Jyl boiy sabaq oqudan zerıkken balalar jazǧy demalysta oiynǧa qūmartyp, taŋnyŋ atysynan keştıŋ batysyna deiın üi körmei, oiyn qualap jür. Sonyŋ saldarynan keide balalar keleŋsızdıkke ūrynyp, türlı jaittarǧa tap bolyp jatady. Osyndai jaǧdailardy boldyrmau maqsatynda qalalyq bılım basqarmasy balalardyŋ jazǧy demalysyn da nazarynan tys qaldyrǧan emes. Balalardyŋ jazǧy demalysyn este qalarlyqtai qyzyqty qylyp ötkızu üşın är türlı lagerler ūiymdastyryldy. Solardyŋ bırı – №20 orta mektep janynan aşylǧan «Dostyq» balalar lagerı.
Demalys orny öz jūmysyn mausym aiynda bastaǧan. Mūnda 1-4 synyp aralyǧyndaǧy jalpy 200 jas jetkınşek qamtylsa, onyŋ 150-ı köpbalaly otbasy balalary men ata-ana qamqorlyǧynsyz qalǧan büldırşınder. Lagerde öz ısınıŋ şeberı, bılıktı tärbieşıler jūmys jasauda.
Demalys ornyndaǧy jetkınşekterdıŋ uaqyttaryn tiımdı paidalanu maqsatynda da josparly jūmystar qolǧa alynǧan. Salauatty ömır saltyn qalyptastyruda balalar taŋǧy sport jattyǧularyn jasaidy. Sonymen qatar är tarapty logikalyq oiyndar ūiymdastyrylady. Jolda jüru qauıpsızdık erejelerın, är türlı nyşandardy bıldıretın jol belgılerın üirenu üstınde. Är kün saiyn bassein, kinoteatr, qala muzeilerıne barudy jetkınşekter ädetke ainaldyrǧan.
Elbasynyŋ üş tūǧyrly tıl saiasatyn qoldaityn ūjym tärbielenuşılerge özge tılderdı üiretudı de nazardan tys qaldyrǧan emes. Ana tılımız ben dılımızdıŋ de märtebesın marqaitu maqsatynda «Dästürıŋdı saqtai bıl!», «Qazaqşaŋ qalai?» sekıldı köptegen şaralar körınısın tapty. Sondai-aq qazaq tılı üiırmesınıŋ jetekşısı Pernegül Qarjaubaiqyzynyŋ «Rämızderım – maqtanyşym» atty aşyq tärbie saǧaty da atap aitarlyqtai.
Jūbatqan TANJANOV,
№20 orta mekteptıŋ pedagog- ūiymdastyruşysy
