Elımızde dästürge ainalǧan «Mektepke jol» atty qaiyrymdylyq şarasyna meşıtter de atsalysuda. Būl jönınde gazet tılşısıne Qazaqstan mūsylmandary dıni basqarmasynyŋ Astana qalasyndaǧy ökılı, «Nūr-Astana» meşıtınıŋ bas imamy Nauryzbai qajy Ötpenov äŋgımelep berdı.
– İslam dınınıŋ qaiyrymdylyq ısterdı qūptaityny belgılı. Osy oraida, astanalyq qaltaly azamattar arasyndaǧy ızgılıkke qūştarlyq tanytatyndar jönınde aita ketseŋız.
– Saf altyndai tazalyq pen meiırımdılıkke, jūmsaqtyq pen keşırımşıldıkke ündeitın asyl dınımız ata dästürımızben üilesım tauyp, tamyryn tarih qatparynan tartyp keledı. Bır Allanyŋ razylyǧy üşın sauapty ısterge atsalysyp, qaiyrymdylyq şaralaryna mūryndyq bolyp jürgen
azamattar el ışınde barşylyq. Būl da bolsa asyl dınımızdıŋ kökjiegınıŋ keŋeiuı, şaŋyraǧynyŋ biıkteuı dep bılemız.
Aq pen qara almasqan qym-quyt tırşılıkte taǧdyrdyŋ san qily synaqtary men qiynşylyqtaryna tap bolǧan qandas, eldes, otandastarymyz, aǧaiyn-tuǧandarymyz meşıtımızge kelıp jatady. Barşasynyŋ mūŋ-mūqtajyna meşıt qyzmetkerlerı beijai qaramai, qolda bar mümkındıkterımen aianbai qol ūşyn sozuda. Basa aita keterlıgı, osy ıste jūmyla kırısıp, atsalysyp kele jatqan käsıp döŋgeletken azamattardyŋ ülken septıgı tiiude. Alaida, olardyŋ köpşılıgı esımderın jariia etpeudı qalaidy. Sondai azamattarymyzǧa Alla ekı dünienıŋ baqytyn bersın, otbasylaryna amandyq-saulyq jazsyn dep sūraimyz Jaratqannan.
– Qazır elımızdıŋ barlyq öŋırınde, onyŋ ışınde Astana qalasynda kezektı oqu jyly qarsaŋynda «Mektepke jol» qaiyrymdylyq aksiiasy ötude. Būl igı şaraǧa elordalyq meşıtterdıŋ jamaǧattary qanşalyqty üles qosuda?
– Aǧymdaǧy tamyz aiy – mektep mausymyna daiyndyq aiy. Ata-analar balalaryna mektepke qajettı oqu qūraldary men kerek-jaraq, kiım-keşekterın äzırleuge köşude. Osy mausymda köşten keiındeu qalatyn otbasylar da bolatyny jasyryn emes. Qai ata-ana balasynan baryn aiap qalar deisız. Osy rette japyraq jürek jetkınşekterge quanyş syilap, köŋılderıne demeu bolu da – mūsylmandyǧymyzdyŋ belgısı.
Astanadaǧy Äzıret Sūltan, «Nūr-Astana» jäne Säduaqas Ǧylmani meşıtterı mektep balalaryna qajettı kiım-keşek, oqu formalaryn äleumettık jaǧdaiy tömen otbasylarǧa ülestıru maqsatynda sız aitqan qaiyrymdylyq aksiiasyna bır kısıdei üles qosuda. Jaqsylyqta jarysamyn, köpşılıkke kömegım tisın degen, sauabyn bır Alladan kütken kısılerdıŋ älı de qaiyrly ıske qatysularyna mümkındık bar.
– Dūrys-aq, şara barysynda kömekke mūqtaj qanşa otbasyny qamtamasyz etpeksızder?
– Eŋ aldymen Astana meşıtterınıŋ būl igı şarany bırneşe jyldan berı dästürlı türde ūiymdastyryp kele jatqanyn aitqym keledı. Al endı aksiia aiasynda Äzıret Sūltan meşıtı üş jüz büldırşındı, «Nūr-Astana» ortalyq meşıtı ekı jüz elu balany, Säduaqas Ǧylmani meşıtı jüzden astam oquşyny kerek-jaraqtarymen, oqu qūraldarymen qamtymaq.
– Äŋgımeŋızge raqmet!
