Nazarbaev universitetınde «Jastar. Energiia. İnnovasiia» forumy öttı

Jiynǧa Astana qalasy äkımınıŋ orynbasary  Ermek Amanşaev qatysyp, söz söiledı. 

Sondai-aq, forumǧa QR Parla­ment Mäjılısınıŋ deputaty Gennadii Şipovskih, qalalyq mäs­lihat deputaty Ashat Oralov, «Qazaq aruy – 2016» bai­­qauy­nyŋ bas jüldegerı Almira Ahatova jäne bas­qalary qatysty. Forumdy «Nūr Otan» partiia­synyŋ «Jas Otan» Jastar qanaty qalalyq äkımdıkpen bır­lesıp ūiymdastyrǧan bolatyn.
Forum bastalmas būryn kelgen qonaqtar universitettıŋ ülken dälızıne qoiylǧan jastardyŋ qoldan jasaǧan şyǧarmaşylyq, önertapqyştyq būiymdaryn tamaşalady. Mäselen, L.Gu­mi­lev atyndaǧy EŪU-nıŋ fi­zika ǧylym­darynyŋ doktory Däurenbek Äzenūly özınıŋ stu­dentı jasa­ǧan gelio qon­dyr­ǧynyŋ negızgı artyq­şy­lyqtary jaily aityp berdı. Özderı oilap tapqan būl qondyrǧy kün energiiasyn paidalana otyryp, ülken ǧimarattardy jylu­men, ystyq sumen qamti alady eken. Ony JOO ǧimarattaryn jylytuǧa paidalansa, qarjylyq jaǧynan da, energiia ünemdeu jaǧynan da tiımdı.
Al №82 «Daryn» mamandan­dyrylǧan mektep-liseiınıŋ 10-synyp oquşysy Ashat Äbu­bäkırov «Kün säulesı arqyly jaryqtandyru qūrylǧysyn» oilap tapqan. Būl qūrylǧy kün säulelerın şaǧylystyru arqyly baspanany jaryqtandyra alady. Qondyrǧy kün közı bar kezde ǧana paidalanylady. Ashat özınıŋ jobasyna qyzyǧuşylyq tanytqandarǧa bolaşaqta ony odan ärı damytu joldary jaily da aityp berdı. Naqtyraq aitqanda ol künnıŋ jaryǧymen quattalyp, tüngı mezgılde de jaryq beretın qosymşa jabdyq jasau baǧytynda ızdenıp kör­mekşı. Sonda būl qūrylǧy kömegımen baspanany kündız de, tünde de kün jaryǧymen tegın jaryqtandyruǧa bolady.

Sondai-aq, osy mekteptıŋ 8-synyp oquşylary Erkebūlan Tūrǧanov pen Laura Temırǧa­lieva tabiǧattaǧy dybystan energiia alatyn qūrylǧy jasap şyǧarǧan. Osy qūrylǧynyŋ kömegımen bölmege osyndai köp adam jinalǧanda, onyŋ şuy­nan energiia quatyn alyp, bas­panadaǧy jaryq şamdardy jarqyratyp qoiuǧa bolady eken. Jas önertapqyştar būl jobalaryn aldaǧy jyly ötetın «EKSPO – 2017» körmesınde älemnıŋ belgılı ǧalymdarynyŋ nazaryna ūsynudy oilastyryp otyr.
– Jaŋa ǧana jastardyŋ köp­­tegen jobalarymen, krea­tivtı dünielerımen tanysyp şyqtym. Onyŋ bärı kökeige qonymdy, bolaşaq tırlıgımızge qajettı jobalar. Astana qalasy äkımdıgı şyǧarmaşyl jas­tarmen ünemı kezdesu ötkızıp tūrady. Mäselen, byltyrǧy ötken kezdesude osy Nazarbaev universitetınıŋ studentterı qalada «selfi» jasaityn oryn­dar jasaqtau jönınde ideia kötergen bolatyn. Sonyŋ näti­jesınde «Han şatyr» sauda-oiyn-sauyq ortalyǧy aldyn­daǧydai köp­tegen «selfi» jasaityn oryndar äzırlendı. Ondai jerlerde bır jyldyŋ ışın­de milliondaǧan «selfi» jasalǧan eken. Şy­ǧar­maşyl, önertapqyş jas­tar kündelıktı qala ömırıne, mädeni kelbetıne qajettı jobalar ūsynyp jatsa, bız osylaişa aqyldasyp jüzege asyruǧa tyrysamyz. Qalamyzdyŋ keleşegı kemel, ekonomikasy quatty boluy üşın jastardyŋ belsendılıgı, bäsekege qabılettılıgı qajet, otanşyl ruh pen qajyrly eŋbegı kerek. Resei jazuşysy Andrei Platonov: «Mensız Resei älı bütın emes» degen eken. Sol aitqandai, sız­derdıŋ ärqaisylaryŋyzdyŋ As­ta­nanyŋ ruhani-mädeni ömı­rındegı oryndaryŋyz bölek, bä­rıŋızdı osy qoǧamnyŋ jūmy­syna belsendı qatysuǧa şaqy­ramyn! İnnovasiialyq kemel şeşım­derge negızdelgen jobalardy bız qaşan da qoldauǧa äzırmız! – dedı qala äkımınıŋ orynbasary Ermek Amanşaev.
Būdan soŋ söz kezegın alǧan QR Parlament Mäjılısınıŋ deputaty Gennadii Şipovskih, qalalyq mäslihat deputaty Ashat Oralov jastardy alda kele jatqan Ata Zaŋymyzdyŋ merekesımen, Täuelsızdıgımızdıŋ 25 jyldy­ǧymen qūttyqtady. Odan soŋ qazırgı kezdegı innovasiialyq bılımnıŋ maŋyzdylyǧyna toq­talyp, jastardy bırlıkpen tabysqa ūmtyluǧa şaqyrdy.
Al «Astana jastary» jas­tar resurstyq ortalyǧynyŋ jetekşısı Änuar Nūrpeiısov söz kezegı tigende özgeşe bır mäselenı ortaǧa tastady. Onyŋ aituynşa, bügınde elordada türlı salanyŋ jastary bas qosyp, qala ömırıne qatysty jobalardy jäne basqa mäselelerdı talqylaityn arnaiy oryn joq eken. Mä­selen, Oŋtüstık Koreiadaǧy Seul qalasynda būrynǧy auruhana qaita jabdyqtalyp, jas­tar bas qosatyn ülken orynǧa ainalǧan. Mūnda türlı treningter ötedı, keibır maŋyzdy jobalardy talqylaityn oryndar da jabdyqtalǧan. Sondai-aq Mäskeu, Sankt-Peterburg siiaqty qalalarda da osyndai oryndar bar. Būlardyŋ köp­şılıgı 100 şarşy metr jerdı volonterlerdıŋ basyn qosu, treningter ötkızu jäne taǧy basqa qajettılıkterge tiımdı
paidalanyp otyr. Tegın «Wi-Fi» jelısıne qosylǧan.
– Bızdıŋ elordada osyndai jastar ortalyǧyn aşuǧa laiyq oryn bar ma? Bız qalanyŋ bıraz jerın aralap şyqqanbyz, sonda «Nūrsaia-2» tūrǧyn üi keşenınıŋ tömengı qabatynda 500 şarşy metr baspana paidalanylmai jatqanyn anyqtadyq. Ol qalalyq tūrǧyn üi-kommu­naldyq şarua­şylyǧynyŋ balansynda eken, – dep sözın tämamdady Ä.Nūrpeisov.
– Negızı «Astana jastary» resurstyq ortalyǧyna äkımdık arnaiy tapsyrys bergen edı. Olardyŋ būl ūsynysyn taiau uaqyttarda qarap, şeşetın bolamyz, – dep jauap berdı būǧan qala äkımınıŋ orynbasary Ermek Amanşaev.
Forumnyŋ soŋynda el Täuel­sız­dıgınıŋ 25 jyldyǧyna orai jäne Rio-de-Janeirodaǧy olim­piada oiyndarynyŋ jeŋım­paz­dary men jüldegerlerın qūr­metteu maqsatynda avto-moto şeru ötkızıldı.

Meŋdolla ŞAMŪRATOV