Qalalyq mäslihattyŋ zaŋdylyq, qūqyq tärtıbı jäne qoǧammen jūmys jönındegı tūraqty komissiiasynyŋ kezektı otyrysynda elorda aumaǧyndaǧy migrasiia mäselesı keŋınen söz boldy.
Bügıngı taŋda Astana qalasy Işkı ıster departamentınıŋ Köşı-qon polisiiasy basqarmasynda atqarylyp jatqan jūmystar az emes. Atalmyş basqarma basşysy G.Dönenbaevanyŋ aituynşa, soŋǧy bes jylda elordada tırkelgen şeteldık azamattardyŋ qatary 500 myŋǧa köbeiıp otyr. Olardyŋ basym bölıgı bas qalaǧa syrttan jūmys ızdep jäne tūraqty tūru üşın keletın ışkı migranttar körınedı.
– 2015 jyldyŋ üş aiynda qalalyq Köşı-qon basqarmasyna 27 123 şeteldık azamat tırkeldı. Būl ötken jyldyŋ säikes kezeŋımen salystyrǧanda 29 paiyzǧa köp. Byltyr tırkelgen şeteldıkterdıŋ sany – 19 325. Sondai-aq, üstımızdegı jyly Astanadaǧy bes halyqqa qyzmet körsetu ortalyǧynda köşı-qon basqarmasynyŋ qyzmetkerlerı 29 myŋnan astam Qazaqstan Respublikasynyŋ azamatyn tırkeuden ötkızıp, 2 901 adamdy tırkeuden şyǧardy, – dedı G.Dönenbaeva.
Talqylanǧan mäselege orai pıkır bıldırgen halyq qalaulylary astanalyqtardyŋ tūraqty tırkelgen mekenjaiy boiynşa naqty tūruyn baqylaudy küşeitu kerektıgın eskerttı. Sonymen bırge deputattar şeteldık jūmys küşın paidalanu barysynda jūmys beruşılerdı zaŋ talaptaryn būljytpai oryndauǧa şaqyrdy.
