Basty aqparatQala men Sala

MEREKE MEIMANDARY MARAPATTALDY

Eŋbek adam ömırınıŋ mänı bolyp qala bermek. Jer betınde jaqsylyq atty ūǧym barda şynaiy baqyt, eŋbek baqyty da qoǧamnyŋ bır qūndylyǧy retınde saqtalatyny anyq. Keşe elordada ötken respublikalyq «Jalpyǧa ortaq Eŋbek qoǧamyn qūru» forumynda jinalǧan jūrt osyny sezıngendei boldy.

Jūmyrtqadan jün qyryqqandardyŋ joly bolǧan zamanda auadan aqşa jasap, eŋbeksız-aq tabysqa jetuge ärkım qūştar. Alaida, materialdyq öndırıs oi öndırısınen kemşın tüsıp, tiıstı ündestık būzylǧan qoǧam qalaida daǧdarysqa ūşyraidy. Sondyqtan, Elbasy Nūrsūltan Nazarbaev 2013 jyldyŋ 22 qaraşasynda  arnauly Jarlyqqa qol qoiyp, Eŋbek künın jariialaǧan. Būl mereke jyl saiyn qyrküiektıŋ soŋǧy jeksenbısınde atap ötıletın bolyp bekıtılgen edı.

Sonymen, biyl Qazaqstan halqy alǧaş ret Eŋbek künın atap ötude. Osyǧan orai, Astanamyzdaǧy eŋselı orda – Ūlttyq muzei ǧimaratynda respublikalyq «Jalpyǧa ortaq Eŋbek qoǧamyn qūru» forumy  öttı. Şaraǧa elımızdıŋ tükpır-tükpırınen 200-ge juyq delegat jinaldy.

Jiynnyŋ betaşary retınde Premer-ministrdıŋ bırınşı orynbasary Baqytjan Saǧyntaev Prezident Nūrsūltan Nazarbaevtyŋ qūttyqtau-hatyn oqydy. Hatta Qazaqstan jalpy qoǧamdyq eŋbek qoǧamyn qalyptastyru jolynda senımmen alǧa basyp kele jatqany aitylyp,  qarapaiym eŋbekkerlerdı yntalandyru  üşın  «Eŋbek erı», «Eŋbek ardagerı» marapattary engızılgenı söz boldy. «Är qazaqstandyqtyŋ adal, käsıbi eŋbegı Qazaqstandy älemnıŋ damyǧan 30 elınıŋ qataryna qosudyŋ kepılı» dep atap ötıptı Elbasy qūttyqtauynda.

Öz kezegınde söz alǧan densaulyq saqtau jäne äleumettık damu ministrı Tamara Düisenova eŋbekkerlerdı merekesımen qūttyqtaǧannan keiın elımızdegı eŋbek salasyna qatysty keibır mäselelerge toqtaldy. Ministrdıŋ aituynşa, qarapaiym jūmysşylardyŋ qauıpsızdıgı qazır nazar audaratyn jaǧdai. Sondyqtan da, Ükımet halyqaralyq talaptarǧa sai mekemelerdegı qauıpsızdık erejelerınıŋ saqtaluyn oŋaltuǧa baǧyttalǧan jaŋa bastamalardy qolǧa alyp otyr. Käsıporyndardan jūmysşylardyŋ densaulyǧyna ziian keltırmeudıŋ bar jaǧdaiyn jasau talap etılmek. Sol sekıldı käsıpodaqtarmen bırlese otyryp, eŋbektı dūrys baǧalau, jūmysşylardyŋ qūqyn qorǧau, olarǧa tiıstı, tiımdı jaǧdai qalyptastyru, azamattardy eŋbek etuge yntalandyru baǧyttarynda  äreket jasalyp jatqanyna toqtaldy.

Tamara Düisenova mälımdegendei, bügıngı taŋda elımızdegı qoǧamdyq önerkäsıpterde 8 millionnan astam azamat eŋbek etude. Eŋbek etuge qyzyǧuşylyqty arttyru üşın jasalyp jatqan şaralar da barşylyq.

Sol sözdıŋ dälelı retınde forum barysynda eŋbek etıp, aty ozǧan qarapaiym azamattar da söz söiledı. Densaulyq saqtau salasynyŋ bedeldı ökılı Talapqali Izmūhambetov abyroiǧa jetu üşın tynymsyz, tiianaqty eŋbek etıp, üzdıksız oqyp, ızdenudıŋ maŋyzdylyǧyn mälımdedı. Adam ömırınde miynyŋ 30 paiyzyn ǧana igere alatynyn, al qalǧan qabıletın paidalana almai kele jatqanyn aityp, jastardy eŋbeksüigıştıkke ündedı. Al bılım beru salasynyŋ bedeldı ökılı Aiagül Mirazova eŋbektıŋ adamǧa küş beretının, al onyŋ ädıl baǧalanuy qanat bıtıretının aityp, aǧynan jaryldy.

Sonymen, būl künı Astanaǧa jan-jaqtaǧy elıne eŋbegı sıŋgen azamattar jinalǧan. Olardyŋ köbı jūmysşy kiımımen emes, merekelık, sändı kiımmen kelgenı ras edı. Öitkenı, būl – eŋbekkerlerdıŋ merekesı. Jaqsylyq jasaudan läzzat alatyn, eŋbek arqyly ǧana şynaiy baqytqa jetuge bolatynyn sezınıp, tüsınıp jürgenderdıŋ merekesı būl.

Eŋbek adamdaryna qūrmet körsetu maqsatynda  taǧaiyndalǧan arnauly marapat – «Eŋbek ardagerı» medalı de osy künı ielerın tapty. Premer-ministrdıŋ orynbasary Baqytjan Saǧyntaev Kejek Ysqaqov, Maia Kerımbaeva, Vladimir Kliakin, Amantai Musin, Qazanǧap Mūqaşev, Aqbūryş Sisenbaeva, Vladimir Petuhov, Aleksandr Borodin, Aleksandr Perfilov, Zäure Ämetova sekıldı elge eŋbegı sıŋgen azamattardy medalmen marapattady.

«Bız seksennıŋ seŋgırınen asqanmen jan-düniemız, jüregımız el dep soǧady. Qanşama şaruaǧa, qiyndyqtarǧa qaramai ülkenderdı ūmytpai jürgenı üşın keiıngı ūrpaǧymyzben maqtanamyz» dep quanyşymen bölıstı Kejek Ysqaqov degen aqsaqal.

Jiynnyŋ soŋynda konserttık baǧdarlama ūsynyldy. Būl künı eŋbek ūlyqtaldy.

Näzira SAILAUQYZY

Taǧyda

admin

«Astana aqşamy» gazetı

Ūqsas jaŋalyqtar

Pıkır üsteu

Back to top button