Elordada onomastika jūmysy özge öŋırlermen salystyrǧanda köş ılgerı. Bas qala köşelerınıŋ 90 paiyzdan astamy ūlttyq ataularǧa ie. Bıraq Astana qūrylysy üzdıksız jürgızılıp jatyr. Soǧan säikes jaŋa köşeler salynyp, şahar tūrǧyndarynyŋ artuyna bailanysty qajettılıkke sai jaŋa mektepter boi köterude. Jobalyq köşeler sandarmen belgılenıp, keiın olarǧa naqty ataular berıledı. Orta bılım beru oryndary da solai.
Äsırese, soŋǧy jyldary Astanada köptegen köşe men mektep ataularǧa ie boldy. Atap aitqanda, byltyrdan berı osy künderge deiın jetpıske juyq köşege körnektı tūlǧalar men jer-su attary, jiyrmaǧa tarta mektepke, ekı mädeni oşaqqa belgılı adamdardyŋ esımderı berıldı. Täuelsızdıktıŋ 30 jyldyǧy jäne tūlǧalardyŋ mereitoilaryna orai qarqyn alǧan būl jūmys älı de jalǧasyp jatyr. Qala qūrylysynyŋ barysyna qarai da toqtamaidy. Jūmys jürgızılıp jatqan soŋ, mäseleler de tuyndamai qoimaidy.
Jaqynda Astana qalasy mäslihatynda köşe ataularyna bailanysty köpşılık tyŋdaular öttı. Onda qalalyq Tılderdı damytu jäne arhiv ısı basqarmasynyŋ basşysy Säken Esırkep qalanyŋ onomastika komissiiasy taiauda maqūldaǧan jaŋa köşelerdıŋ ataularymen tanystyrdy.
Talqylau barysynda qalalyq mäslihat hatşysy Erlan Kanalimov oryndy mäselenı köterdı. Ol tūlǧalardyŋ atyna köşe bergende sol köşenıŋ boiyna tiıstı tūlǧa turaly aqparatty ornalastyru kerektıgın, älemdık tūlǧa äl-Farabige kezınde qalanyŋ önerkäsıptık aimaqtan, şahardyŋ şetınen köşe berılgenı dūrys emestıgın aitty.
Şynynda, belgılı bır tūlǧanyŋ atyna köşe beruge şeşım şyǧarǧanda, onyŋ tarihta alatyn ornyna, elge sıŋırgen eŋbegıne qarap bergen jön. Būl tarapta būrynyraqta olqylyqtar oryn almai qalǧan joq. Keibırıne şolaq nemese şetkı aimaqtan köşe būiyrǧan. Äl-Farabi daŋǧyly da osylaişa qalanyŋ şetıne ketıp qalǧan. Säken Esırkeptıŋ aituynşa, būl kemşılıktı tüzeu üşın tiıstı äreketter jasalyp jatyr.
Onyŋ sözınşe, ötken jyly atalmyş basqarma bır ıstı qolǧa alyp, qalanyŋ negızgı köşelerınıŋ barlyq aialdamalaryna QR-kod ornalastyrdy. Sol arqyly köşege aty berılgen tūlǧa turaly üş tılde 1,5 minuttyq aqparat aluǧa bolady. Aldaǧy uaqytta būl jūmys tūrǧyn alaptarda da jalǧasady.
«Jeleznodorojnyi» tūrǧyn alabynda qazaqtan şyqqan tūŋǧyş ǧaryşker, Halyq qaharmany Toqtar Äubäkırovtıŋ aty berılgen köşe bar. Qalalyq mäslihat deputaty Güljamal Japarovanyŋ pıkırınşe, būl köşe batyr atyna laiyq emes. Ūzyndyǧy 400 metrge de jetpeidı, onyŋ üstıne şetkı aimaqta ornalasqan.
Sol otyrysta mektep ataulary kün tärtıbıne şyǧarylmasa da, mäslihat deputaty Azamat Aithojin qaladaǧy №20 mektepke Şäken Aimanovtyŋ atyn beruge qarsy şyqty.
– Şäken Aimanov – qazaq kinematografiiasyn kötergen bırtuar azamattyŋ bırı, maqtanyşymyz. Nege №20 mektepke atyn berıp otyrmyz? Ol mekteptıŋ qaida ekenın bılesızder me? Qalanyŋ syrtynda, orys tılınde oqytatyn mektep, – dedı mäslihat deputaty.
Säken Esırkeptıŋ aituynşa, mektepterge atau beru üşın körnektı tūlǧalardyŋ tızımı jasalyp, qalalyq Bılım basqarmasyna jıberıldı. Al atalmyş basqarma mektepterge taratty. Orta bılım beru oryndaryna sol tızımnen özınıŋ baǧytyna keletın tūlǧany taŋdau erkı berılgen. Osylaişa Şäken Aimanovtyŋ atyn aluǧa №20 mektep qana niet tanytqan. Aldaǧy künderı mektepterge atau beru mäselesı mäslihattyŋ qarauyna şyǧarylady. Onyŋ arasynda №20 mektep te bar.
Elımızdegı kinoöndırıstıŋ bırden-bır oşaǧy «Qazaqfilm» AQ Şäken Aimanovtyŋ atynda ekenı belgılı. Negızı, kino men teatr maitalmanynyŋ esımı jas ūrpaqty önerge baulityn joǧary oqu ornyna berılse de, artyq emes. Astanadaǧy Qazaq ūlttyq öner universitetı qazaq kinosynyŋ atasy, teatr tarlany Şäken Aimanovtyŋ atyn ielense, qūba-qūp. Osy jaǧyn qolǧa alu kerek dep esepteimız. Kino men teatr, muzyka mamandaryn daiyndaityn elordadaǧy joǧary oqu orny onyŋ atyn alsa, ūtpasa, ūtylmaidy. Al endı Şäken Aimanov köşesı de qyp-qysqa. Onyŋ kelını, (Käuken Kenjetaevtyŋ jary) ataqty änşı – Şabal Beisekova köşesı odan on esedei ūzyn. Būl özı dästürge de, jön-jobaǧa säikes kelıp tūrǧan joq-au…
