty.
Mädeni künderdıŋ şymyldyǧy I.Jansügırov atyndaǧy Mädeniet saraiynda Ǧ.Jūbanova atyndaǧy Memlekettık ışektı aspaptar kvartetınıŋ «Ūly dala äuenderı» atty konsertımen türıldı. Onda F.Şuberttıŋ, I.Gaidnnyŋ, A.Borodinnıŋ, A.Jūbanovtyŋ, A.Jaiymovtyŋ, Tättımbet pen Qūrmanǧazynyŋ şyǧarmalary oryndaldy.
Keşe osy zalda Astana qalasynyŋ Memlekettık akademiialyq filarmoniiasy ūjymdarynyŋ qatysuymen «Astanadan aq tılek» konsertı öttı. Konsertte «Qorqyt» dästürlı saz toby, «Şalqyma» bi ansamblı, klassikalyq jäne estradalyq vokal, halyq änı bölımı solisterı öz önerlerın körsettı.
Bügın elorda filarmoniiasynyŋ qazaq orkestrı jäne halyq änı bölımı solisterınıŋ qatysuymen «Jyr atasy – Qaban jyrau» atty ädebi-muzykalyq keş ūiymdastyrylady.
B.Rimova atyndaǧy Taldyqorǧan drama teatrynyŋ sahnasynda M.Gorkii atyndaǧy Memlekettık akademiialyq orys drama teatrynyŋ ärtısterı öz qoiylymdaryn körsetedı. Repertuarda eresekterge de, balalarǧa da arnalǧan spektaklder bar.
Bügın taldyqorǧandyq körermender Qazaq xandyǧynyŋ qūryluyna 550 jyl toluyna arnalyp qoiylǧan B.Jandarbekovtıŋ «Tomiris – saqtar patşaiymy» qoiylymyn tamaşalaidy. Dramanyŋ qoiuşy rejisserı – QR eŋbek sıŋırgen qairatkerı Gülsina Merǧalieva. Al A.Anatolevtıŋ «Qar patşaiymy» ertegısı G.H.Andersennıŋ şyǧarmasy jelısımen qoiylǧan.
Būǧan qosa, Gorkii teatry K.Liudvigtıŋ «Primadonnalar» komediiasyn ūsynady. QR eŋbek sıŋırgen ärtısı, rejisser Bekbolat Parmanovtyŋ jäne qoiuşy-suretşı Qanat Maqsūtovtyŋ qoiylymy şytyrman oqiǧalarǧa toly.
Al «Aq tılekpen, Astana» körmesı üş kün boiy jūmys ısteidı. Ekspozisiiaǧa otandyq suretşılerdıŋ 100-den asa tuyndysy şyǧarylǧan.
