Memlekettık marapattar tapsyryldy
Keşe Astana qalasynyŋ äkımı Ädılbek Jaqsybekov Jeŋıstıŋ 70 jyldyǧyna orai elordalyq bır top Ūly Otan soǧysy ardagerlerı men tyl eŋbekkerlerın Qazaqstan Respublikasynyŋ memlekettık nagradalaryn tapsyrdy.
Jinalǧan qauymdy Jeŋıstıŋ 70 jyldyq mereitoiymen qūttyqtaǧan qala basşysy: – Jeŋıs künı – qasiettı de, qasterlı mereke. Otan üşın ot keşken qazaqstandyq jauyngerler jeŋıs künın jaqyndatuǧa az üles qosqan joq. Sızderdıŋ erlıkterıŋız, qaharmandyq pen otansüigıştık qasietterıŋız – keiıngı ūrpaqqa ülgı-önege. Soǧystan keiın qūldyraǧan ekonomikany qalpyna keltıruge de ardagerlerımız qajyrlylyqpen atsalysty. Osynau meiram qarsaŋynda Elbasynyŋ Jarlyǧymen elımızdıŋ örkendeuıne erekşe üles qosqan azamattarǧa joǧary memlekettık marapat tapsyrylatyn dästür bar. Biyl da bır top astanalyq ardager sondai qūrmetke ie bolyp otyr, – dep atap öttı.
Būdan keiın Ädılbek Ryskeldıūly memleket aldyndaǧy eren eŋbegı, belsendı qoǧamdyq qyzmetı üşın jäne Ūly Otan soǧysyndaǧy Jeŋıstıŋ 70 jyldyǧynyŋ qūrmetıne orai soǧys ardagerı Şaǧila Qūsanovaǧa «Parasat» ordenın, maidangerler Tezekpai Äbdırahmanovqa, Vladimir Kalsinge, «Ardagerler ūiymy» respublikalyq qoǧamdyq bırlestıgı Astana qalasyndaǧy bölımşesınıŋ töraǧasy Amangeldı Syzdyqovqa «Qūrmet» ordenın tapsyrdy. Qart sarbazdar Baimūhan Äbılov, Baqtybai Almabekov, Aleksandr Morunov, Şärıp Rahymjarov, eŋbek ardagerı Qali Mūqataev, «Ardagerler ūiymy» RQB Astana qalasyndaǧy bölımşesı töraǧasynyŋ orynbasary Esbolat Düisenov «Eren eŋbegı üşın» medaldarymen marapattaldy. Al soǧys ardagerlerı Sihymbai Mamyrov pen Janiiaz Şalbolovqa Qazaqstan Respublikasynyŋ Qūrmet Gramotasy tabystaldy.
Osy künı marapattalǧandardyŋ bırı – Esıl audany mügedekter qoǧamynyŋ töraǧasy Baqytjan Särsenbaev. Ol «Qazaqstan halqy assambleiasynyŋ – 20 jyldyǧy» mereitoilyq medalımen marapattaldy.
– Sızderdıŋ Otan üşın jasaǧan erlıkterıŋız eşqaşan ūmytylmaidy. Özderıŋız syilaǧan beibıt ömırdıŋ arqasynda elımız ülken jetıstıkterge jetıp otyr. Aǧa ūrpaqqa qaşan da taǧzym! Merekelerıŋız qūtty, denderıŋız sau, otbastaryŋyz aman bolsyn, – dep sözın tüiındedı elorda äkımı.
Saltanatty jiynǧa qatysuşylardyŋ atynan söz alǧan soǧys ardagerı Tezekpai Äbdırahmanov özderıne degen memlekettıŋ ıltipatyna riza ekendıgın jetkızıp, alǧysyn bıldırdı.
Qymbat TOQTAMŪRAT