Tūŋǧyş Prezident künı aiasynda ūiymdastyrylǧan basty şaralardyŋ bırı – «Saryarqa» velotregınde ötken «Bır Otan! Bır taǧdyr! Bır Elbasy!» merekelık konsertı. Saltanatty räsımge Elbasy Nūrsūltan Nazarbaev qatysyp, söz söiledı.
Būl – soŋǧy jyldary dästürge ainalǧan patriottyq şara. «Bır Otan! Bır taǧdyr! Bır Elbasy!» ūranynyŋ astarynda tereŋ maǧyna jatyr. Elbasy aitqandai: «Bır halyq» – būl barlyǧymyz üşın ortaq ūlttyq müddeler, «Bır el» – būl barlyǧymyz üşın ortaq Otan. «Bır taǧdyr» – būl bız bırge jürıp ötken qiyndyqtar men jeŋıster! Mıne, qazaqstandyq qoǧamdyq kelısımdı şaiqaltpai ūstap tūratyn tabany taudai üş taǧan būl». Ärine, jūrtşylyqty elın, jerın süiuge şaqyratyn būl şara, äsırese, jastardyŋ boiyna otansüigışık sezımın ūialatuǧa aitarlyqtai üles qosatyny anyq. Saltanatty jiynda jastardyŋ qarasy köp boldy. Stadion ışın lyq toltyrǧan olar qoldaryndaǧy jalauşalarymen «Elbasy», «Astana», «Nūrsūltan», «Prezident» dep ūrandatyp otyrdy.
Jiynda söz söilegen Elbasy Nūrsūltan Nazarbaev osydan 23 jyl būryn 1991 jyldyŋ bırınşı jeltoqsanynda Qazaqstannyŋ Tūŋǧyş Prezidentı bolyp sailanǧanyn, osy tarihi künnen 15 kün ötken soŋ qazaq halqy özınıŋ tarihynda tūŋǧyş ret täuelsız el bolyp jariialanǧanyn atap öttı.
İä, 1991 jyldyŋ 1 jeltoqsany – el tarihyndaǧy erekşe kün. Osy künı halqymyz özdı-özı bolyp tūŋǧyş Prezidentın sailady. Qazaqstan Respublikasyndaǧy alǧaşqy jalpyhalyqtyq sailauda Nūrsūltan Nazarbaev 98,78 paiyz dauys jinap, jeŋıske jetken bolatyn.
–Bükılhalyqtyq dauys beru barysyndaǧy maǧan körsetılgen jalpyhalyqtyq senım erekşe jıger, zor quat berdı. Mıne, sodan berı 23 jyl boiy bız öz elımızdıŋ täuelsız damu daŋǧylymen jürıp kelemız, – dedı Memleket basşysy.
Nūrsūltan Äbışūly Qazaq elı qysqa merzımnıŋ ışınde tolaǧai tabystarǧa jetkenın aitty. Elımızdıŋ ekonomikasy tüzelıp, halyqtyŋ äl-auqaty artqanyna toqtaldy. Täuelsızdık jyldarynda köptegen belesterdı baǧyndyrǧan Qazaq elı älemge tanylǧanyn atap öttı.
Prezidenttıŋ aituynşa, Qazaqstan özgelerge köpūltty eldegı toleranttylyqtyŋ, tatu ärı baquatty ömırdıŋ ülgısın körsetıp otyr. Būl – közdıŋ qaraşyǧyndai saqtaudy qajet etetın zor bailyq.
Endı elımız älemdık ekonomikalyq qiyndyqtarǧa qaramastan «Nūrly jol» jaŋa ekonomikalyq saiasatyn jüzege asyrudy bastap otyr. Būl baǧdarlamalar jastardyŋ bolaşaǧy üşın de jasalǧan. Elbasy öz sözınde öskeleŋ jastarǧa ülken senım artyp, olardy bılıktı azamat bolyp ösuge şaqyrdy.
– Sızder – baqytty ūrpaqsyzdar. Sebebı, Täuelsız Otandaryŋyzda ömır sürıp jatyrsyzdar. Bız – täueldılıktı körgen ūrpaqpyz. Sondyqtan Täuelsızdıktıŋ qadır-qasietın jaqsy bılemız. Elımızdıŋ täuelsızdıgınıŋ arqasynda jaŋa ūrpaq tärbielendı. Bılımdı ūrpaq tärbielendı. Otanyn süietın ūrpaq tärbielendı. Bügıngı ūrpaq elımızdıŋ kök tuyn ärdaiym joǧary ūstap, Qazaqstannyŋ Täuelsızdıgın qasyq qany qalǧanşa qorǧaidy degen senımdemız. Barymyzdy baǧalap, bırlıgımızdı saqtau kerek. Bılım alyŋyzdar, jūmys ıstep, otbasyn qūryŋyzdar, – dedı N.Nazarbaev.
Saltanatty jiyn barysynda «Bır Otan! Bır taǧdyr! Bır Elbasy!» atty teatrlandyrylǧan qoiylym sahnalandy. Merekelık şaraǧa Qazaqstannyŋ estrada jūldyzdary patriottyq änderden şaşu şaşty. Elımızdıŋ tükpır-tükpırınen kelgen önerpazdar da Prezident künıne öz tartularyn ala kelıptı. Konsert «Jas Ūlan» respublikalyq kadet mektebınıŋ saltanatty şeruımen jalǧasyp, «Qazaqstan – bızdıŋ ortaq üiımız» folklorlyq baǧdarlamasy körermenge ūsynyldy.
Şaranyŋ basty qazyǧynyŋ bırı – «Menıŋ elım – Mäŋgılık el: Kaspiiden Altaiǧa deiın» dep atalǧan etnografiialyq avtoekspedisiianyŋ qorytyndylanuy boldy. Kıleŋ jastardan qūralǧan būl ekspedisiia elımızdıŋ şūraily tabiǧaty men qūndy eskertkışterın nasihattau maqsatynda ekı ai boiy respublikany aralap şyqqan bolatyn.
Merekelık baǧdarlamanyŋ soŋynda konsertke qatysuşylar Tūŋǧyş Prezident künıne arnalǧan änūrandy qosyla şyrqady.
Qymbat NŪRǦALİ
