Nazarbaev ortalyǧynyŋ mūrajaiynda Ūly Otan soǧysynyŋ ardagerı Temırǧali Ädılbekovpen Jeŋıs künıne orailastyrylǧan kezdesu ötkızıldı. Temırǧali Ädılbekov – Ūly Otan soǧysynyŋ ardagerı, Kursk doǧasy ūrysyna qatysuşy. Otstavkadaǧy podpolkovnik biyl ekı bırdei mereitoidy atap ötude. Bırınşısı – 1 mamyrda 90 jasqa tolsa, 5 mausymda – Kursk doǧasyna 70 jyl tolady.
Aqsaqal jinalǧandar aldynda jauyngerlık joldary turaly estelıkter aityp, jastarǧa alǧa qoiǧan maqsatqa qalai jetuge bolatyndyǧyn äŋgımeledı. Barlyq qatysuşylardy alda kele jatqan merekelerımen qūttyqtady. Is-şarany ūiymdastyruǧa qaladaǧy №27 orta mekteptıŋ 8 «V» synyp oquşylary jäne orys tılı men ädebietı pänınıŋ mūǧalımı Baianşa Sadyqova belsene atsalysty.
Maidangerlerge alǧys aitty
Astana qalalyq mäslihatynyŋ deputaty, S.Seifullin atyndaǧy Qazaq agrotehnikalyq universitetınıŋ rektory, professor Aqylbek Kürışbaev Jeŋıs künı qarsaŋynda Ūly Otan soǧysyna qatysqan №6 sailau aimaǧynda tūratyn ardagerlerdı üiıne baryp qūttyqtady.
Aqylbek Kürışbaev maidan dalasyndaǧy keskektı kürester, soǧystan keiıngı qiraǧan halyq şaruaşylyǧyn köteruge qatysqan janqiiarlyq eŋbekter turaly ardagerler aitqan estelıkterdı tyŋdady. Jasy 101-ge kelgen soǧys ardagerı Rodion Skok rektormen äŋgıme barysynda: «Soŋǧy kezderı aiaǧym auyryp jürgenı, äitpese, Jeŋıs künı öz aiaǧymmen jürıp, qydyrǧandy jaqsy köretın janmyn» dep aǧynan jaryldy. Varvara Gribneva: «Jasym 92-ge keldı, qūdaiǧa şükır, densaulyǧym jaqsy. Osylai üige kelıp qūttyqtaǧan ystyq lebızderıŋızge köp rahmet. Elımız aman, jūrtymyz tynyş bolǧai» dep batasyn berdı. Qariialar kezdesu soŋynda deputatqa alǧystaryn bıldırdı.
Erkejan SÄTIMBEK
