EŊBEK QATYNASTARYNA BAQYLAU KÜŞEITILEDI
Keşe Astana äkımı Ädılbek Jaqsybekovtıŋ töraǧalyǧymen kezektı apparat keŋesı öttı.
Jiynda eŋbek qatynastaryn tiımdı ūiymdastyrudyŋ, sondai-aq qalany damytudyŋ özektı mäselelerı qaraldy, dep habarlady Astana qalasy äkımınıŋ baspasöz qyzmetı.
Bügıngı taŋda 8 ūiym 106 qyzmetkerge jalpy somasy 37 mln. 300 myŋ teŋge qaryz.
Osyǧan bailanysty qala basşysy barlyq qūrylys kompaniialary men merdıger ūiymdardy baqylauǧa aludy tapsyrdy. Ol sondai-aq, qūrylystyŋ sapasy men tiımdılıgı salada jūmystyŋ qalai ūiymdastyrylǧanyna tıkelei bailanysty ekenın atap öttı.
Keŋes barysynda äkım qaladaǧy kölık tūraqtaryna qatysty kökeitestı mäselenı köterdı. Anyqtalǧandai, elordanyŋ ırı sauda ortalyqtary kölık tūraqtaryna arnalǧan oryndardy şaǧyn biznes nysandary retınde jalǧa berıp keledı. Būl memlekettık mekemeler tarapynan tiıstı baqylaudyŋ joqtyǧyn bıldıredı. Ädılbek Jaqsybekov avtotūraq aimaqtaryn paidalanuǧa bailanysty keşendı tekserıs jürgızudı tapsyrdy.
Sondai-aq, keŋeste elorda infraqūrylymy men aldaǧy merekelık şaralarǧa daiyndyq barysy söz boldy.