BASQARU TÄSIMI JAŊA BASQARMALARMEN TOLYǦADY
Qalalyq mäslihattyŋ kezekten tys qyryq altynşy sessiiasyna Astana äkımınıŋ orynbasarlary, Almaty, Saryarqa, Esıl audandarynyŋ äkımderı men būqaralyq aqparat qūraldarynyŋ ökılderı qatysty.
Kün tärtıbındegı alǧaşqy mäsele boiynşa söz alǧan qala äkımı apparatynyŋ memlekettık-qūqyq bölımınıŋ basşysy Däulet Dosqūlov qalalyq mäslihattyŋ «Qazaqstan Respublikasynyŋ elordasy – Astana qalasyn basqaru täsımı turaly» 2013 jylǧy 27 mausymdaǧy şeşımıne özgerıster engızılgenın habarlady. Osyǧan orai baiandamaşy jinalǧandarǧa jaŋadan üş basqarmanyŋ qūrylatynyn jetkızdı.
– Bız aldaǧy uaqytta memlekettık mekemeler qataryn jaŋa bölımşelermen tolyqtyrmaqşymyz. Osylaişa, Astanada Memlekettık säulet-qūrylys baqylau basqarmasyn, Jerdı paidalanu men saqtaudy baqylau jönındegı basqarmany, sondai-aq Memlekettık satyp alu basqarmasyn qūru josparlanyp otyr, – dedı D.Dosqūlov. – Osy keste bekıtılgennen keiın Astana äkımdıgınıŋ şeşımımen būl qūrylymdar ädılet organdarynda tırkeledı.
Būl mäselenı mäslihat deputattary bırauyzdan maqūldady.
Odan soŋ jergılıktı biudjettık investisiialyq jobalar arasynda qarajatty qaita bölu mäselesı qarastyrylyp, qala äkımdıgınıŋ janyndaǧy Astana qalasynyŋ azyq-tülık öŋırlık tūraqtandyru qorlaryn qalyptastyru jäne paidalanu jönındegı komissiianyŋ, sondai-aq Astana qalasynyŋ agroönerkäsıptık keşenı subektısı investisiialyq salynymdar kezınde jūmsaǧan şyǧystarynyŋ bır bölıgınıŋ ornyn toltyru boiynşa subsidiialau mäselelerı jönındegı komissiianyŋ qūramy özgertıldı.
Gülbarşyn ÖKEŞQYZY