Astanada Qazaqstan halqynyŋ bırlıgı künı merekesıne arnalǧan türlı deŋgeidegı 200-den astam şara ūiymdastyryldy. «Qazaq elı» monumentı aldyndaǧy alaŋda ötken «Nūrly jol – jeŋıs joly» atty merekelık şaraǧa Memleket basşysy Nūrsūltan Nazarbaev qatysyp, elımızde mamyrajai tırlık keşıp jatqan jüzdegen ūlt pen ūlystyŋ aldynda aǧynan aqtaryldy.
Ötken ǧasyrda Qazaqstanǧa jer audarylǧan etnostar qoltyǧy keŋ, qūşaǧy aşyq qazaqtyŋ şaŋyraǧynan pana tapty. Osy jerde düniege kelgen olardyŋ ūrpaqtary elımızdı qazır tuǧan Otany dep sanaidy. «Qazaq elı» alaŋyna jinalǧan halyq elımızdegı bırlık pen tatulyqtyŋ ülgısın körsettı. Alaŋda ötıp jatqan oiyn-sauyqqa köz tastaǧan adam «Yrysy tasyp, jedeldep alǧa basqan» eldıŋ baquatty ömırınıŋ kuägerı boldy.
Merekelık şaraǧa jinalǧan elordalyq jäne Soltüstık Qazaqstan, Maŋǧystau, Qostanai, Qaraǧandy, Pavlodar oblystarynan kelıp, Astanaǧa at şaldyrǧan etnomädeni bırlestıkter ökılderı alaŋ aumaǧynda etnoauyl qūryp, toişyl qauymǧa merekelı de, berekelı dastarqannan däm tatqyzdy.
Būl kündı – aq tılekter aqtarylǧan kün dep atasaq ta bolady. Ärtürlı ūlttar men näsılder bır kısıdei merekege atsalysyp, Qazaqstandaǧy bırlık meiramyn ūlyqtady. Mäselen, slavian etnomädeni ortalyǧy «Soseduşki» ansamblınıŋ ökılı Oksana Tkacheva «Aspanymyz ärdaiym aşyq bolsyn» dese, Zlata» bolgar etnomädeni bırlestıgınıŋ ökılı Elena Iаsuk «Qazaqstan halqy bırlıgı künı – barşamyz üşın ülken mereke» dedı.
Sonymen qatar etnomädeni bırlestıkter ökılderı öz önerlerın ortaǧa saldy. Alaŋǧa kelgen qarasy mol halyq sahnadan şyrqalǧan äsem änderge qūlaq qūryşyn qandyryp, myŋ būralǧan bige köz suardy.
Elordada ötetın merekelık şaralardan qalmaityn, qorjynynda jürektı terbeitın lirikalyq änderden bölek eldıktı asqaqtatatyn şyǧarmalary jetkılıktı «MuzArt» pen änderı ūlttyq boiauǧa qanyq «Alaşūly» toptary, Marjan Arapbaeva, Almas Kışkenbaev, Äsel Säduaqasova, Ardaq Balajanova, Evgenii Gartung, Diana Şarapova sekıldı tanymal estrada änşılerı, opera jūldyzy Sündet Baiǧojin änderın äuelettı. Olardan Astana qalasynyŋ memlekettık akademiialyq filarmoniiasynyŋ ärtısterı de qalyspady. Astanalyq sirk pen «Naz» memlekettık bi, quyrşaqtar, «Jastar» jäne köŋıldı tapqyrlar syndy bas qaladaǧy teatrlar halyqtyŋ köŋıl-küiın kötere tüstı.
Bırlık künı merekesıne orai ūiymdastyrylǧan sporttyq şaralarǧa qatysuşylar da köp boldy.
Qazaqstan halqy bırlıgı künı merekesıne arnalǧan halyqtyq seruender men konsertter qalanyŋ basqa oryndarynda da, atap aitsaq, «Bäiterek» monumentı alaŋynda, elordalyq äkımdık aldyndaǧy alaŋda, ǧaşyqtar jäne studentter saiabaqtarynda, «Jastar» teatry aldynda jäne Esıl özenı jaǧalauynda tünnıŋ bır uaǧyna deiın toqtamady.
Amanǧali QALJANOV
