Nūr-Sūltan qalasy äkımdıgınıŋ qūrylys-tehnikalyq kolledjı bazasynda «Jas maman» jobasy aiasynda qūzyrettılık ortalyqtyŋ aşylu saltanaty öttı.
Ortalyqtyŋ aşyluy nätijesınde jūmys beruşıler tarapynan tülekterge sūranys artyp, bılıktı kadrlar daiarlanady. Sondai-aq WorldSkills halyqaralyq qozǧalysyna käsıbi şeberlık konkurstaryna qatysuşylardy joǧary deŋgeide daiyndauǧa mümkındık beredı. QR Parlamentı Mäjılısınıŋ deputaty Ämırhan Rahymjanovtyŋ sözınşe, mūndai ortalyq bılım aluşylardy käsıbi tūrǧydan şyŋdaidy.
«Osydan 20 jyl būryn osyndai ortalyqtar aşu tüsımızge kırmedı. Kezınde mūny şeteldık mektepterden de körgen joqpyz. Täuelsızdık alǧan jyldary Elbasy Nūrsūltan Nazarbaev bılım salasyna, onyŋ ışınde käsıbi daiyndyqqa köbırek köŋıl bölu qajet ekendıgın aitty. Äsırese, jūmysşy mamandyqtaryn köbeitudı tapsyrdy. Älemdık täjıribege süiensek, Germaniiada köpşılık joǧary oqu ornyna jügırmeidı, kerısınşe, olardaǧy eŋ ülken bılım – käsıptık bılım alu. Bügınde Qazaqstanda osy käsıptık bılımge qatty köŋıl bölınıp jatyr. Ortalyq arqyly oquşylar tehnikalyq bılımın şyŋdaidy, iaǧni qūrylǧylardy öz qoldarymen körıp, üirenedı. Osylaişa erteŋgı künı jūmysqa barǧanda daiyn kadr bolyp barady» dedı Ä.Rahymjanov.
Al Baiqoŋyr audanynyŋ äkımı Nūrbol Nūrsaǧatovtyŋ aituynşa, qazırgı uaqytta qūrylysşy mamandar sūranysqa ie. Sondyqtan atalǧan kolledjdıŋ mamandar daiarlauda orny erekşe.
«Barşaŋyzdy Täuelsızdıgımızdıŋ 30 jyldyq mereitoiymen qūttyqtaimyn! Osy uaqyt aralyǧynda bız köptegen jetıstıkterge jettık. Bılım men ǧylym salasyn kötersek, ülken jetıstıkterge jetemız. Osy kolledj – tek qana Baiqoŋyr audanyna ǧana emes, Nūr-Sūltan qalasy boiynşa betke ūstar kolledjderdıŋ bırı. Būl jerden ülken jūmysşylar şyǧyp jatyr. Men özım qūrylysşy bolǧannan keiın osy salany bılemın. Qazır Nūr-Sūltan qalasynda 10 myŋnan astam arendalyq tūrǧyn üidı tapsyryp jatyr. Bügıngı taŋda eŋ kerek mamandyq osy kolledjden şyǧady. Aşylyp jatqan ortalyq qūtty bolsyn!» dedı N.Nūrsaǧatov.
Aita ketu kerek, «Jas maman» jobasynyŋ negızgı maqsaty – kolledjderdıŋ materialdyq bazasyn jaŋartu jäne bılıktı mamandardy daiarlaudyŋ halyqaralyq täjıribesın engızu. Sondai-aq halyqaralyq bılım beru baǧdarlamalaryn engızu, şeteldık serıktestermen bırlese otyryp, oqytuşylar men öndırıstık oqytu şeberlerınıŋ bılıktılıgın arttyru.
