«Nūrjol» saiajolynda beisenbı saiyn jinalyp, än şyrqap, küi tartyp, jyr tögıp, terme aitatyn bır top astanalyq jas öz bastamalaryn däl osylai ataidy. Iаǧni, «Dombyra keşı».
Keşke jinalatyn jastar arasynda bırde-bır käsıbi änşı joq. Ärqaisysy öz därgeiındegı «kümıs kömei». Elımızdıŋ är tükpırınen elordaǧa jinalǧan jastardyŋ būl bastamasynyŋ basty maqsaty – bırınşıden, öz uaqyttaryn köŋıldı ötkızu bolsa, ekınşıden – qazaq önerın nasihattau.
«Ädette, köşede gitara tartyp otyrady. Nege jinalyp dombyra tartpasqa degen oi boldy» deidı atalǧan şarany ūiymdastyruǧa mūryndyq bolǧandardyŋ bırı – Arşat Orazov, «Osylaişa Astananyŋ törınde dombyra tartaiyq degen ūsynys tastaldy. Maqsat – dombyrany, qazaq tılın, qazaqylyqty qalalyq jerde nasihattau. Bastapqyda jūrtqa taŋsyq bolǧany ras. Dombyra tartyp otyrǧan jastardy halyq tek qyzyqtap qarap ketetın. Al qazır tyŋdauǧa jäne öz önerın körsetuge kelıp jürgen tūraqty tyŋdarmandar bar. Mūndai ürdıs basqa qalalarǧa da taraityn siiaqty. Būǧan tek quanamyz».
Qazaq dalasynyŋ ärqily än mektebınıŋ tuyndylaryn, odan qalsa, qazaqtyŋ ämbege aian öleŋderın «Bäiterek» maŋynda äueletken jastar tyŋdarmandardyŋ qoşemetıne bölenedı.
«Astananyŋ äsem keşınde dombyradan äuelete tögılgen äsem än tyŋdap, jinalǧan qyz-jıgıttermen erkın äŋgıme düken qūrǧanǧa ne jetsın, şırkın?! Bükıl şarşauyŋdy ūmytyp, bır sergıp qalasyŋ. Qazır aptanyŋ beisenbısın asyǧa kütetın boldym» deidı astanalyq Janasyl Bolatbek.
Mūndai är bosqosudyŋ belgılı bır taqyryby bolady. Iаǧni, sol künı şyrqalatyn tuyndylar taqyryp aiasyndaǧy än men jyr boluy kerek. Bügıngı beisenbı, taǧy da «Dombyra PARTY». Ädettegışe, «Nūrjol» saiajoly, saǧat keşkı segızde. Būl joly äuesqoi änşıler halyq änderın şyrqamaq.
Osylaişa, Astananyŋ aspanynda asqaq än äuelemek…
Nūrbergen MAQYM
