Memleket basşysy «Otar» 40-şy äskeri bazasyna kelgennen keiın oǧan parad qolbasşysy – Qazaqstan Respublikasynyŋ Qaruly Küşterı Qūrlyq äskerlerınıŋ bas qolbasşysy, general-maior Mūrat Bektanov äskeri paradty ötkızuge jäne aumaqtyq äskerler qūramalaryna jauyngerlık tulardy tapsyru räsımıne daiyn ekendıgı jönınde baiandady.
Qazaqstan Prezidentı ardagerlerge, sarbazdar men ofiserlerge arnalǧan sözınde Qaruly Küşter qauıpsızdıgımızdıŋ basty kepılı, Otanymyzdyŋ beibıt ömırı men egemendıgımızdıŋ berık tıregı bolyp sanalatynyn atap öttı.
– Qazaqstannyŋ äskeri qyzmetşılerı – barlyq däuırdıŋ tarihyndaǧy eŋ sūrapyl soǧysta faşizmdı jeŋgen batyr babalarymyzdyŋ jauyngerlık erlıkterı men daŋqyn jalǧastyratyn laiyqty ūrpaq. Bız olardyŋ tuǧan jerımızdıŋ örkendeuı men beibıt ömırımızdı saqtau üşın körsetken közsız batyrlyǧy men öşpes erlıgın ärdaiym jadymyzda saqtaimyz, – dedı Nūrsūltan Nazarbaev.
Memleket basşysy elımızdıŋ däiektı ärı beibıtsüigış saiasat jürgızıp otyrǧanyn atap öttı. Būl oraida Qazaqstan äskerı täuelsızdıgımızdı küzetıp, Ūjymdyq qauıpsızdık şart ūiymy aiasynda ūjymdyq qauıpsızdıktı qamtamasyz etuge tabysty atsalysyp jatyr, sondai-aq Bırıkken Ūlttar Ūiymy şeŋberınde maŋyzdy bıtımgerşılık funksiialardy laiyqty atqaryp keledı.
Elbasy memleket tarapynan armiiamyzǧa meilınşe qoldau körsetılıp, onyŋ äleuetın nyǧaituǧa zor män berıletının, Qazaqstan 2030 jylǧa qarai zamanaui, mobildı ärı joǧary käsıbi armiia jasaqtau jönınde maqsat qoiyp otyrǧanyn atap öttı.
– Būl üşın 2020 jyldan bastap qorǧanys salasyna qajettı qarajat bölınetın bolady. Qauıpsızdıkke tönetın jaŋa syn-qaterlerge orai tiımdı äreket etu üşın Arnaiy operasiialardyŋ joǧary mobildı küşterı men Aumaqtyq äskerler qūrylyp, qorǧanys jüiesıne bırıktırıldı. Jaŋa bölımder bügın tabys etılgen jauyngerlık tulardy laiyqty alyp jüretınıne senımdımın, – dedı Qazaqstan Prezidentı.
Aumaqtyq qorǧanys brigadalarynyŋ jauyngerlık tularyn oblystardyŋ, Astana jäne Almaty qalalarynyŋ äkımderıne tapsyru räsımınen keiın Arnauly operasiialar küşterınıŋ, Memlekettık küzet qyzmetınıŋ, Ūlttyq ūlannyŋ, Äskeri-teŋız küşterınıŋ arnauly maqsattaǧy otriadynyŋ, sondai-aq, aumaqtyq äskerlerdıŋ äskeri qyzmetşılerınıŋ şeruge qatysuşy qūramdary sap tüzep öttı.
Zaŋsyz qaruly qūrylymdardyŋ şartty bazasyn joiu jönındegı taktikalyq epizodtardy oryndau barysynda «Tochka-U» taktikalyq zymyran keşenı, «Grad» jäne «Prima» dürkındetıp otşaşu zymyran jüiesı, MSTA-B jäne D-30 zeŋbırekterı, «Solnsepek» auyr otşaşqyş zymyran jüiesı, «Şturm-S» tankıge qarsy zymyran keşenı jäne Raketa äskerlerı men artilleriianyŋ basqa da qaru türlerınıŋ mümkındıkterı körsetıldı. Qūrlyq äskerlerı jäne Äue qorǧanysy küşterınıŋ äskerlerı zymyran atyp, bomba laqtyrdy, sondai-aq barlyq qaru türınen oq atty. Äskeri-äue küşterınıŋ maidandyq jäne äskeri aviasiiasynyŋ ūşaqtary men tıkūşaqtary aspanda äue şaiqasyn körsettı. «Jetısu Barysy» ūşqyştar toby joǧary deŋgeide şeberlık tanytty.
Äskeri paradqa 3 myŋǧa juyq jauynger qatysyp, 300 äskeri tehnika men qaru-jaraq, 40 ūşu apparaty jūmyldyryldy.
Soŋynda Memleket basşysy äskeri tehnika men qaru-jaraqtyŋ zamanaui ülgılerımen tanysty, sondai-aq dalalyq jerdegı ūrysta körsetken şeberlıkterı, oq atu sätındegı mergendıkterı jäne jauyngerlık daiyndyqtary üşın paradqa qatysuşylardyŋ bärıne alǧys bıldırdı.
– Äskeri parad sızderdıŋ jauyngerlık şeberlık deŋgeilerıŋızdı jäne daladaǧy jattyǧularǧa beiımdelgenderıŋızdı naqty körsettı. Parad Qazaqstan Respublikasy Qaruly Küşterınıŋ jauyngerlık daiyndyǧy men käsıbilık deŋgeiınıŋ odan ärı arta tüsuıne septıgın tigızedı dep senemın. Barşaŋyzdy Otan qorǧauşy künımen jäne Jeŋıs künımen qūttyqtaimyn, – dedı Nūrsūltan Nazarbaev.
www.akorda.kz
