Keniiadan kelgender şaŋ qaptyrdy
Köpşılıktı bırlıkke bastaityn būqaralyq sporttyŋ bırı – marafon. Senbı künı Astanada dästürlı halyqaralyq «Astana Marathon-2018» jarysy saltanat qūrdy. Dumandy dodany elorda äkımı Baqyt Sūltanovtyŋ özı bastap berdı.
Astana asuyn baǧyndyruǧa elımızdıŋ tükpır-tükpırınen jäne şet memleketterden qatysuşylar arnaiy keldı. Atap aitsaq, Germaniia, Resei, Japoniia, İtaliia, Özbekstan, BAÄ, Şvesiia, Oŋtüstık Koreia, Ūlybritaniia, AQŞ, Qyrǧyzstan, Fransiia, Türkiia, Avstraliia, Keniia, Gruziia, Liuksemburg jäne İspaniia marafonşylary synǧa tüstı.
Jarys jolyna 4661 adam şyqty. Onyŋ ışınde 830 adam marafonnyŋ mereilı mejesı – 42,2 kilometrge jügıruge niet tanytsa, 3831 adam qysqa qaşyqtyq – 10 kilometrdı qolai körıptı. Bıraq būlardyŋ bärı öz şaqyrymdaryn tolyq jügırıp şyǧa almady. Eŋ ūzaqqa 672 adam jügırse, 10 kilometrdı 2895 adam eŋserdı.
Sonymen «EHRO-2018» körme aumaǧynan bastalǧan jarystyŋ märesın bırınşı bolyp Keniiadan kelgen jelaiaqtar kestı. 42,2 şaqyrymdy 2 saǧat 17 minut 57 sekundta artta qaldyrǧan Erik Kering üzdık boldy. Ekınşı oryndy alǧan Robert Gaito da – keniialyq. Üşınşı bolyp qazaq Ämır Baituqanov keldı.
Äielder arasynda absoliuttı chempion bolǧan da – keniialyq. Onyŋ esımı – Salina Djebet. Ekınşı oryn – sonyŋ otandasy Liusi Ndunguǧa tiesılı. Üşınşı – qyrǧyzstandyq Iýliia Andreeva.
Bas jüldege 905000 teŋge, kez kelgen baǧytqa Air Astana biletı, Astana Marathon simvolikasymen Amir Watches ekskliuzivtı saǧattary tabystaldy.
Al 10 km qaşyqtyqta taǧy da sol keniialyqtar eşkımdı ılestırmedı. Joǧarydaǧydai bırınşı jäne ekınşı oryndarǧa jaiǧasty: erlerden Şadrak Koech pen Kennet Rotich, äielderden Norah Djeruto men Deizi Djemkemei. Al üşınşı orynda – özımızdıŋ azamattar Aleksei Gusarov pen Svetlana Saunina.
Būǧan qosa, jas erekşelıkterıne qarai jeŋımpazdar anyqtaldy. Onyŋ köbısı – qazaqstandyqtar. Bıraq būl marafon aldyna jan salmaǧan Keniiadan kelgen jelaiaqtarmen este qaldy. Sondyqtan üşınşı kelgenderdıŋ nätijesı altynǧa para-par boldy deuge bolady.