Aqparat jäne qoǧamdyq damu ministrı Darhan Qydyrälı «Elorda Aqparat» JŞS-ke arnaiy kelıp, astanalyq jurnalisterdıŋ jaǧdaiyn bılıp, salanyŋ ortaq mäselesın talqylady.
Prezident Qasym-Jomart Toqaev ūsynǧan «Halyq ünıne qūlaq asatyn memleket» tūjyrymdamasyn ıske asyru maqsatynda ministr Darhan Qydyrälı bırqatar öŋırdıŋ şyǧarmaşylyq ūjymymen kezdesıp, ärıptesterımen emen-jarqyn äŋgımelesıp, aimaqtaǧy jurnalisterdıŋ tynys-tırşılıgımen tanysyp jürgenın jaqsy bılemız. Bas qalanyŋ negızgı aqparat qūraldaryn bırıktırgen mediaholdingke keluınen sondai sabaqtastyqty kördık.
– «Elorda Aqparat» JŞS ielıgındegı aqparat qūraldary bas qalanyŋ resmi bilıgımen tyǧyz bailanysta jūmys ıstep, halyqqa sapaly qyzmet körsetıp keledı. Bızdıŋ basylymdar şyǧarmaşylyq ūstahana retınde belgılı. Jurnalist şyǧarmaşylyq ızdenıste jüretın intellekt iesı desek, kompaniia qalamgerlerge jan-jaqty jaǧdai jasaudy qarastyruda, – dedı ūjym basşysy Oljas Sydyqbek.
Qoǧamnyŋ barlyq salasyna sifrlandyru dendep enıp, tehnologiia men internet jyldam damyǧan uaqytta dästürlı basylymdar qiyndyqpen betpe-bet keldı. Qazır şyǧarmaşylyq ūjymdar gazet-jurnaldardy şyǧaruda saraptamalyq maqalalar men jurnalistık zertteulerge basymdyq berıp, oqyrmannyŋ talǧamyna sai jūmys ısteude. Alaida basylym taralymy azaiyp, şyǧaru şyǧyny köbeidı. Naryq zaŋdylyǧyna sai qaǧaz, tasymal, uaqyt syndy qūndylyqtardy tiımdı üilestıre alǧan jaŋa medianyŋ däurenı jürıp tūr. Būl – älemdık tendensiia. Ministrdıŋ gazet öndırısıne män berıp, būl salany qaşanda qoldaitynyn aitqany köŋılımızdı jylytyp, senımımızdı şyŋdai tüstı.
– Gazettıŋ jūmysy öte auqymdy ärı jauapty. Tasqa basylǧan qūndylyqtyŋ uaqyt ötken saiyn baǧasy arta beredı. Bız gazet-jurnaldardyŋ soŋǧy oqyrmany qalǧanynşa qoldaudy toqtatpaimyz. «Qazpochta» AQ-pen memorandumǧa otyryp, gazet taratu ısıne sergek qarauǧa uaǧdalastyq. Qaǧaz şyǧyndarynda da azaitu baǧytynda jūmys ısteudemız, – dedı Darhan Quandyqūly.
Astana qalasynyŋ tynys-tırşılıgı turaly jedel aqparat taratyp, jaǧymdy jaŋalyqtyŋ jarşysyna, äleumettık mäselelerdıŋ tarazysyna ainalǧan şyǧarmaşylyq ūjym qyzmetkerlerınıŋ eŋbegın qalai därıptese de jarasady.
– «Elorda Aqparat» täuelsızdıkpen tūstas qalyptasyp, Astana qalasynyŋ ösıp-örkendeuıne, ruhani damuyna dem berıp keledı. Ülken ūstahanaǧa ainalǧan şyǧarmaşylyq mektep. Mūnda şyǧarmaşylyǧyn şyŋdap, elge tanylǧan Talǧat Batyrhan, Beken Qairatūly, Qymbat Toqtamūrat, Azamat Esenjol, Orynbek Ötemūrat jäne t. b. «Egemen Qazaqstanǧa» auysyp, el gazetınde jurnalistık jolyn jalǧastyrdy, – dedı Darhan Qydyrälı.
Eldegı qoǧamdyq-saiasi oqiǧalarǧa jurnalister belsendı aralasyp, eldıktıŋ jolynda adal eŋbek sıŋırıp keledı. 20 qaraşada ötken kezekten tys Prezident sailauynda jurnalister jedel jaŋalyq taratyp, saraptamalyq maqalalar jazyp, saiasi nauqannyŋ män-maŋyzyn därıptedı. Aqparat jäne qoǧamdyq damu ministrı Darhan Qydyrälı belsendı, bılıktı, bedeldı jurnalisterdıŋ eldık mūrat, ūlttyq müdde jolyndaǧy eŋbekterın atap, gazet öndırısınıŋ damuyna airyqşa üles qosyp jürgen Ǧalym Qojabekovke, Larisa Uvalievaǧa jäne Gülşat Saparqyzyna «Aqparat salasynyŋ üzdıgı» tösbelgısın tabystady.
– Astana qalasyn basqarǧan äkımderdıŋ ışınde bırınşı ret Altai Kölgınov redaksiiaǧa kelıp, elordalyq jurnalistermen arnaiy jüzdesıp, bırqatar qajettılıktı şeşuge järdemdestı. Endı sala ministrlerınıŋ ışınde özıŋız alǧaş bolyp kelıp tūrsyz. Būl jyl osyndai erekşelıgımen este qalatyn boldy. Ministrdıŋ qolynan marapat alǧanymyzǧa quanyştymyz! – dedı «Astana aqşamy» gazetınıŋ qalyptasu kezeŋınen eŋbek etıp kele jatqan Ǧalym Qojabekov.
Al «Vecherniaia Astana» gazetınıŋ bas redaktory Larisa Uvalieva basylymdar kürdelı kezeŋdı bastan ötkızıp jatqanyn, osyndai kezde resmi bilıktıŋ qoldauy maŋyzdy ekenın atady. Sondai-aq jelıde feik aqparattar jeldei esken uaqytta şynaiy aqparatqa sūranys öskenın, al resmi aqparat közı – gazet ekenın eske saldy.
– Dūrys aitasyz, qazır şynaiylyǧy tekserılgen aqparatqa sūranys joǧary. Qazır rastalǧan aqparatty jedel taratu maŋyzdy bolyp tūr. Mass-media turaly jaŋa zaŋda «ūlttyq aqparattyq immunitettı» qalyptastyru jäne damytuǧa basymdyq berıledı. Onda jurnalisterdıŋ märtebesın köteru, memlekettık qarjylandyrudy reformalau, memlekettık organdarmen özara ıs-qimyldy jetıldıru, internet-jarnamany retteu, basylymdardy qūn salyǧynan bosatu, aqparatqa qoljetımdılıktı arttyru sekıldı bırqatar artyqşylyq közdelude, – dedı ministr.
Jurnalisterdıŋ qūqyǧyn nyǧaitu jäne mındetın qaita qarau, sondai-aq şyǧarmaşylyq ökılderınıŋ artyqşylyǧyn keŋeitudı qarastyratyn zaŋdy jurnalister qauymy asyǧa kütıp jürgenı anyq.
Dästürlı basylymnyŋ ışkı jaǧdaiyn tereŋ tüsınetın Darhan Quandyqūly redaksiiaǧa kelıp, şyǧarmaşylyq ökılderımen jyly sūhbat qūrǧanynan jurnalister qauymy şabyttana tüstı.
Jurnalistika salasynda gazette qalyptasyp, telearnalarda şyŋdalyp, baspasöz qyzmetınde halyq pen bilıktıŋ dänekerı bolǧan Gülşat Saparqyzy:
– Memleketımızdıŋ örkendeuı jolynda jazǧan maqalalarymyz arqyly tittei bolsa da öz ülesımızdı qosa alsaq, qarapaiym halyqtyŋ janaiqaiyn, problemalaryn qozǧap, halyq pen bilık arasyndaǧy altyn köpır bolyp, tūrǧyndardyŋ talap-tılegın jetkıze alsaq – maqsatymyzdyŋ oryndalǧany. Osy baǧyttaǧy eŋbegımızdı baǧalaǧandaryŋyz üşın alǧys bıldıremın, – dedı.
«Elorda Aqparat» JŞS tarihynda Aqparat jäne qoǧamdyq damu ministrı Darhan Qydyrälı tūŋǧyş keluımen sipattalyp, saqtalatyn bolady.
