Qai qyzmette bolmasyn halyqtyŋ senımı maŋyzdy

Nūr-Sūltan qalasyna äue kölıgımen eldıŋ tükpır-tükpırınen, älemnıŋ är qiyrynan keletınderdıŋ tabany äuelı elorda äuejaiyna tiedı. Bız ünemı aitatyn turizm salasyn laiyqty infraqūrylymmen qamtamasyz etu degenıŋız däl osy tūstan bastalady. Ärı-berıden soŋ täulık boiy aptanyŋ kez kelgen künınde tynym tappaityn äuejai qyzmetınsız qala tırşılıgın közge elestetu mümkın emes.

Ekı jyldan berı elordanyŋ basty äue qaqpasyna aviasiia salasynyŋ bılıktı mamany Ǧabit Täjımūratov jetekşılık jasaidy. Äuejai basşylyǧymen qosa osy jyldyŋ basynda Nūr-Sūltan qalalyq mäslihatynyŋ deputaty bolyp sailanǧan Ǧabit TÄJIMŪRATOVPEN elordalyq äuejaidyŋ tynys-tırşılıgı, deputat qyzmetınıŋ barysy turaly äŋgıme örbıtken edık.

– Ǧabit Qaliūly, qazır elorda men bırge tūtas elımızdıŋ bet-beinesı sanalatyn Nūrsūltan Nazarbaev halyq­aralyq äuejaiynyŋ basşylyǧyna kelgenge deiın qyzmettıŋ barlyq satysynan öttıŋız. Qatardaǧy mamannan basqarma töraǧalyǧyna deiıngı jürıp ötken eŋbek jolyŋyz turaly  aityp berseŋız…

– Men mekteptı üzdık aiaqtaǧan soŋ Mäskeu Azamattyq aviasiia memlekettık tehnikalyq universitetıne tüstım. Bızdıŋ studenttık şaǧymyz 90-jyldardaǧy alasapyran kezeŋmen tūspa-tūs keldı. Sondyqtan jalǧyz şäkırtaqymen küneltu qiyn bolǧandyqtan, Mäskeude jürıp qarapaiym jūmysşy, köşe tazalauşy bolyp aqşa tabuǧa tura keldı. Joǧary bılım alǧan soŋ, eŋbek jolymdy Memlekettık aviasiialyq registrınde äue kemelerın paidalanuşylaryn sertifikattau bölımınıŋ jetekşı sarapşysy bolyp bastadym. Keiın «Qazaviasertifikasiia» JAQ-da bas sarapşy, bölım basşysy, Kölık jäne kommunikasiia ministrlıgınıŋ Zaŋ departamentınde bas mamany boldym. Ministrlıkte jürgen Qazaqstannyŋ äue salasyn retteudegı bırınşı zaŋ jobasyn daiyndauǧa belsendı qatys­tym. Azamattyq aviasiia komitetınıŋ äue kompaniialar qyzmetın retteu bölımınde qyzmet atqardym, sonymen qatar är jyldary QR Prezidentınıŋ Is basqarmasy Resmi ıs-şaralar jäne syrtqy bailanystar bölımınıŋ kölıktık qamtamasyz etu sektorynyŋ meŋgeruşısı, «Airport Management Group» JŞS Bas direktorynyŋ orynbasary syndy qyzmetterde boldym.

2015-2019 jyldar aralyǧynda Nūrsūltan Nazarbaev halyqaralyq äuejaiynyŋ basqaruşy direktory, basqarma töraǧasynyŋ orynbasary qyzmetterın atqardym. Al 2019 jyldyŋ jeltoqsanynda maǧan Nūrsūltan Nazarbaev halyqaralyq äuejaiynyŋ basqarma töraǧasy qyzmetın senıp tapsyrdy. Ärine, būl qyzmetke taǧaiyn­dau maǧan ülken senım artylǧanynyŋ belgısı dep bılemın. Odan keiıngısı özderıŋızge mälım. Basqa salalarmen bırge aviasiia salasy da pandemiia kezınde öz qyzmetın toqtatyp, jūmys bäseŋdedı.

– Karantin kezındegı jaǧdai äue­jai qyzmetıne qanşalyqty äser ettı? Pandemiia kezınde äue reisterı toqtap qaldy. Osy sätte sızderdıŋ jūmystaryŋyz qai baǧytta örbıdı?

–  Karantinge qaramastan bız  köptegen şyǧyndardy barynşa qysqartyp, jük tasymalymen ainalysatyn äue kompaniialarymen kelıssözder jürgızıp, äuejaidyŋ jūmysyn toqtatpauǧa tyrys­tyq. Äuejai ǧimaraty aumaǧyndaǧy köptegen käsıpkerlık nysandarǧa jeŋıldıkter jasaldy. Bır sözben aitqanda, pandemiia äue qatynastary salasynda oŋai soqqan joq. Äuejai ūjymynyŋ bırlıgı men sättı şeşımder arqyly būl qiyndyqty eŋserıp şyǧa aldyq. Kezdesken qiyndyqtarǧa qaramastan  äuejaidaǧy qyzmetkerler  qysqarmady.  Qazır  bızdıŋ äuejaidyŋ basşylyq qūramynda elımızdıŋ är aimaǧyndaǧy bes äuejaidy basqarǧan bılıktı mamandar qyzmet jasaidy.

Äuejaidyŋ jaŋa terminalyn salu jäne basqa da jobalardy ıske asyru maqsatynda nesie aluǧa da tura keldı. Ekı jyldan berı osy bereşegımızdı öteu boiynşa jūmys jürgızıp kelemız. Qandai jaǧdai bolmasyn bız jolauşylarǧa joǧary deŋgeide qyzmet körsetuge küş salamyz.

Äuejai basşylyǧyna kelgen uaqyt aralyǧynda nysannyŋ  syrtqy jäne ışkı kölık tūraǧynyŋ jaǧdaiyn jaqsartuǧa qol jetkızdık. Jolauşylarǧa  jükterın uaqytyly alu mümkındıgın berdık. Äuejai ǧimaratyndaǧy sauda oryndaryndaǧy tauarlardyŋ baǧasy retteldı. Qazır Nūrsūltan Nazarbaev äuejaiynyŋ jeke mobildı qosymşasy bar.

18 jyldan berı kürdelı jöndeu körmegen ūşu-qonu jolaǧy jöndelıp jatyr. Oǧan qosa biyl Nūrsūltan Nazarbaev halyqaralyq äuejaiy 90 jyldyq mereitoiyn toilauda. Merei­toi qarsaŋynda bırşama ıs-şaralar ötkızıldı. Äuejaidyŋ 2035 jylǧa deiıngı damu kartasy äzırlendı. Damu kartasyn ıske asyru boiynşa josparly türde jūmys jasap kelemız.

– Nūrsūltan Nazarbaev halyqaralyq äuejaiynyŋ basqarma töraǧalyǧymen bırge qalalyq mäslihattyŋ deputaty bolyp sailandyŋyz. Jergılıktı ökılettı organdaǧy qyzmetıŋız qalai jürıp jatyr?

– Ülken käsıporyndy basqaryp otyr­ǧandyqtan, halyqtyŋ mūŋ-mūqtajymen jete tanyspyn. Onyŋ ışındegı qoǧamdyq, äleumettık-ekonomikalyq mäseleler de maǧan taŋsyq emes. Mıne, däl osy mäseleler şeşımın tabuy üşın halyqtyŋ amanatyn arqalauǧa tura keldı.

Mäslihattaǧy qūrylys, ekologiia, kölık, sauda jäne tūrǧyn üi-kommunaldyq şaruaşylyq mäselelerı jönındegı tūraqty komissiia müşesımın. Atalǧan komissiia Qazaqstan Respublikasynyŋ Salyq kodeksıne säikes Nūr-Sūltan qalasy mäslihatynyŋ qarauyna engızıletın qūrylys, qalanyŋ bas qūrylys jospary, qorşaǧan ortany qorǧau jäne tabiǧat paidalanu, memlekettık tūrǧyn üi qoryn paidalanu, halyqqa kölıktık, sauda jäne tūrǧyn üi-kommunaldyq qyzmet körsetu mäselelerı, tölemaqy mölşerlemelerınıŋ jobalary boiynşa qorytyndylardy qaraidy. Jer zaŋnamasyna säikes jeŋıldıkter belgıleu, jer qatynastaryn retteu jönınde ūsynystar engızemız. Jasyl ekpelerdı kütıp-ūstau jäne qorǧau, Nūr-Sūltan qalasynyŋ aumaǧyn abattandyru mäselelerı boiynşa qaǧidalardy jäne būzǧany üşın äkımşılık jauapkerşılık közdelgen basqa da mındettı qaǧidalardy äzırleuge qatysady.

– Qalalyq mäslihat deputaty retınde halyqpen jiı kezdesıp tūrasyz. Säikesınşe elordadaǧy şeşımın kütken özektı mäselelermen de jaqsy tanys bolarsyz…

– Şyn mänınde ülken qalada ülkendı-kışılı qoǧamdyq, äleumettık mäseleler jetıp jatyr. Onyŋ ışınde kölık keptelısı, jaŋbyr suy aǧatyn qūbyrlardyŋ, mekteptıŋ tapşylyǧy, jol syndy mäselelerdı airyqşa atap ötuge bolady. Jeŋıl relstı kölık (LRT) joly qūrylysynyŋ tezırek aiaqtaluyn tūrǧyndar da ünemı talap etedı. Deputattar osy mäselelerdı tiıstı organdarǧa jetkızıp, barynşa tez şeşıluın baqylauǧa alady.

Qalalyq mäslihat deputaty retınde Prigorodnyi tūrǧyn alaby tūrǧyndarymen tyǧyz qarym-qatynasta bolyp, tıkelei jūmys jasap kelemın. Būl audanda äue qyzmetıne eŋbegı sıŋgen bırşama ardager tūrady. Sondyqtan da bolar, osy audan basqalardan erekşe ystyq körınedı.

Bos uaqytymda audandy jiı aralap, tynys-tırşılıgın közben körıp, tūrǧyndardyŋ şaǧymyn tyŋdap, qoldan kelgenşe kömek körsetıp tūramyn. Tūrǧyndardyŋ är ısıme yqylas bıldırıp, jıgerlendırıp otyratyndyǧy quantady. Bolaşaqta däl osy audannyŋ äl-auqatyn odan saiyn jaqsartyp, qalamyzdyŋ körıktı jerıne ainaldyru oiymyzda bar.

– Atalǧan alaptyŋ tūrǧyndary negızınen qandai mäselelerdı köteredı?

– Mūnda tūrǧyndar tarapynan köbıne auyzsu, jaryqtandyru jäne jol mäselelerı köterılıp jatady. Äsırese, jer üilerde tūratyn tūrǧyndarda türlı mäsele bar. Qalalyq mäslihattyŋ deputaty bolyp sailanǧan künnen bastap audannyŋ ışkı mäselelerımen tolyq tanysyp, ony şeşuge küş salyp jatyrmyn. Tūrǧyn alaptyŋ bırneşe köşelerıne äuejaidyŋ mümkındıgın paidalanyp asfalt tösep, jaryq jüielerın retke keltırdık.

– Deputattyq qyzmettıŋ negızgı bır baǧyty azamattardy jeke sūraqtarymen qabyldau ekendıgı mälım. Osy oraida sızdıŋ qabyldauyŋyzǧa jazylǧandardyŋ mäselesı qalai şeşılıp jatyr?

– Ärine, özektı mäselesın jetkızemın degen ärbır azamatty tyŋdauǧa daiynmyn. Memleket basşysy Qasym-Jomart Toqaev «Halyq ünıne qūlaq asatyn memleket» tūjyrymdamasyn ūsynǧany barşamyzǧa mälım. Sol sebepten qabyldauymda bolǧan ärbır azamattyŋ sūraǧyna jauap tabuǧa tyrysamyn. Osyǧan deiın de köptegen azamattardy qabyldap, mäselesın şeşıp berdık. Jūmyssyzdyq mäselesın köterıp kelgen azamattardyŋ denı jūmysqa ornalasty. Jaŋa oqu jyly qarsaŋynda balalar üiın mektepke kerektı jabdyqtarmen jäne noutbuktarmen qamtamasyz ettık.

Qysqasy, qai qyzmette bolmasyn halyqtyŋ senım jügın arqalau ärbır azamattyŋ paryzy dep bılemın. Elımızdıŋ barlyq perzentı osy ūstanymmen jürse, memleketımızdıŋ tūǧyry ärdaiym biık bolmaq.