Aqiyq aqyn Mūqaǧali Maqataevtyŋ sözıne jazylǧan «Senıŋ közıŋ» änımen sahnaǧa äu basta-aq jarqyrap şyqqan «MuzArt» tobyna biyl 15 jyl tolyp otyr. Bügınde özge muzykalyq ūjymdarǧa qaraǧanda «MuzArtty» kärı de, jas ta erekşe qūrmet tūtady. Toptyŋ mereitoiyna orai jaqynda «MuzArt Live» mega-jobasy tūsauyn kestı. Anyqtap aitsaq, ūjym el arasynan öz ızbasarlaryn ızdeuge kırısıp kettı. Jarystyŋ ırıkteu kezeŋı Astanada bastaldy.
ŪLTTYQ RUHTY ŪLYQTAITYN JOBA
«Baiqaudy realiti-şou türınde ötkızemız. Bız tek vokaldyq daryny bar jastardy emes, barlyq jaǧynan talantty azamattardy taŋdaimyz. Qazırgı şaqtaǧy mädeniettıŋ, önerdıŋ parqyn tüsınetın, köşbasşylyq qasiettı qalyptastyrǧan adamdardy ırıkteimız» deidı tanymal sazger, muzykant, jobanyŋ prodiuserı Renat Gaisin. Ūiymdastyruşylardyŋ aituynşa, jaŋa joba ūlttyq sipatta, qazaq tılınde örbidı. «Sahnada jürgenıne 15 jyl tolǧan «MuzArt» toby osy taŋda özındık tarihqa ainalyp ülgerdı. Jūrtşylyq ärqaşan olardyŋ şyǧarmaşylyǧymen meilınşe tereŋırek tanysqysy keledı. Būl oraida «Qazaqstan» ūlttyq arnasy qalyŋ qauymǧa ülken mümkındık ūsynyp otyr» deidı atalmyş teleradiokorporasiianyŋ basqarma töraiymy Nūrjan Mūhamedjanova.
«MuzArt Live» muzykalyq telejobasyna 16 men 25 jas aralyǧyndaǧy er-jıgıtter qatysady. Ümıtkerlerdıŋ muzykalyq bılımınıŋ boluy şart emes. Sondai-aq, muzykalyq talǧamy men oryndauşylardyŋ qūramyna da (solo, duet, top) män berılmeidı. Eŋ basty talap – qatysuşynyŋ memlekettık tılde än aita bıluı mındettı.
Jarys 3 kezeŋge bölıngen. Alǧaşqy ırıkteu 15 nauryz ben 15 säuır aralyǧynda onlain türde öttı. Saiyskerlerden respublika boiynşa 12 myŋdai ötınış kelıp tüsken. Tıptı, körşıles Qytai, Qyrǧyzstan elderınde tūratyn qandas bauyrlarymyz da qatysuǧa niet bıldırgen. Al ekınşı tur mamyrdyŋ 10-ynan 25-ıne deiın bırneşe aimaqta ūiymdastyrylady. Aita keterlıgı, būl kezeŋge «MuzArt» tobynyŋ tolyq qūramy – Meirambek Bespaev, Säken Maiǧaziev, Kenjebek Janäbılov qatysyp, köŋılden şyqqan önerlı örenderdı özderı taŋdaidy.
Astana qalasynyŋ ümıtkerlerı osy aptada baq synady. Ekı kün boiy Beibıtşılık jäne kelısım saraiynda ötken ırıkteude 150-ge juyq azamat bäsekelestı. Aqyldasa kele, «MuzArt» müşelerı 16 jıgıttı kelesı ainalymǧa şaqyrdy.
ASTANALYQTARDYQ ALYMY ZOR
Astana qalasynyŋ ümıtkerlerı osy aptada baq synady. Ekı kün boiy Beibıtşılık jäne kelısım saraiynda ötken ırıkteude 150-ge juyq azamat bäsekelestı. Bırınen bırı asyp tüsetın qabılettı önerpazdar ışınen üzdıkterdı erekşeleu oŋaiǧa soqpaǧany ras. Äitkenmen, dodanyŋ aty – doda. Bıreu qalyp, bıreu ozady. Aqyldasa kele, «MuzArt» müşelerı 16 jıgıttı kelesı ainalymǧa şaqyrdy. Jarys bıtken soŋ, Säken Maiǧazievtı sözge tartqan edık.
– Baiqaudyŋ ırıkteu turyn elordadan bastadyŋyzdar. Jalpy, alǧan äserlerıŋız, tüigen oilaryŋyz qandai?
– Barlyǧy biık deŋgeide öttı. Rizamyz. Negızı, Qazaqstan boiynşa 5 ırı aimaqty taŋdap alǧanbyz. Kışıgırım öŋırlerge baryp uaqyt joǧaltqanşa, bır ortalyqqa jinaǧandy jön kördık. Mäselen, Türkıstan, Kentau jerındegıler Şymkenttegı ırıkteuge keledı. Öskemen, Aiagözdegı ümıtkerlerdıŋ basy Semeide toǧysady. Al Astana men Almaty qalalary milliondaǧan tūrǧyny bar ırı megapolis qoi. Sondyqtan būl ekı şaharǧa jeke aialdadyq. Äuelı elordaǧa at basyn tırep otyrmyz. Qatysuşylardyŋ ynta-yqylasyna taŋǧaldyq. Bas qalanyŋ tükpır-tükpırınen nebır daryndy azamattar qatysty.
– Önerlı ınılerıŋız köp pe eken?
– İä. Aralarynda būrynnan osyndai baiqaularǧa qatysyp, halyqqa tanylyp jürgen jıgıtter bar. Kımnıŋ baǧy qaşan janaryn Alla bıledı ǧoi. Mümkın däl osy joba bıreuınıŋ baǧyn aşqaly tūrǧan şyǧar.
– Ümıtkerler köbınese qandai janrdaǧy änderdı oryndady?
– Osy tūsta quanǧanymyzdy aita keteiın. Jastarymyz jan-jaqty. Dästürlı ändı de, popty da, tıptı, auyr rokty da keremet oryndai alatyndaryn körsettı. Qai baǧytta än sal deseŋ de, tosylmaidy. Kıleŋ «sen tūr, men ataiynnyŋ» naǧyz özı. Basym bölıgı bızdıŋ tabiǧatymyzǧa jaqyn lirikalyq änderdı taŋdapty.
Säken Maiǧaziev:
– Jastarymyz jan-jaqty. Dästürlı ändı de, popty da, tıptı, auyr rokty da keremet oryndai alatyndaryn körsettı. Qai baǧytta än sal deseŋ de, tosylmaidy. Kıleŋ «sen tūr, men ataiynnyŋ» naǧyz özı. Basym bölıgı bızdıŋ tabiǧatymyzǧa jaqyn lirikalyq änderdı taŋdapty.
JIGITKE JETI ÖNER DE AZ
– Taǧy qandai erekşelıkterıne nazar audardyŋyzdar?
– Bız qatysuşylardyŋ bige ikemdılıgın de eskerdık. Öitkenı, sahna degenımız – qiyn öner. Onda tek än sala bılu jetkılıksız. Özıŋdı jūrt aldynda ūstauyŋ, qimyl-qozǧalysyŋ, jürıs-tūrysyŋ – bärı-bärı maŋyzdy. Mūnymen qosa, jıgıtterdıŋ muzykalyq aspapta oinau şeberlıgın de synadyq. Dombyramen än aitqandardy joǧary baǧaladyq. Būl qabılet änşıge eşqaşan artyqtyq etpeidı.
– Jarys barysynda sızderdı qynjyltqan sätter boldy ma?
– Nesın jasyraiyn, ondai jaitpen de jolyqtyq. Atyn atap, tüsın tüstep aitpai-aq qoiaiyn, bıraq kei qaladan bırdı-ekılı ǧana adam qatysty. Osyndaida jastardyŋ selqostyǧyna, beiqamdyǧyna qarnyŋ aşady. Būiyrsa, aldaǧy uaqytta Almaty, Şymkent, Atyrau jäne Semeidı aralaimyz. Jūrtşylyqtyŋ belsendılıgın sonda baiqaimyz, – dep aǧynan aqtaryldy änşı.
Ekınşı kezeŋ qorytyndylanǧannan keiın ädıl qazylar alqasy üşınşı turǧa joldama alǧan 60 jüldegerdıŋ esımın jariialaidy. Olar ūlttyq muzykalyq jobanyŋ teletüsırılımıne qatysady. Būl kezeŋ barysynda saiyskerler stil, imidj, repertuar, horeografiia salasy boiynşa ūiymdastyru komitetınen keŋes alady. Aqtyq synda 6 adam baq synaidy. Bas jüldenı enşılegen jeŋımpazdardan top qūrylyp, şyǧarmaşylyq ortaǧa sıŋısuıne qoldau körsetıledı. Osy tūǧyrǧa talpynǧan barlyq önerpazdarǧa bız de sättılık tıleimız.
Botagöz MARATQYZY
