Polisiia starşinasy Nikolai Jgun qazaq tılınde qatyryp söileidı. Qolǧa tüsken būzaqylar özderın ūstaǧan poliseige degen narazylyǧyn qazaqşalap soǧyp jatqanda, orta joldan äŋgımege Jgun qosylady. Osylai, talai qylmyskerdıŋ auzyn japqany bar.
«Özge ūltty körsek boldy, orysşa söileitın ädetımız emes pe? Nikolaidyŋ qazaqşaǧa sudai ekenın esten şyǧaryp, oǧan da orysşa söilep ketemız. Al ol qazaqşa jauap berıp, adamdy ūialtyp tastaidy» deidı qazaq ärıptesterı.
Nikolai Qazaqstanda tūryp jatqan kez kelgen azamat ūltyna qaramai memlekettık tıldı bıluı mındet dep esepteidı. Özı Aqmola oblysy, Qorǧaljyn audanynda oquşy bolyp jürgende, qazaqşa üirenuge den qoia bastapty. Qazaqtyŋ qara domalaqtarymen bırge oinap, söilesıp jürgen ol bır-bırte tıldık qoryn köbeite bastaidy. Abai öleŋderın dauystap oqyp, tılın ūstarta tüsedı. Onymen qoimai, jergılıktı halyqtyŋ salt-dästürımen de etene tanysa bastaidy. Osylaişa, ainaldyrǧan bırneşe jyldyŋ ışınde belarus ūltynyŋ ökılı qazaq tılın meŋgerıp şyǧady.
– Köptegen zamandastarym qazaq tılın üirenudı qiynsynady. Olarǧa aitarym, qazaqşa üirenudıŋ eşqandai qiyndyǧy joq, tek ynta-yqylas bolsa jetkılıktı. Qazır bız özge ūlt ökılderınıŋ qazaqşa söilegenıne emes, kerısınşe, söilemegenıne taŋ qaluymyz kerek. Tıldı üirenetın uaqyt jettı. Bolaşaǧyn Qazaqstanmen bailanystyrǧysy kelgen ärbır azamat memlekettık tıldı meŋgeruge tiıs, – deidı Nikolai.
Astana qalasy IID «Saryarqa» audandyq IIB poliseiı jan jaryn da qazaq qyzdarynyŋ ışınen taŋdapty. Jūbaiy Janna da qūqyq qorǧau organynda jūmys ısteidı. Ekeuı İslam, İlana jäne İmran atty tättı baldyrǧandardy tärbielep otyr. Aitpaqşy, ekı ülkenı qazaq balabaqşasyna barady.
Qazaqstan halqynyŋ bırlıgı künı – Nikolai men Jannanyŋ süiıktı merekelerınıŋ bırı. Osy künı būl şaŋyraqta qazaqtyŋ qazysy asylyp, dastarqanǧa belarus halqynyŋ qytyrlaq kartoşkasy qoiylady. Jylylyq ūialaǧan otbasynyŋ tılegı de bır: elımızde tynyştyq pen beibıtşılık bolsyn deidı.
Qymbat NŪRǦALİ
