Keşe Qazaqstan Futbol federasiiasynyŋ prezidentı Ädılbek Jaqsybekov «Astana» FK futbolşylary men jattyqtyruşylar ştabyna altyn medal tabys ettı.
«Astana» komandasy osy künge deiın özınıŋ az ǧana tarihynda ekı märte Qazaqstan kubogyna, Superkubok pen kümıs jüldege qol jetkızgen bolatyn. Bıraq, bükıl ataqtyŋ ışınde chempion ǧana joq edı.
2014 jyly jas klub būl şyŋdy da baǧyndyrdy. Stanimir Stoilovtyŋ tärbielenuşılerı jeŋıske degen yntasy men şeberlıkterın körsettı. Olar basty qarsylasy – «Qairat» komandasyn chempionattyŋ aiaqtaluyna bır tur qalǧanda jeŋdı.
Ötken jyly elordalyq komanda Memleket basşysy N.Ä.Nazarbaevtyŋ bastamasymen qūrylǧan «Astana» prezidenttık käsıptık sport klubynyŋ bır bölıgıne ainaldy. Sonymen qatar, biyl «Astana» UEFA Europa ligasynda da laiyqty öner körsettı. Armeniianyŋ «Piunik», şvesiialyq AİK jäne İspaniianyŋ «Viliarreal» komandalarymen keremet oiyn körsetıp, janküierlerın quantty.
SÜBELI SÖZ
Ädılbek Jaqsybekov, QFF prezidentı:
– Qazaqstan futbol federasiiasynyŋ jäne futbol qoǧamynyŋ atynan «Astana» futbol klubyn futboldan Qazaqstan Respublikasy chempionatynyŋ 2014 jylǧy mausymynda merzımınen būryn jeŋıske jetuımen qūttyqtaimyn!
Būl – tabandy küres nätijesınde qol jetkızgen jetıstık. Turnir barysynda «Astana» özınıŋ şeberlıgın, psihologiialyq tūraqtylyǧyn, jeŋıske degen yntasyn ǧana emes, sonymen qatar, ädemı oiyn da körsete aldy.
Komandanyŋ chempiondyq tituly – futbol kluby qyzmetınıŋ barlyq salalaryndaǧy sauatty ärı dūrys jürgızılgen jūmystyŋ jemısı. Ärbır komanda müşesınıŋ öz ısınde üzdık bolu nietı men ūmtylysy ūjymǧa biylǧy mausymda joǧary nätijege qol jetkızuge mümkındık berdı. «Astana» FK-nyŋ aldaǧy uaqytta da tabysty öner körsetetınıne, janküierlerın jaqsy oiynmen quantyp, qazaqstandyq futboldyŋ igılıgıne özınıŋ damuyn jalǧastyratynyna senımdımın.
