Parlament Senatynda «Qoljetımdı jäne tiımdı densaulyq saqtau jüiesı» taqyrybyna arnalǧan ükımet saǧaty boldy. Otyrys Prezidenttıŋ «Ädılettı memleket. Bırtūtas ūlt. Berekelı qoǧam» atty Qazaqstan halqyna Joldauyn ıske asyru aiasynda öttı.
Ükımet saǧaty barysynda respublikanyŋ densaulyq saqtau ministrı Ajar Ǧiniiat jäne «University Medical Center» korporativtık qorynyŋ Basqarma töraǧasy Iýrii Pia baiandama jasady.
Astana qalasy mäslihatynyŋ hatşysy Erlan Kanalimov densaulyq saqtau salasyndaǧy negızgı problemalardy taldady.
– Biylǧy jyldyŋ 1 qaraşasyndaǧy jaǧdai boiynşa Astana tūrǧyndarynyŋ sany 101 myŋ adamǧa östı, elordalyq emhanalarda kün saiyn 20 myŋnan astam adamǧa qyzmet körsetıledı. Elordadaǧy basty mäselelerdıŋ bırı – halyqqa jedel kömek körsetudıŋ mümkındıgı, iaǧni qoljetımdı boluy jäne adam sanynyŋ köbeiuımen bırge medisina personaldaryna tüsetın jüktemenıŋ şamadan tys artyp ketuı deuge bolady, şamadan tys jükteme 150 paiyzdy qūraidy, – dedı halyq qalaulysy.
Şynynda, Astana qalasynda äleumettık infraqūrylymnyŋ damuy talapqa sai dei almaimyz. Bas qalada demografiialyq körsetkış joǧary, onyŋ üstıne, ışkı migrasiianyŋ äserınen halyq sany bırneşe esege östı. Mūnyŋ bärı äleumettık mäselelerdı şūǧyl şeşu kerektıgın körsetıp otyr.
– Jalaqy, salyqtar men därı-därmekter ūiymnyŋ jalpy şyǧynynyŋ 90 paiyzyn qūraidy, būl medisinalyq ūiymdardyŋ qarjylyq tūraqtylyǧynyŋ jetkılıksızdıgın körsetedı. Elordada emhanalar men auruhanalar salu jeke investorlar üşın tartymdy emes. Motivasiianyŋ qarapaiym jäne qoljetımdı qūraldary boluy kerek, mysaly, investisiialyq şyǧyndardy ışınara jabu. Keibır MSAK ūiymdarynda SOBMB şeŋberınde de, MÄMS şeŋberınde de jasalǧan kelısımder boiynşa qarajat ıs jüzınde joq ekendıgıne qaramastan, konsultativtık-diagnostikalyq qyzmetterdı jetkılıksız qarjylandyru mäselesın köterdım. Būl därı-därmek pen qyzmetter üşın jäne salyq tölemderı boiynşa qaryzdyŋ joǧary täuekelıne äkeledı, – dedı Erlan Qanalimov.
