Elımızde «Biznestıŋ jol kartasy – 2020» biznestı qoldau jäne damytudyŋ bıryŋǧai baǧdarlamasy boiynşa qarjylandyruǧa ötınışter qabyldana bastady. Baǧdarlama aiasynda qarjylai qoldaudyŋ negızgı baǧyty retınde şaǧyn käsıpkerlıkke nesie beru tetıkterı qarastyrylǧan.
«Auyl şaruaşylyǧyn qarjylai qoldau qory» AQ Basqarma töraǧasynyŋ orynbasary Almas Taubaevtyŋ aituynşa, būl nesieleu baǧdarlamasy Qazaqstannyŋ barlyq oblystarynda jüzege asyrylady. Bölıngen qarjy monoqalalar, şaǧyn qalalar, auyldyq eldı-mekenderdegı şaǧyn qarjy ūiymdaryn nesieleuge baǧyttalady. «Nesieleu baǧdarlamasynyŋ talaptaryna säikes, qaryzdar biznes jobalaryn jüzege asyryp jatqan nemese asyrudy josparlaǧan käsıpkerlerge baǧyttalady. Baǧdarlamanyŋ maqsaty – aimaqtyq käsıpkerlıktıŋ tūraqty ösuın jäne jaŋa jūmys oryndaryn aşudy qamtamasyz etu. Būl baǧytta biudjetten 2 mlrd 647 mln teŋge bölındı. 2017-2018 jyldary da osy kölemde qarjylandyru josparlanǧan» deidı ol. Tüpkı qaryz aluşylarǧa berıletın şaǧyn nesieler – öz ısın ūiymdastyru nemese keŋeitu jäne ainalymdaǧy kapitaldy salalyq şekteusız tolyqtyruǧa jūmsalmaq.
Nesienıŋ eŋ joǧary somasy – 350 mln teŋge. Şaǧyn qarjy ūiymy üşın bekıtılgen syiaqy üstemesı – 4 paiyz. Al tüpkı qaryz aluşylar üşın nominaldy üsteme körsetkışı 12 paiyzdan aspaidy. Nesienı öteu merzımı 54 aiǧa deiıngı uaqytty qamtityn bolady.
Jalpy, 2006 jyldan berı «Auyl şaruaşylyǧyn qarjylai qoldau qory» AQ şaǧyn nesie (şaǧyn qarjy) ūiymdaryn qoldauǧa 10 mlrd 226 mln teŋge böldı. Būl qarjydan tüpkı qaryz aluşylarǧa 23 myŋǧa juyq şaǧyn nesie berıldı.
Bürkıt NŪRASYL
