Astana äkımdıgınde jaŋadan salynatyn halyqaralyq mektepterge qatysty bırneşe memorandumǧa qol qoiyldy. Atalmyş şaraǧa qala äkımı Baqyt Sūltanov pen BAÄ-nıŋ Qazaqstandaǧy Tötenşe jäne ökılettı elşısı Mohammed Ahmad Aldjaber qatysty.
2023 jylǧa deiın Astanada oquşy sany 123 myŋ balaǧa köbeietının būǧan deiın jazǧan edık. Elorda mektepterınde jyl saiyn oquşylar sany ortaşa alǧanda 15-18 myŋ adamǧa artatynyn eskersek, däl qazırgı uaqytta bılım salasyna qatysty balalardy 100 paiyz mekteppen qamtu mäselesı tūr.
– Halyqtyŋ äleumettık jaǧdaiyn köterudıŋ bır tetıgı – bılım beru salasy. Būl turaly Elbasy da öz sözınde aityp öttı. Astana halqy jyl sanap ösıp keledı, osy tūrǧyda mektep mäselesı de maŋyzdy. Bız aldaǧy 5 jyl kölemınde taǧy 120 myŋ oquşyny qamtamasyz etudı qolǧa alyp otyrmyz. Onyŋ ışınde 20 myŋ oquşyǧa arnalǧan jekemenşık mektep salu esebınen jüzege asyrylady. Būl jūmystar otandyq jäne şeteldık investorlardyŋ kömegımen ıske asyrylady, – dedı kezdesude Baqyt Sūltanov. Qala basşysy atalǧan jobalardy jüzege asyruǧa investisiialyq qoldau körsetıp otyrǧan Mohammed Ahmad Aldjaber bastaǧan BAÄ memleketınıŋ delegattaryna öz alǧysyn bıldırdı.
Jiynda kelesı qol qoiylǧan qūjat – «SABIS» halyqaralyq mektebın salu jönındegı memorandum. Oǧan Astana qalasy äkımdıgı, QR Syrtqy ıster ministrlıgı İnvestisiia jönındegı komitetı men mektep direktorlary qol qoidy. «Atalmyş qūjatqa säikes, Astanada halyqaralyq «SABIS» mektep jelısınıŋ filialy salynady. Sondai-aq būl joba – jekemenşık mektepter esebınen orta bılım beru ornynyŋ tapşylyǧyn şeşudıŋ bır joly. Bügınde elordada 12 jekemenşık mektep bar. Äkımdık jäne «SABIS» halyqaralyq mektep jelısınıŋ arasynda jasalǧan ekıjaqty kelısım negızınde investisiia arqyly taǧy basqa da jalpy bılım beru mektebın salu josparlanuda» deidı Astana qalasy äkımınıŋ orynbasary Malika Bektūrova. Onyŋ aituynşa, memorandum negızınde salynatyn myŋ balaǧa arnalǧan mektep pen 250 oryndy balabaqşa qaladaǧy oryn tapşylyǧy mäselesın azaituǧa septıgın tigızedı. Sondai-aq 200 jaŋa jūmys orny paida bolady. Aita keterlıgı, «SABIS» halyqaralyq mektebı älemnıŋ 20 elınde qyzmet etedı eken. Ozyq täjıribelı bılım oşaǧynyŋ atalǧan elderde 132 mektebı bar, bügınde 70 myŋdai şäkırt tärbieleude.
Memorandum negızınde salynatyn bılım oşaqtary, atap aitqanda, «SABIS» halyqaralyq mektebı jäne balabaqşasyn saludyŋ bırınşı kezeŋı 2019-2021 jyldar aralyǧynda jüzege asyrylady. Jobanyŋ jalpy qūny – 15,5 mln AQŞ dollary. Al ekınşı kezeŋı 2022-2023 jyly jürgızıledı. Jobanyŋ jalpy qūny 10 mln AQŞ dollary bolmaq.
Al qūny 20 mln AQŞ dollary bolatyn «KINDERWORLD KAZAKHSTAN» atty Singapur modelıne säikes bılım beru ortalyǧyn qūrudy jüzege asyru merzımı 2019-2021 jyldar dep belgılendı. Sol siiaqty osy jyldar aralyǧynda qūny 3,5 mlrd teŋgenı qūraityn «Alpamys» jeke mektebın aşu, jobasy 5,5 mlrd teŋge bolatyn «Tamos Education» jeke mektebı, sondai-aq 900 oquşyǧa arnalǧan, qūny 1,2 mlrd teŋge tūratyn «CA GARDEN SCHOOLS» atty jalpy bılım beru jäne «MATH-LANGUAGE «SEED SCHOOL» mektebın salu josparda bar. Montessori «Jūldyz» bılım beru mektebın tūrǧyzuǧa 500 mln teŋge jūmsalatyny aityldy. Onda 150 oquşy men 350 mektepaldy bılım aluşylarǧa arnalǧan oryn bolady.
