Qazır jer-jerde Ūly Jeŋıstıŋ 70 jyldyǧyna bailanysty türlı şaralar ötıp jatyr. Būdan kündelıktı özım jazdyryp oqityn «Astana aqşamy» gazetı de qalys qalmai otyr. Sonyŋ bır dälelı – «Ūly Jeŋıske – 70 jyl» aidarymen berılıp jatqan maqalalar legı. Men de ardager Mūhamedjan atam turaly jazbaqqa qolyma qalam aldym.
Menıŋ naǧaşy atam Mūhamedjan Omarov Ūly Otan soǧysyna bastan aiaq qatysqan. Ekınşı Belorussiia maidanynda bolǧan.
«Berlinge 100 şaqyrym qalǧanda sūm faşisterdı jeŋdık degen quanyşty habar keldı. Ol aq tüienıŋ qarny jarylǧan kün edı. Adam quanyştan da jylaitynyn sonda kördım. Bes jyl oq pen ottyŋ ortasynda jürgen, nebır auyr künderdı ötkızgen kez artta qaldy. Äiteuır, qūdai qoldap, elge aman-esen oraldyq qoi» dep bastaityn äŋgımesın maidanger atam.
Ol soǧysqa deiın öz auylynyŋ qyzy Tazagül Begıbaiqyzymen bas qūraidy. Ekeuı ekı ūl, bır qyz süiedı. Atam 1995 jyly 91 jasqa kelıp, dünieden öttı. Ol kısınıŋ aldynda ülken ūly Jūmabaidyŋ jary Baǧdat qaitady. Būl jaǧdai qart adamǧa auyr soqqy boldy. Öitkenı, olardyŋ bes balasynyŋ eşqaisysy da älı aiaqtanbaǧan edı. Odan keiın Jūmabai men ekınşı ūly Qabdyrahim alpysqa jetpei, jürek dertınen köz jūmady. Bügınde olardyŋ balalary är salada qyzmet atqarady. Jalǧyz qyzy Gauhar Astana qalasynda tūrady.
Atam soǧystan kelgennen keiın sol kezdegı Selinograd qalasyndaǧy №1 ūn tartu kombinatynda şirek ǧasyrdan astam eŋbek ettı. Tabysty jūmys atqaryp, zeinet jasyna jetkende demalysqa şyqty. Alǧan maqtau qaǧazdary men marapattary jetkılıktı. Atamnyŋ qyzy, menıŋ anam Gauhar balalary men nemerelerıne äkesınıŋ, iaǧni, menıŋ naǧaşy atamnyŋ qandai adam bolǧandyǧyn ünemı aityp otyrady.
Qaşanda bıreuge jaqsylyq jasaǧysy kelıp tūratyn maidanger atamnyŋ nemeresı bolǧanymdy maqtan tūtamyn.
Asylhan Äbıldinov
