Astana qalasynda auyl sporty nūsqauşylarynyŋ respublikalyq konferensiiasy öttı. Būl basqosuda el öŋırlerınde auyl sportynyŋ problemasy men özektı mäselelerı talqylandy.
Konferensiiany aşqan Mädeniet jäne sport ministrı Däuren Abaev Ūlyqtau saltanatynda Qasym-Jomart Toqaev auyldy damytu mäselesı turaly Jarlyqqa qol qoiǧanyn, osymen sabaqtasqan auyl sport nūsqauşylarynyŋ respublikalyq bırınşı konferensiiasynyŋ maŋyzyna toqtaldy.
– Daŋqty sportşylar Äljan Jarmūhamedov, Ǧūsman Qosanov, Ämin Tūiaqov, Äbılseiıt Aihanov, Äbdısalan Nūrmahanov, Jaqsylyq Üşkempırov, Däulet Tūrlyqanov, Ermahan İbraiymov, Bolat Jūmadılov, Baqtiiar Artaev, Eldos Smet jäne t. b. kındıgı auylda kesıldı. Aldymyzda eldı mekenderden chempion ruhty sportşylardy şyǧaru dästürın jalǧastyru mındetı tūr.
Bügınde auyldy jerlerde 4114 jattyqtyruşy jūmys ısteidı. Būl mamandardyŋ qol astynda 300 myŋnan astam adam jattyǧady. Būǧan 3065 sport nūsqauşysyn qosu kerek. Būlardyŋ ärqaisysy orta eseppen 50 adamnan sportqa tartsa, 150 myŋnan asa auyl tūrǧyny dene şynyqtyrumen şūǧyldanady degen söz.
Öŋırlerdegı on üş sport internatyna, sport mektepterıne talapkerler, negızınen, auyldardan barady. Osylardyŋ arasynan keleşekte Olimpiada jäne älem chempiony şyǧatynyna senemın, – dedı ministr.
1991-2022 jyldar aralyǧynda ötken Olimpiada oiyny men älem chempionatynda jülde alǧannyŋ 52 paiyzy – auylda tuǧandar. Al 28 paiyzy qalalyqtar bolsa, 9 paiyzy – legionerler
1991-2022 jyldar aralyǧynda ötken Olimpiada oiyny men älem chempionatynda jülde alǧannyŋ 52 paiyzy – auylda tuǧandar. Al 28 paiyzy qalalyqtar bolsa, 9 paiyzy – legionerler.
Balalar jäne jasöspırımder sport mektepterınde 257 myŋnan asa bala sportpen şūǧyldansa, balalar men jasöspırımderdıŋ dene şynyqtyru sport klubynda – 15322, jasöspırımder klubynda 40578 oquşy türlı sport türı boiynşa jattyǧady.
Dene şynyqtyru jäne sport boiynşa respublikalyq oqu-ädıstemelık jäne taldau ortalyǧynyŋ direktory Qydyrbek Rysbek salanyŋ negızgı mäselelerın ortaǧa saldy.
– El boiynşa auyldy jerlerde 3065 sport nūsqauşy jūmys ıstese, onyŋ 1708-ı ǧana joǧary bılımdı. 728-ınde diplomy joq. Eger auyl sportyn köteremız desek, bılıktı, bılımdı mamandardy auyldy jerlerge tartu maŋyzdy. Sport nūsqauşylarynyŋ alatyn jalaqysy är öŋırde ärkelkı. Bügıngı naryq baǧamymen tym tömen jalaqy alatyndary da bar. Osy mäselenı şeşu maŋyzdy dep sanaimyz, – dedı ortalyq basşysy.
Aldaǧy uaqytta ortalyq auyl bapkerı men nūsqauşylarynyŋ käsıbi deŋgeiın saraptap, olardyŋ bılıktılıgın arttyru jolynda seminarlar ūiymdastyrady. Kadrlardyŋ bılıktılıgın arttyru – maŋyzdy mındet. Būl baǧytta bırınşı olardyŋ jalaqysyn jüieleu kerek-aq.
– Aqtöbe oblysynda nūsqauşylardyŋ jalaqysy audandyq sport bölımı men sport mektepterı arqyly berıledı. Almaty, Jetısu, Jambyl, Pavlodar, t. b. oblysta sport nūsqauşylary üşın sporttyq-būqaralyq ıs-şara ortalyǧy jūmys ısteidı. Būl öŋırlerde sport mamandarynyŋ jalaqysy bapkerler men ädıskerler tärızdı tūraqty berıledı. Qyzylorda oblysynda būl jūmysty sport bölımı memlekettık tapsyrys negızınde şeşedı. Jylda aqpan aiynda konkurs ūiymdastyrylyp, nauryzdyŋ soŋyna qarai jeŋımpaz atanǧan qoǧamdyq bırlestık anyqtalady. Iаǧni sport nūsqauşysy bırınşı toqsanda jalaqy almai jūmys ısteidı. Qysqasy, nūsqauşylardyŋ jalaqysyn respublika boiynşa bır jüiege keltıru kerek, – dep negızgı mäselenıŋ bırın köterdı Qydyrbek Rysbek.
Konferensiia barysynda auyl sportyn köterude bırqatar olqylyq aityldy. Sonyŋ bırı – auyl sportşylarynyŋ jarysqa baruyna qarjy qaralmaidy. Nūsqauşylarǧa tūrǧyndarmen bırge jylyna 10-20 ıs-şara ūiymdastyru jäne qatysu jüktelse, eŋ qiyny köp jerlerde auyl sportşylary turnirge baratyn qarajaty qaralmaidy. Sonyŋ saldarynan nūsqauşylar öz jalaqysynyŋ esebınen auyldastaryn jarysqa aparady. Būl sporttyŋ jappai būqaralyq sipat aluyna kedergı keltıredı. Öz kezegınde, jarys körıp, özınıŋ babyn teksermegen sportşy öse almaityny belgılı.
Sosyn nūsqauşylar sport mektebınıŋ jattyqtyruşylary tärızdı jeŋımpaz şäkırt baptaǧany üşın üstemeaqy ala almaidy. Joǧary atqaruşy organ bekıtken nemese konkurstaǧy qarajat kölemıne qarai bölıngen eŋbekaqyny qanaǧat tūtady. Al olardyŋ jalaqysy az bolǧan saiyn jūmys sapasy da tömen bolatyny aqiqat.
Mıne, konferensiiada osyndai auqymdy mäseleler köterılıp, olardyŋ şeşılu joly talqylandy. Aldaǧy uaqytta auyl sportyn köteru baǧytynda qajettılıkter öz şeşımın tabatynyna senemız.
Alqaly basqosudyŋ aiaǧy üzdıkterdı marapattaumen jalǧasyp, Jaŋaqorǧan audany sport bölımınıŋ basşysy Mahmūt Raqymjanov pen Jetısu oblysy Tūrpan auylynyŋ käsıpkerı Jalǧas Altynbekovke salalyq ministrlıktıŋ «Qūrmettı sport qyzmetkerı» tösbelgısı tabystaldy. Türkıstan oblysy Şardara audany qol küresı kluby direktorynyŋ orynbasary Maǧjan Şämiev ministrlıktıŋ «Qūrmet gramotasymen», Aqtöbe oblysy Baiǧanin audanynyŋ jüzu bapkerı Astam Baǧandyqov «Alǧys hatpen» marapattaldy.
