Adamzatqa orasan ziian keltırgen sūrapyl soǧystyŋ aiaqtaluyna ärbır maidangerdıŋ qosqan ülesı zor. Solardyŋ ışınde menıŋ atam da bar.
Menıŋ atam Nūrǧazy Jünısūly – būrynǧy Semei oblysy Aqsuat audany Ernazar auyldyq keŋesıne qarasty Jäntıkei auylynyŋ tumasy. Jiyrma toǧyz jasynda 1941 jyldyŋ jeltoqsan aiynda soǧysqa şaqyrylyp, Öskemen qalasynda jasaqtalǧan atqyştar diviziiasynda daiyndyqtan ötken. Atam Novorossiiskıdegı Kışı jerde ūrysqa qatysqan. Ol mergen bolǧan. Köptegen jaudyŋ közın qūrtyp, azamatttyq boryşyn adal atqarypty.
Keiınnen ony barlauşylar rotasyna auystyrypty. Jaudyŋ jasyrynǧan oryndaryn tauyp, bırneşe ret tıl äkelu operasiiasyna qatysqan. Osy erlıkterı üşın qanşama märte marapatqa ūsynylǧanymen, qūjattary bekıtılmeptı.
1943 jyldyŋ qaŋtar aiynda aiaǧynan jaralanyp, äskeri gospitalǧa tüsedı. Keiınnen atamdy Taşkenttegı äskeri gospitalǧa auystyryp, emdegen. Bıraq soǧysqa jaramaityn bolǧan soŋ, 1943 jyldyŋ jazynda elge qaitarǧan. Atam elge serjant ataǧymen oralypty. Ūly Jeŋıstıŋ 10, 20, 30 jyldyǧyna arnalǧan medaldarmen marapattalǧan. Jeŋıstıŋ 40 jyldyǧynda atamdy «II därejelı Otan soǧysy» ordenımen marapattaǧan.
Atam soǧystan keiın Kökjyra auylynda ūzaq jyldar boiy salyq inspeksiiasynyŋ inspektory bolyp qyzmet ıstegen. Almaty, Semei qalalarynda salyq komitetınıŋ bılım jetıldıru kurstarynda oqyǧan. Ömırınıŋ soŋǧy jyldarynda ärtürlı jūmystar atqarǧan.
Atamyz ben äjemız soǧystan keiın auylǧa jer audarylǧan nemıstıŋ otbasynan jetım qalǧan 9 jasar İda esımdı qyzdy asyrap alǧan. İda atamyzdyŋ tegımen Nūrǧazina bolyp, Kökjyra 7 jyldyq mektebınde oqydy. Keiınnen tūrmysqa şyqty. Atamyzdan taraǧan ūrpaqtarynyŋ bärı İda apamyzben jaqsy aralasyp tūrǧan. Keiınnen apa- jezdemız Altai ölkesınıŋ Paspeliha audanynyŋ Mamontov auylyna köşıptı. İda apamyz osydan 4 jyl būryn qaitys boldy. Artynda Sergei esımdı ūl, Tania esımdı qyz jäne kelın balalary bar. Menıŋ äkem jäne onyŋ aǧa-apailary Sergeidıŋ otbasymen bügınde aralasyp tūrady. İdadan bölek atam men äjem 2 ūl, 3 qyz tärbielep ösırdı. Men atamnyŋ közın körgen joqpyn. Men ömırge kelerden tört jyl būryn 1982 jyly dünieden ötken. Bız nemerelerı atamyzdyŋ batyr bolǧanyn äkelerımızden estıp östık.
Endı soǧys bolmasyn, aspanymyz aşyq, el ırgesı berık bolǧai deimız.
Eltai NŪRǦAZİN
