«Bas basylym» kıtaby jaryq kördı

Toqsan beske tolǧan ata basylym – «Egemen Qazaqstan» turaly «Bas basylym» fotoalbom-kıtaby jaryq kördı. 

Belgılı qalamger Ädıl Düisenbektıŋ 2004 jyly jazǧan «Qara şaŋyraq», ataqty jurnalist Janbolat Älihanūly 2009 jyly şyǧarǧan «Egemen­qazaq­standyqtar», taǧy basqa kıtaptardyŋ qataryn tolyqtyrǧan būl toptama basylymnyŋ 95 jyldyq mereitoiyna orai şyǧarylyp otyr.
«Jaŋa ömırdıŋ sony sürleuıne tüsken halyqtyŋ soqtyqpaly-soqpaqty, taiǧaq keşulı jolynyŋ, jetpıs jyldaiǧy sosia­listık däuırdıŋ, şirek ǧasyrdaiǧy täuelsızdık kezeŋınıŋ şejıresı jarqyrap jatyr būl gazettıŋ sarǧaiǧan betterınde. Onyŋ tıgın­dılerınen ǧasyrǧa juyq uaqyttyŋ ışınde söz alǧan jüz-jüz myŋ­daǧan adamdardyŋ dauysy küŋgırlep estılıp tūrǧandai». «Egemen Qazaqstan» respublikalyq gazetı» aksionerlık qoǧamynyŋ prezidentı Sauytbek Abdrahmanov kıtaptyŋ «Ūly joldyŋ bır belesı» dep aidarlanǧan alǧysözınde osylai deidı. Rasynda da, būl gazettıŋ arhivtegı tıgındılerınde Smaǧūl Säduaqasov, Jüsıpbek Aimauytov, Säken Seifullin, Mūhtar Äuezov, Beiımbet Mailin, Tūrar Rysqūlov, Oraz Jandosov, Ǧabit Müsırepovterdıŋ jüregınıŋ soǧysy, nietı men tılegı, kümbırlegen ünı – qoltaŋbasy bar. Özımız qadır tū­tatyn aǧalarymyz – täueldı zamannyŋ özınde täuelsızdıktıŋ qamyn jep, arman-maqsatynyŋ, ūlttyq müdde tūrǧysyndaǧy ūstanymynyŋ ūşqynyn tanytyp qalyp otyrǧan Şerhan Mūrtaza, kemeldılıgı men tereŋdıgın paş etıp, oqyrman öresın ösırudı mūrat etken Äbış Kekılbaev, ūlttyŋ adal ūldary Nūrlan Orazalin, Uälihan Qalijanūly, Erjūman Smaiyl
syndy qalamgerlerdıŋ redaktorlyq bet-beinesı de osynda körınıs tapqan.
1919 jyly «Ūşqyn» degen atpen jaryq körıp, künı bügınge deiın «Eŋbek tuy», «Eŋbekşıl qazaq», «Eŋbekşı qazaq», «Sosialdy Qazaqstan», «Sosialistık Qazaqstan» degen ataularmen şyqqan būl gazettıŋ tarihy – soŋǧy 95 jyldaǧy Qazaqstan, qazaq tarihynyŋ şejıresı deu­ge bolady. Sol sebeptı, «Bas basylym» kıtabynyŋ da şejıre kıtap ataluy zaŋdy.
Kıtapqa gazet tarihyna qatysty sirek suretter, qyzyqty derekter, osy basylymda qyzmet etıp, onyŋ ösuıne öz ülesın qosqan qalamgerlerdıŋ estelıkterı enıptı.
Almazdy jonǧan saiyn jarqyrai tüsetını, kemeŋger qariianyŋ jasy ūlǧaiǧan saiyn sözı altyndanyp, aqyly qazynaǧa ainalatyny sekıldı, ǧasyrǧa juyq tarihy bar «Egemen Qazaqstan» gazetı de qazaq qoǧamynyŋ qūndylyqtary qataryna enıptı.

Näzira SAILAUQYZY