Baǧdat QOJAMBAEV, Qazaqstannyŋ mädeniet qairatkerı: «QARATORǦAIDY» QYTAIDA QALYQTATTYQ
Elordadaǧy memlekettık filarmoniianyŋ kameralyq hory aspan asty elınde ötken IH halyqaralyq hor festivalınde altyn medaldı qanjyǧalap qaitty. Būl – bas qaladaǧy önerge degen qamqorlyqtyŋ nätijesı. Süiınşılı oqiǧadan keiın, araǧa köp uaqyt salmai hor ärtısı, Qazaqstannyŋ mädeniet qairatkerı Baǧdat Qojambaevty bırer saualymen mazalaǧan edı tılşımız. Şaǧyn sūhbatty oqyrmandar nazaryna ūsynǧandy jön kördık.
– Baǧdat Quatūly, jeŋısterıŋız qūtty bolsyn! Jüldege alǧan altyndaryŋyzdyŋ salmaǧy qanşalyqty?
– Rasyn aitsam, būl jeŋıs hor müşelerınıŋ bırınıŋ de tüsıne kırgen joq bolatyn. Üşınşı oryndy baǧyndyrsaq ta, qanaǧat tūtyp, quanyp qaitar edık. Bıraq, bız jergılıktı ūlt «Düniejüzılık hor sammitı» atap ketken öner dodasynyŋ biıgın baǧyndyrdyq!
– Şara jönınde, sahnadaǧy bäsekelestırıŋız turaly taǧy keŋırek toqtalyp ötseŋız…
– Ekı jylda bır ret Beijıŋde ötetın muzykalyq forumǧa būl joly 67 elden jäne Qytai provinsiialarynan 167 hor ūjymy qatysty. Ūjymdar käsıbi jäne äuesqoi, erler, äielder, studentter, balalar hory boiynşa synǧa tüstı. Baqtalastarymyz da osal emes.
Bır aita keterlıgı, festival basqa elderdegı ärıptesterımızben tanysyp, qyzyqty jobalarǧa qatysuǧa mümkındık berdı. Äsırese, Amerika, Resei, İndoneziia, Moŋǧoliia elderınen kelgen ūjymdardyŋ, Henan provinsiiasyndaǧy balalar horynyŋ önerı este qaldy.
– Halyqaralyq dodada qazaqtyŋ qandai şyǧarmalaryn oryndadyŋyzdar?
– Qytailyqtar muzykaǧa öte qūmar jäne sezımtal halyq qoi. Olar bız öner körseterdıŋ aldyndaǧy äzırlık kezınde qyzǧuşylyqpen ynta körsettı, bızdermen bırge suretke tüstı. Al hor Eŋbek Erı, belgılı kompozitor Erkeǧali Rahmadievtıŋ «Qamar sūlu» operasynan tragediialyq üzındı oryndady. Körermender oryndarynan tūryp tyŋdady. Sonymen qatar bızder aspan asty elınıŋ Ūly Qytai qorǧany, Tyiym salynǧan qala, Aspan hramy siiaqty körnektı oryndarynda boldyq. Qytaidyŋ ejelgı mädenietımen etene tanystyq. Qytai qorǧanynda bızdıŋ hor ūjymy Qazaqstannyŋ Änūranyn oryndaǧanda, qytailyqtar du qol şapalaqtady, sosyn bi yrǧaǧynda «Qaratorǧaidy» şyrqadyq.
