Qala men SalaQala tırşılıgı

KÖŞESI TAZANYŊ – KÖŊILI TAZA

IMG_7956

Elordalyqtar endı tūrmystyq qaldyqtardy bölek-bölek jinaityn boldy. Biylǧy 1 nauryzdan bastap jüzege asyryla bastaǧan qanatqaqty joba tūrǧyndardyŋ ekologiialyq mädenietın arttyryp, «jasyl ekonomikaǧa» beiımdeitın bolady.

Tūrmystyq qatty qaldyqtardy bölek-bölek jinau jönındegı pilottyq jobany Astana qalasynyŋ äkımdıgı, «Astana Tazartu» JŞS jäne «Efes Qazaqstan» JK AQ bırıgıp jüzege asyryp otyr. Joba şeŋberıŋde 1 nauryzdan bastap 36 tūrǧyn üi men 17 PİK aumaǧynda qaǧaz, plastik, şyny jäne aralas qaldyqtardy bölek-bölek jinauǧa arnalǧan arnaiy qoqys jäşıkterı ornatyldy.

Köşesı tazanyŋ – köŋılı taza. Al köşenıŋ tazalyǧy qoqysty şaşpai-tökpei, arnaiy jäşıkterge saludan bastalady.  Qorşaǧan ortanyŋ ekologiialyq tazalyǧyn arttyru maqsatynda qolǧa alynǧan joba boiynşa Astana aulalaryna qyzyl, jasyl, sary jäne kök tüstı tört konteinerler ornatyldy. Olardyŋ betıne jazylǧan jazuǧa qarap, qandai qaldyqqa arnalǧanyn bıluge bolady. Mūnda  şyny, organika, plastik būiymdar men qaǧazdar  jeke-jeke salynuy tiıs. Astana qalasynyŋ tabiǧi resurstar jäne tabiǧat paidalanudy retteu basqarmasy basşysynyŋ orynbasary  Miras Gaisinnıŋ aituynşa, bügınde qala aumaǧynda tūrmystyq qatty qaldyqtardy bölek-bölek jinauǧa arnalǧan 160 arnaiy türlı-tüstı konteiner ornatylyp otyr. Tūrmystyq qatty qaldyqtardy tasymaldaumen «Astana Tazartu» JŞS  ainalysady.  Jinalǧan qoqystardyŋ kädege jaraityndary qaitalama şikızat daiyndau üşın qoqysty öŋdeu zauytyna jöneltılse, ıske aspaityny bırden qala syrtyndaǧy poligonǧa jıberılıp, joiylady.

Būǧan qosa,  elordada byltyrǧy qaraşa aiynan berı jer üilerde tūratyn tūrǧyndar üşın külsalǧyş jäşıkter de paida boldy. «Astana Tazartu» JŞS bas direktory İvan Lavrinenkonyŋ aituynşa, būryn qoqys konteinerlerıne tögılıp jürgen kömırdıŋ külı keide ottyŋ tūtanu qaupın tuǧyzǧan.  Al qazır külge arnalǧan jeke jäşıktıŋ paida boluy būl qauıptı seiıltken körınedı.

 Kül şyǧaru jobasy ıske asyrylǧaly qalada 75 konteiner ornatylyp, 600 tonnadan astam kül poligonǧa şyǧarylǧan. Bügınde kül – salǧyş jäşıkter qalanyŋ Şūbar, Köktal, Lesozavod, Ürker syndy  jer üiler şoǧyrlanǧan aumaqtarǧa ornatylǧan.

Sondai-aq qalanyŋ bırneşe sau­da ortalyqtarynda ısten şyqqan elektrondyq qūraldardy tastaityn 10 ekoboks  qoiylǧan.

Jalpy tūrmystyq qaldyqtarǧa arnalǧan arnaiy jäşıkter ornatu täjıribesı elordada 2013 jyldan berı jüzege asyrylyp keledı. Aitalyq, bügınde jaryq diodty şamdarǧa arnalǧan sarǧyş tüstı jäşıkterge jūrtşylyqtyŋ közı üirenıp qaldy.  Uly jaryqşamdardy sol jäşıkterge tastaudy elordalyqtar ädetke ainaldyrǧan körınedı. Sonyŋ bır körınısı, soŋǧy bır jarym jyldyŋ ışınde jäşıkterge tastalǧan millionnan astam diodty şam kädege jaratylǧan eken.

Qymbat TOQTAMŪRAT

Taǧyda

Ūqsas jaŋalyqtar

Pıkır üsteu

Back to top button