Bas qalamyzda E.Rahmadiev atyndaǧy memlekettık akademiialyq filarmoniiasynda «Örtölǧau» konsertı öttı. Şaraǧa «Qorqyt» etno-ansamblı, «Alem» estradalyq bi ansamblı, multiaspapşy Edıl Qūsaiynov jäne «Turan» folklorlyq-etnografiialyq ansamblı qatysty.
Filarmoniianyŋ körkemdık jetekşısı Gülmira Qūttybadamovanyŋ aituynşa, «Örtolǧau» konsertı dästürlı muzykany zamanaui qoiylym jäne bimen ärlendıredı.
«Turan» ansamblı, Qazaqstannan basqa, Resei, Fransiia, İzrail, Türkiia, Germaniia, Oŋtüstık Koreia, AQŞ, Äzerbaijan, İspaniia, Norvegiia jäne t. b. älemnıŋ 70 elınde 600-den astam konsert bergen. Aldaǧy uaqytta Türkiia elıne gastroldık saparyn bastaidy. Ansambldıŋ qūrylǧanyna 14 jyl bolǧan.
– Osydan 14 jyl būryn Qazaqstanda dästürlı önerdı ılgerıletu qiyn bolatyn. Sebebı konsertterge tek 10-20 adam keletın. Qazırgı taŋda tek muzyka jazyp qana qoimai, sonymen qatar, qazaq önerın türlı elde nasihattap kelemız. Al būl konsertke kelgen körermenderdıŋ arasynda jastardyŋ köp ekenın baiqap, quanyp otyrmyz, – dedı ansambl müşesı Serık Nūrmoldaev.
«Qorqyt» etno-ansamblınıŋ körkemdık jetekşısı, mädeniet qairatkerı Şolpan Qorǧanbek ūjymnyŋ maqsaty dästürlı muzykany därıpteu ekenın atady.
– «Qorqyt» etno-ansamblı qazaqtyŋ barlyq halyq aspaptarynda (qobyz, qylqobyz, narqobyz, dombyra, syrnai, müiız syrnai, şaŋqobyz, jetıgen, şerter, dauylpaz, sazsyrnai, bas dombyra, sybyzǧy, su aǧaş, toqyldaq jäne t. b.) oinaityn talantty muzykanttardy bırıktıredı. Muzykanttar bırneşe aspapty, sondai-aq kömeimen än aitudyŋ sirek tehnikasyn meŋgergen. Ūjym repertuarynyŋ negızın avtorlyq öŋdeudegı küi, terme, jyr qūraidy. Olardyŋ arasynda «Astana-Bäiterek», «Balalyq şaq dosy», «Elım menıŋ», «Täuelsızdık tolǧauy» jäne B.Momyşūlynyŋ 100 jyldyǧyna arnalǧan «Eldıŋ erı – Bauyrjan!» tuyndylary bar.
Jinalǧan körermen önerpazdarǧa süisınıp, erekşe qoşemet körsettı. Halyq muzyka önerınıŋ naǧyz merekesıne ainalǧan bıregei konserttıŋ soŋy airyqşa quanyşqa ainaldy.
Baian ASYLBEKOVA
