Elorda äkımı İ.Tasmaǧambetovtyŋ qatysuymen ötken qalalyq mäslihattyŋ kezektı jiyrma segızınşı sessiiasynda Astana qalasynyŋ 2014-2016 jyldarǧa arnalǧan biudjetınıŋ jobasy naqtylandy.
Qalalyq Ekonomika jäne biudjettık josparlau basqarmasynyŋ basşysy Janat Nūrpeiısov Astana qalasy biudjetınıŋ bes jyldyq kezeŋıne arnalǧan äleumettık-ekonomikalyq damu boljamy «Qazaqstan Respublikasynyŋ biudjet turaly» kodeksıne säikes äzırlenıp, daiyndalǧanyn aita kele, onyŋ jobasyn deputattardyŋ nazaryna ūsyndy. Osyǧan orai, 2014 jyly elordanyŋ energokeşenın qaita qūru jäne keŋeitu üşın respublikalyq jäne jergılıktı biudjetterden qarjy bölınetın boldy.
– JEO-1, JEO-2 keŋeitılıp, qaita qūrylady, sonymen qatar, qoldanystaǧy jylu energiia jelılerı qalpyna keltırıledı. Atalǧan jūmystardyŋ nätijesınde aldaǧy jyly elektr quatynyŋ kölemı jylyna 120 MVt jäne jylu quattylyǧy 160 Gkal bolady dep közdelgen. Elektr jelılerınıŋ ötkızu qabılettılıgı 500-den 1200 MVt, jylu magistralındegı jylu 1179-dan 2702 Gkalǧa deiın artady. Būdan basqa, tozǧan magistraldyq jelılerdıŋ kölemı 15 paiyzǧa azaiady, – dedı J.Nūrpeiısov.
Sonymen bırge, elordada 2014-2016 jyldary jelılık park salu josparlanyp otyr. Jelılık parkterdı jaiau jürgınşıler, velosiped, qysta şaŋǧy, salt atty seruen joldary, sporttyq sauyqtyru maqsatynda jügıru üşın su qoimalary men aǧyn sulardyŋ janynda jasaǧan jön. Jelılık parkterdıŋ erekşelıgı – enı 50 metrden 100-200 m deiın, iaǧni, öte az jäne ūzyndyǧy 1-10 şaqyrymǧa deiın bolady.
Elorda halqyn mädeni demalys oryndarymen qamtamasyz etu maqsatynda «Abu-Dabi Plaza» bıregei keşenınıŋ jäne «EKSPO-2017» halyqaralyq körmesın ötkızu alaŋynyŋ janynda jelılık park salu közdelıp otyr. Basqarma basşysynyŋ aituynşa, atalmyş park 11,3373 ga jerge ornalaspaq, sonymen bırge 75,5 myŋ şarşy metr jer kögaldandyrylady. Būdan basqa, 2014-2016 jyldary Esıl özenınıŋ boiyndaǧy parktıŋ qūrylysy aiaqtalyp, qalalyq parktı jöndeu-jaŋǧyrtu jūmystary jalǧasady.
Bılım beru salasyna kelsek, aldaǧy jyly 9 mekteptıŋ qūrylysyn aiaqtauǧa jäne 4 mektep saluǧa qarjy bölınedı. Sonymen qatar, 3 balabaqşanyŋ qūrylysy jalǧasady, taǧy da 3 balabaqşany salu qolǧa alynady, 8 mektepke deiıngı nysan paidalanuǧa berıledı. Ärqaisysy 800 oryndyq qūrylys, bailanys jäne energetika mamandaryn daiarlaityn 2 käsıbi tehnikalyq liseidıŋ qūrylysy kelesı jyly bastalady. Sondai-aq, keler jyly qalamyzdaǧy bastauyş synyp oquşylarynyŋ 50 myŋǧa juyǧy tegın tamaqtandyrylady.
Densaulyq saqtau salasy boiynşa sol jaǧalauda ambulatorlyq-emhanalyq keşen, Öndırıs eldı mekenınde jäne Dosmūhamedūly köşesınıŋ boiynda ärqaisysy 150 adamdy qabyldauǧa arnalǧan 2 alǧaşqy medisinalyq-sanitarlyq kömek körsetu ortalyǧy aşylady dep josparlanuda. Tuberkulezge qarsy dispanserdıŋ qūrylysy da jalǧasady.
Basqarma basşysynyŋ aituynşa, Astana qalasynyŋ 2014-2016 jyldarǧa arnalǧan jalpy biudjetı – 772,8 mlrd teŋge. Onyŋ ışınde: 2014 jylǧa – 313,9 mlrd teŋge, 2015 jylǧa – 240,5 mlrd teŋge jäne 2016 jylǧa – 218,3 mlrd teŋge bölındı. Jalpy, aldaǧy üş jylǧa belgılengen qala biudjetı tūrǧyndardyŋ tūrmys ahualyn jaqsartuǧa baǧyttalǧan.
Sessiia barysynda Astana qalasy Jūmyspen qamtu jäne äleumettık baǧdarlamalar basqarmasynyŋ basşysy Alma Altybaeva Qazaqstan Respublikasy Täuelsızdıgınıŋ künıne Qazaqstanda 1986 jyly Jeltoqsan oqiǧasyna qatysuşylardyŋ ışınen saiasi quǧyn-sürgınge ūşyraǧandarǧa 20 myŋ teŋge kölemınde bırjolǧy äleumettık kömek körsetu üşın qarjy bölıngenın jetkızdı.
Sonymen bırge qala mäslihatynyŋ 2014 jylǧa arnalǧan jūmys jospary bekıtılıp, kezektı sessiianyŋ qarauyna engızılgen negızgı mäseleler men kelesı sessiianyŋ töraǧasyn belgıleu jönınde kelısıldı.
Gülbarşyn ÖKEŞQYZY
