Qoǧamda memleket tarapynan berıletın eşqandai järdemaqy men äleumettık kömektı kütpei-aq, öz otbasyn alǧa süirep kele jatqan analar köp. Solardyŋ bırı – elordalyq kelınşek Nūrsūlu Eseeva. Kezınde joldasymen bırge kışkentai jataqhanada bölme jaldap tūrǧan ol «Astana aqşamyna» bergen sūhbatynda käsıpker kelınşekke qalai ainalǧanyn aitady.
Tiynnan teŋge qūraǧan künder
Bız otbasynda alty balamyz. Qyzylorda oblysy Jaŋaqorǧan audanynda tudym. Äkemız Şamşudin Palmanūly erterek qaitys bolyp, alty balany ösırıp-jetıldırudıŋ auyrtpalyǧyn jalǧyz anam Aisara Halbaeva köterdı. Bız bala künnen eŋbekqor bolyp östık. Şiettei bala-şaǧany asyrau üşın anamyz nan jauyp, satumen ainalysty. Älı esımde, kışkentai qyz bolsam da qolym maiysyp anammen bırge nan ilesıp, ony bazarǧa aparyp satatynbyz. «Är kez talaptanyŋdar, talaptyǧa nūr jauady» dep qūlaǧymyzǧa ünemı qūiyp otyrdy. «Jürgen ızderıŋnen tärbienıŋ ızın köretın bolaiyn» deitın. Osylaişa tiynnan teŋge qūraudy anamyzdan üirendık. Oǧan alǧystan basqa aitarymyz joq. Sebebı Erlan men Nūrjan aǧalarym bügınde audandaǧy belgılı käsıpker azamattarǧa ainaldy. Elu şaqty adamdy jūmyspen qamtyp qana qoimai, naubaihana, ashana jelılerın damytyp, köterme baǧamen tauar satatyn qoima jūmystaryn jürgızıp keledı.
Qalai «Eŋ bai student» atandym?
Mektep bıtırgen jyly bılım quyp Astanaǧa keldım. 2003-2008 jyldary S.Seifullin atyndaǧy Qazaq agrotehnikalyq universitetınde oqydym. Bıraq bılım alǧan bes jyl uaqyt ışınde bos otyrmadym. Anamnan daryǧan aspazdyq önerım bolǧan soŋ, 1-kurstan bastap sabaqtan tys uaqytymda studentter jataqhanasynda aspazdyŋ kömekşısı bolyp jūmys ıstedım. Asüide ıstegennıŋ paidasy – ünemı qarnyŋ toq bolady. Al keşkısın qosymşa Mädeniet ministrlıgınde tazalauşy boldym. Sol kezdıŋ özınde ekı jūmysymnan 50 myŋdai jalaqy alyp, jataqhanadaǧy «Eŋ bai student» atandym. Ärine, eşqaşan sabaqtan qalǧan emespın. Jūmys pen oqudy qatar alyp jürdım. Üzdık oqydym. Nätijesınde 2008 jyly diplom alǧan boida oqytuşy, professor aǧaiymyz Jaqsykeldı Qasymūlynyŋ ūsynysymen Jer qatynastary jäne jerge ornalastyru kafedrasynda mūǧalım bolyp qyzmetke qaldym.
Qazır student bolyp, ai saiyn ata-anasynan aqşa sūraityn tanystarymdy estısem, taŋǧalamyn. Däl qazır jastarǧa qosymşa jūmys ısteuge mümkındık mol. Ebın tapqan adam bır emes, bırneşe jūmysty da, oqudy da qatar alyp jüredı. Ol üşın adamda tek alǧa ūmtyluşylyq, ynta bolsa jetkılıktı.
Käsıbıŋ – näsıbıŋ
Joldasym – memlekettık qyzmetker. Aibekke tūrmysqa şyqqannan keiın, 2009 jyly düniege tūŋǧyşym Aqbota keldı. Araǧa jyl salyp ekınşı qyzym Aizerenı bosandym. Tynymsyz eŋbek etıp qalǧan basym balamen üide otyruǧa mäjbür boldym. Odan keiın Bekarys, artynşa Arujan düniege keldı. Menıŋ oiymşa, bala tärbiesı – ülken ǧylym. Olardyŋ tärbielı bolyp ösuıne otbasy men ösken ortasynyŋ tigızetın äserı mol. Sol üşın otaǧasynyŋ aitqanyn ıstep, bırjola bala tärbiesıne män berdık. Ärine, tek balaǧa alatyn järdemaqyǧa qarap qalmau kerek ekenın tüsındım. Öitkenı köpbalaly anaǧa berıletın ai saiynǧy järdemaqy tükke jetpeidı. Söitıp üide otyryp türlı tättı pısırudıŋ kurstaryna jazyldym. Qolyma alǧan sertifikat būl ıske odan ärı bel şeşe kırısuge türtkı boldy. Şükır, qazır türlı torttarǧa tapsyrys qabyldaimyn. «İnstagram» äleumettık jelısı arqyly tapqan tūtynuşylarym köp. Tıptı mereke künderı 10-15 tortqa deiın tapsyrys alamyn. Kelısı – 3500 teŋgeden. Būiyrtsa, köktemge qarai Talapker auylynan konditerlık seh aşu josparymda bar. Qazır şaǧyn käsıpkerlerge berıletın qoldaulardy paidalanǧym keledı, sol üşın qūjat mäselesımen jügırıp jürmın.
Köilek – äiel ajary
Taǧy bır ainalysyp jürgen şaruam – jalǧa ädemı köilekter beremın. İdeia qalai tudy deisız ǧoi? Alǧaşqyda ekı qyzyma ädemı köilek ızdep, türlı fabrikalardyŋ saityn aqtardym. Tapsyryspen alǧan ekı köilegım de sapaly şyqty. Keiınnen nege käsıpke ainaldyrmasqa degen oi kele qaldy. Bastapqyda Türkiiadan, Ukrainadan, Belorussiiadan on şaqty köilek aldyrdym, al qazır jas şamasyna qarai keŋeitıp jatqan jaiym bar. Merekelık, keşkılık köilekterdı qalamyzdyŋ kışkentai hanşaiymdaryna qoljetımdı baǧamen (7 myŋ teŋge) jalǧa berıp qana qoimai, köpbalaly otbasynyŋ balalaryna qaiyrymdylyq maqsatynda arnaiy konsertterge qatysatyn bolsa, tegın berıp jürmın. Mendegı erekşe köilekterge Astana ǧana emes, Kökşetau qalasynan da habarlasatyndar bar. Endı osy köilekterdı aqyly studiialarmen kelısıp, fotosessiia ūiymdastyru jūmystaryn pysyqtap jatyrmyn. Osylaişa qosymşa qarjy tauyp, joldasyma kömektesıp jatqanyma şükır deimın. Är käsıptıŋ berekesı bolady eken. Bügınde alty jyl päter jaldap jürgen künder artta qaldy. Öz qolymyzben üi saldyq. Eŋ bastysy, bala tärbiesıne de uaqyt bar.
