Elordada balany bırınşı synypqa beru boiynşa ötınışterdı qabyldau jalǧasuda. Degenmen keibır ata-ana būl prosess üşın qandai qūjattar kerek ekenın, al bastysy, olardy üiden şyqpai-aq qalai ötkızuge bolatynyn bılmeidı.
Qūjattar elektrondy türde de, qaǧaz türınde de qabyldanady dep resmi habarlanǧanmen, mektepke tūrǧylyqty jerıne qaramai qabyldanǧysy kelgender üşın qūjattardy elektrondy türde ötkızuge keŋes berıledı. Būl prosess school.nursultan.e-orda.kz saityndaǧy «1-synypqa qabyldau» bölımınde jüzege asyrylady.
Qandai qūjattar kerek?
1-synypqa qalalyq Bılım basqarmasynyŋ portaly arqyly qabyldanǧysy keletınder tömendegı qūjattardyŋ elektrondy köşırmelerın (fotosuretı nemese skanerlengen köşırmesı) ūsynuǧa mındettı:
• Balanyŋ tuu turaly kuälıgı;
• Densaulyq jaǧdaiy turaly anyqtamanyŋ №026/u-3 nysany;
• Densaulyq jaǧdaiy turaly anyqtamanyŋ №063/u nysany.
• Balanyŋ 3h4 formattaǧy fotosuretı;
• Uchaskelık pediatr beretın pedagogikalyq-medisinalyq-psihologiialyq komissiianyŋ şeşımı (eger bar bolǧan jaǧdaida).
Joǧaryda atalǧan qūjattardyŋ tüpnūsqalary bala mektepke qabyldanǧannan keiın sūratylady.
Eger ata-ana balany mektepke beru turaly ötınıştı portal arqyly emes, mektepterdıŋ özıne ötkızse, onda joǧarydaǧy qūjattardyŋ tüpnūsqalary kerek.
Balany 1-synypqa tırkemes būryn özıŋız taŋdaǧan orta mekteptermen jaqsyraq tanysyp şyqqanyŋyz jön. Eger ol mektep sız tūratyn audanǧa jatpaityn bolsa, onda oryn men kvota sanyn anyqtap alǧanyŋyz dūrys.
Tırkeu qalai jüzege asady?
Portalda özıŋız jäne balaŋyz turaly mälımetterdı engızesız. Balany mektepke qabyldau turaly habarlamanyŋ telefonyŋyzǧa keluın mındettı türde körsetıŋız.
Mälımetterdı engızıp, tırkelgenıŋızdı rastaityn kodty alǧan soŋ, sızge joldama berılgenı jäne kerektı qūjattardy alyp mektepke baruyŋyz qajettıgı turaly habarlama alasyz. Odan keiın sızge balanyŋ mektepke qabyldanǧany jaily SMS keledı.
Ötınış qanşa uaqytta tırkeledı?
Sız oquǧa ötınış bergen mektep ony bır jūmys künı ışınde qaraidy.
Qandai jaǧdaida ötınış qabyldanbauy mümkın?
Kerektı qūjattar tolyq bolmaǧan nemese jalǧan bolǧan jaǧdaida ötınış qabyldanbaidy.
Bala tūrǧylyqty jerıne säikes kelmeitın mektepke qabyldana ala ma?
Bala kvotalyq oryndary bar kez kelgen mektepke qabyldana alady. Kvotalyq oryndar boiynşa aqparatty portaldaǧy «Mektepter tızımı» bölımınde köruge bolady.
Eger mektep balany qabyldaudan negızsız türde bas tartsa, qaida habarlauǧa bolady?
Ondai jaǧdaida Beibıtşılık köşesı, 11 mekenjaiynda ornalasqan qalalyq Bılım basqarmasyndaǧy 119-keŋsege kelıp habarlauǧa bolady. Bailanys telefondary: 55-68-73, 55-68-83.
