Bas qalada jasöspırımder men studentterge arnalǧan tegın kovorking ortalyǧy aşyldy.
Keŋıstık 11 jyldan berı jūmys ıstep kele jatqan «Zamandas» otbasylyq aula klubynyŋ negızınde qūryldy. Kovorking-ortalyqta bılım aluǧa, özge jastarmen qarym-qatynas jasap, pıkır almasuǧa jäne şyǧarmaşylyq damuǧa qolaily orta jasalǧan. Mūnda jazuşylarmen, aqyndarmen, qoǧam qairatkerlerımen kezdesuler, psihologpen konsultasiialar ūiymdastyrylyp tūrady, sondai-aq bolaşaqta balalar men jasöspırımderge käsıpkerlık sabaqtaryn ötkızu josparlanyp otyr.
Kovorking-ortalyqtyŋ qūryluyna «Samruk-Kazyna Trust» äleumettık jobalardy damytu qory demeuşılık jasaǧan.
«Bız «Zamandas» qoǧamdyq qorynyŋ jūmysyna 2013 jyldan berı qoldau körsetıp kelemız. Olarmen bırge köp balanyŋ ömırın özgertken ülken joldan öttık. Jaqynda Nūr-Sūltanda altynşy aula klubyn aştyq. Endı onda 2700-den astam bala bos uaqytyn ötkıze alady. Oquşylar ortalyqta art-terapiia, horeografiia, şahmat, karate, dombyra, toǧyzqūmalaq, aǧylşyn tılı siiaqty 30-dan astam üiırmege qatysa alady» dep atap öttı «Samruk-Kazyna Trust» qory bas direktorynyŋ orynbasary Serǧoja Qaliasqarov.
Kovorking-ortalyqtyŋ är būryşyndaǧy sörelerde kıtaptar samsap tūr. Mūnda tynyǧu bölmesı de bar. Kovorking-ortalyqqa 15 jastan asqan jasöspırımder men jastar qatysa alady. Ortalyqqa kelu üşın 8 (701) 516 15 25 nömırı boiynşa aldyn ala jazylu qajet.
