Türmede otyrsa da, erkındıktegı köleŋkelı biznesın basqaryp, qylmysyn jalǧastyra beretınder tek filmderde ǧana emes, ömırde de barşylyq. Mūndai mafiialar qūddy saǧym siiaqty. Jeme-jemge kelgende qoldan susyp şyǧyp ketedı. Elordanyŋ jergılıktı tūrǧyny M. degen azamaty da sybailastaryn paidalanyp, esırtkı satyp esırıp kelgen.
Ol temır tordyŋ ar jaǧynda otyryp-aq astyrtyn biznesın sybailastary arqyly jalǧastyra bergen.
«Astanada asa ırı mölşerdegı esırtkımen ainalysatyn ūiymdasqan top bar» degen şūǧyl aqparat Astana qalasy Işkı ıster departamentıne byltyr tamyz aiynda tüsken. Poliseiler bırden ıske kırısedı. IID Tergeu bölımı ūiymdasqan qylmyspen küres bölımınıŋ basşysy, polisiia maiory Serık Ybraevtyŋ aituynşa, ūiymdasqan qylmystyq top, sonyŋ ışınde esırtkı biznesımen ainalysatyndar öte saq ärı äkkı keledı. Olardyŋ tūrǧylyqty meken-jaiy bolmaidy. Säl sekem alsa boldy, üiden üige köşıp jüre beredı. Telefon nömırın de jiı auystyrady. Laqap attary da köp. Būlardy sözden ūstau da mümkın emes eken. «Esırtkımen ainalysatyndar naşa zattaryn eşqaşan öz atymen atamaidy. Olar «saŋyrauqūlaq», «därı» degen sekıldı küdık tudyrmaityn sözderdı paidalanady» deidı Serık Rahymǧaliūly.
Esırtkı satu arqyly oŋai oljaǧa kenelıp, köl-kösır aqşanyŋ dämın tatqandar nebır qitūrqy ıs-äreketterge barady. Joldaryna kedergı bolǧan nemese küdık tuǧyzǧan adamdardy da aiamaidy. Soǧan qaramastan elorda poliseilerı ūiymdasqan topty qolǧa tüsıru üşın jedel şaralar tızbegın qūrady. Tıptı, bır poliseidı naşaqorlardyŋ ortasyna «sıŋırıp» jıberedı. Täuekelge bel buǧan qūqyq qorǧauşy basyn qaterge tıge jürıp, özıne jüktelgen mındettı abyroimen alyp şyǧady.
Tergeuşılerdıŋ käsıbi bılıktılıkpen jan-jaqty oilastyrylǧan jospary oidaǧydai jüzege asyp, būlyŋǧyr bolǧan aiǧaqtar anyqtala bastaidy. Belgılı bolǧanyndai, M. degen azamat türmede otyryp-aq, telefon arqyly esırtkı biznesın jürgızıp otyrǧan. Esırtkı jetkızuşılermen bailanysu, satatyn adamdardy tabu, ūsaq dilerler arasyndaǧy röldı belgıleu, tabysty böludıŋ bärın osynyŋ moinynda bolǧan. Al onyŋ bostandyqtaǧy äielı esırtkını gramdap ölşeu, aluşylarǧa aparyp beru şarualarymen ainalysqan. Erlı-zaiyptylardyŋ özderınen basqa ekı senımdı adamy bolǧan.
Poliseiler asa eptılıkpen jūmys ıstep, alty aidyŋ ışınde būltartpas däleldermen älgı küdıktılerdı qolǧa tüsıredı.
Astana qalalyq IID basqarmasynyŋ asa maŋyzdy ıster jönındegı aǧa tergeuşısı, polisiia podpolkovnigı Rüstem Malkenovtyŋ aituynşa, küdıktı M. degen azamatty tıntu kezınde odan 1 kg astam eş qospasyz taza esırtkı tabylǧan. Qazaqstannyŋ zaŋy boiynşa 1 gramnan asatyn esırtkınıŋ özı asa ırı mölşer bolyp esepteledı. Al 1 kg degenımız – tym köp. Olar esırtkınıŋ bır gramyn 4 myŋ teŋgeden satyp kelıptı.
Istıŋ män-jaiyn prokuratura da qadaǧalap, poliseilerdıŋ äreketınde eşqandai da zaŋ būzuşylyq joq dep tanyǧan. Qazır ıs sotqa joldanǧan.
Aitpaqşy, älgı ūiymdasqan qylmystyq toptyŋ basşysy türmege esırtkı biznesımen ainalysqany üşın tüsıptı. On jylǧa bas bostandyǧynan aiyrylǧan ol jazasyn ötep, byltyr jeltoqsan aiynda ǧana abaqtydan bosaǧan eken. Endı, mıne, türmeden şyqpai jatyp, taǧy da qylmysyn qaitalap, temır torǧa qamalyp otyr.
Mūndai ūiymdasqan top soŋǧy bes jylda Astanada bolmaǧan eken. Demek, būl ışkı ıster organy qyzmetkerlerınıŋ maŋdai terı, eren eŋbegı dep baǧalauǧa bolady. Äsırese, bölım bastyǧy, polisiia maiory Serık Ybraev pen podpolkovnik Rüstem Malkenovtıŋ eŋbegın erekşe atauǧa bolady.
Qymbat NŪRǦALİ
