Basty aqparatSaiasat

Irkılıssiz ılgerileu ızımen

05(7)

Beisenbı künı Elbasy Nūrsūltan Nazarbaev elımızge memlekettık saparmen kelgen Koreia Respublikasynyŋ Prezidentı Pak Kyn Hemen kezdestı.

Koreia – älemge «Aziia jolbarysy» retınde tanylǧan memleket. Qarapaiym agrarlyq elden ekonomikasy qarqyndy damyǧan alpauytqa ainalǧan Koreianyŋ bügınde jyldyq sauda ainalymy 1 trillion dollardan asady. Qysqa merzım ışınde ekpındı örkendegen el qazır düniejüzındegı ekonomikasy eŋ ozyq jiyrma eldıŋ bırıne ainalyp otyr.

Qazaqstan men Koreia arasyndaǧy qarym-qatynas 90-jyldardyŋ basynan bastalyp, bügınde barlyq sala boiynşa jarasymdy bailanys ornyqty.

Elımızge alǧaş ret memlekettık saparmen kelıp otyrǧan Pak Kyn He – Koreia Respublikasynyŋ 11-ınşı prezidentı. Bilık tızgının byltyrdan berı qolǧa alǧan.

Qazaqstan Prezidentı Pak Kyn Henyŋ elımızge sapary eleulı oqiǧa ekendıgın atap öttı.

– Bız täuelsızdıgımızdıŋ alǧaşqy künderınen bastap-aq sızdıŋ eldegı reformalardy qalt jıbermei, zerdelep kelemız. Men Ro De Udan bastap, Oŋtüstık Koreianyŋ barlyq prezidentterımen kezdestım. Sol jyldary bastalǧan ekı el qarym-qatynasy qazır joǧary qarqynmen damu üstınde. Sızdıŋ saparyŋyz özara yntymaqtastyǧymyzdy arttyra tüsedı degen ümıttemın. Bız Koreiamen saiasi jäne ekonomikalyq tyǧyz qarym-qatynas ornatuǧa müddelımız, – dedı Elbasy.

Öz kezegınde Koreia Respublikasynyŋ Prezidentı Pak Kyn He būl sapary qazaq-korei strategiialyq serıktestıgı tarihyndaǧy jaŋa kezeŋnıŋ basy bolatynyna senım bıldırıp, byltyr ekı el arasyndaǧy tauar ainalymy būryn-soŋdy bolmaǧan rekordtyq körsetkışke jetkenın atap öttı.

Aitalyq, byltyr ekı el arasyndaǧy alys-berıs 1,5 milliard dollardy qūraǧan. Al biylǧy alǧaşqy üş aidyŋ özınde 400 millionnan asqan. Būǧan elımızde jūmys ıstep jatqan bırneşe jüzdegen bırlesken käsıporynnyŋ ülesı ülken.

Qazaqstan Oŋtüstık Koreiaǧa uran, mys, altyn, temır jıberse, ol jaqtan elektronika qūrylǧylary, maşinaǧa qajettı qūral-jabdyqtar, bölşekter tasymaldanady.

Şaǧyn qūramdaǧy kezdesu barysynda bailanystardy joǧary deŋgeide nyǧaitudyŋ, ärtürlı sala boiynşa yntymaqtastyqty arttyrudyŋ negızgı baǧyttary jan-jaqty talqylandy.

Būdan keiın Qazaqstan jäne Koreia Respublikasynyŋ prezidentterı ekıjaqty mämıle räsımıne qatysyp, bırqatar qūjattarǧa qol qoidy. Atap aitqanda, ekı el ükımetınıŋ kelısımı boiynşa özara vizalyq talaptardy joiu mäselesı qarastyryldy. Endı qazaqstandyq azamattar öz tölqūjatymen Oŋtüstık Koreiaǧa vizasyz-aq bara alady. Tek saparlau merzımı bır aidan asyp ketpese bolǧany.

Būǧan qosa, bölek elımızdıŋ Ädılet, Bılım jäne ǧylym, Qorşaǧan orta jäne su resurstary ministrlıkterı de özara yntymaqtastyq turaly memorandumǧa qol qoidy.

Qūjattarǧa qol qoiu räsımınen keiın el köşbasşylary bırlesken mälımdeme jasady.

Nūrsūltan Äbışūly Koreia prezidentımen bırlesken ırı jobalardy jüzege asyru mäselelerın talqylaǧanyn, sonyŋ ışınde koreilık biznestıŋ Qazaqstannyŋ üdetılgen industriialyq-innovasiialyq damu baǧdarlamasyna qatysuy jaiy keŋınen söz bolǧanyn atap öttı. Memleket basşysynyŋ aituynşa, biylǧy qyrküiek aiyna «Qazaqstan Respublikasy – Koreia Respublikasy» ıskerlık forumy josparlanyp otyr. Elbasy bizneske jaqsy mümkındıkter ūsynatyn «İnvestisiialar turaly» jaŋa zaŋǧa qol qoiylǧanyna da nazar audardy.

– Kompaniialar korporativtık jäne tabys salyǧynan – 10 jylǧa, mülık salyǧynan 8 jylǧa bosatylady. Olardyŋ kürdelı şyǧyndarynyŋ 30 paiyzy öteledı. Jūmys küşın tartu kvotasyz jäne rūqsattamalarsyz jüzege asady, sondai-aq bızdıŋ elderımız arasynda vizasyz rejim ornatyldy. Osynyŋ bärı ekı memleket üşın de yŋǧaily jäne tiımdı biznestık ahual qalyptastyrady, – dedı Qazaqstan Prezidentı.

Būdan keiın Nūrsūltan Nazarbaev pen Pak Kyn He qazaq-korei biznes forumynyŋ aşylu räsımıne qatysty.

Qymbat NŪRǦALİ

Taǧyda

admin

«Astana aqşamy» gazetı

Ūqsas jaŋalyqtar

Pıkır üsteu

Back to top button