Basty aqparatEl tynysy

Qasym-Jomart Toqaev: Halqymnyŋ senımı – maǧan amanat

20 qaraşada ötken kezekten tys Prezident sailauynda jeŋıske jetken ­Qasym-Jomart Toqaev özıne senım bıldırgen halyqqa alǧysyn aitty.

«Şyn mänınde, el senımın eşnärse­men ölşeu mümkın emes. Halyqtyŋ senımı – eŋ qūndy närse. Sailau nätijesın halqymyzdyŋ saiasi baǧdaryma – baǧasy, aldaǧy josparyma – batasy dep qabyldaimyn. Halqynyŋ qoldauyna ie bolyp, el tızgının ūstau – eŋ biık märtebe ärı orasan zor jauapkerşılık. Aldaǧy 7 jyldy bügıngı buynnyŋ jäne keleşek ūrpaqtyŋ aldyndaǧy boryşymdy öteuge berılgen bıregei mümkındık dep bılemın».

Qūrmettı otandastar!

Hanymdar men myrzalar!

Qadırlı qonaqtar!

Biyl halqymyz üşın airyqşa maŋyzdy jyl boldy. Qazaqstan damudyŋ jaŋa däuırıne qadam basty. Bız tübegeilı betbūrysqa jol aşqan auqymdy özgerıster jasadyq. Konstitusiialyq reformany jüzege asyrdyq. Memleketımızdıŋ eŋ basty salalaryn jan-jaqty jaŋǧyrttyq. Sonyŋ arqasynda halyqtyŋ bolaşaqqa degen ümıtı artyp, senımı nyǧaia tüstı.

Men aimaqtardy aralap, tūrǧyndarmen kezdeskende būǧan aiqyn köz jetkızdım. Sondai-aq ötken referendum tyŋ bastamalardy jūrtymyz­dyŋ jappai qoldaitynyn körsettı. Halyqtyŋ dūrys baǧyttaǧy özgerıske ūmtylysy jūmysqa zor serpın berdı. Bız reformalardy soŋyna deiın mındettı türde jetkızuımız qajet.

Konstitusiianyŋ jaŋa talabyna säikes būdan bylai Prezident jetı jyldyq bır merzımge ǧana sailanady. Osylaişa, saiasatkerlerdıŋ jaŋa buyny bilık basyna kele bastaidy. Men osy şeşımnıŋ dūrys bolǧanyna kämıl senemın.

Konstitusiiaǧa säikes bilık tarmaqtary tügel jaŋǧyrtylady. Osyndai jaŋa saiasi mausymdy Prezident sailauy bastap berdı. Sailau nauqany 3 aiǧa juyq uaqytqa sozyldy. Osy kezeŋde elımızdıŋ bolaşaǧy turaly türlı mazmūndy pıkırtalastar boldy. Jūrtymyz öz bolaşaǧyna bei-jai qaramaitynyn körsettı. Azamattyq qoǧamnyŋ kemel institutqa ainalǧany aiqyn aŋǧaryldy. Saiasi alaŋǧa jaŋa tūlǧalar şyqty. Osylaişa, halqymyz 20 qaraşada öz taŋdauyn jasady.

Sailau ädıl ärı aşyq öttı. Būl – baiqauşylardyŋ, sarapşylar men jurnalisterdıŋ bergen baǧasy. El-jūrttyŋ belsendılıgı erekşe joǧary boldy. Keibır azamattar bükıl otbasymen kelıp, dauys berdı. Būl nauqan el müddesı üşın ūlt bolyp bırıge alatynymyzdy körsettı.

Babalarymyz qai zamanda da bırlıgın bärınen biık qoiǧan. Bız ata jolyn saqtai bılgen, zamanaui jäne örkeniettı el ekenımızdı bükıl dünie jüzıne paş ettık. Bırlıgımızdıŋ bekemdıgın taǧy da däleldei aldyq.

Osy sailauda jūrtymyz maǧan zor senım bıldırdı. Şyn mänınde, el senımın eş närsemen ölşeu mümkın emes. Halyqtyŋ senımı – eŋ qūndy närse. Sailau nätijesın halqymyzdyŋ saiasi baǧdaryma – baǧasy, aldaǧy josparyma – batasy dep qabyldaimyn.

Halqynyŋ qoldauyna ie bolyp, el tızgının ūstau – eŋ biık märtebe ärı orasan zor jauapkerşılık. Aldaǧy 7 jyldy bügıngı buynnyŋ jäne keleşek ūrpaqtyŋ aldyndaǧy boryşymdy öteuge berılgen bıregei mümkındık dep bılemın.

Qazaqta «amanat» degen asyl ūǧym bar. Halqymnyŋ senımı – maǧan amanat. Osy amanatqa adal bolu – men üşın qasiettı paryz. El ümıtın aqtap, Qazaqstandy örkendegen, baquatty memleketke ainaldyru üşın qolymnan kelgennıŋ bärın jasaimyn.

Sailauǧa qatysqan barşa jūrtqa rizaşylyǧymdy bıldıremın. Nauqanǧa atsalysqan qauymǧa, baiqauşylar men jurnalisterge zor alǧys aitamyn. Prezidenttıkke kandidattarǧa da qūrmetımdı bıldıremın. Sailauda saiasi partiialar jäne qoǧamdyq ūiymdar maŋyzdy sätte jūdyryqtai jūmyla alatynyn körsettı. Osy rette menı prezidenttıkke ortaq kandidat retınde ūsynǧan halyq koalisiiasy müşelerıne rahmetımdı aitqym keledı.

Men özıme dauys bergen azamattardyŋ ǧana emes, bükıl Qazaqstan halqynyŋ aldynda esep beretın boldym. Qazaqta «Bailyq ne kerek, adaldan jimasaŋ, bilık ne kerek, ädıldık qūrmasaŋ» degen söz bar. Būl – būljytpai ūstanatyn ömırlık qaǧidatym.

Men bügın kök tudy süiıp, dana halqymnyŋ aldynda bas idım. Azattyq jolynda qūrban bolǧan babalar ruhyna taǧzym ettım. Elımnıŋ arman-mūratyna ömır-baqi adal boluǧa sert berdım. Eşqaşan adaldyqtan attamauǧa jäne el müddesıne qiianat jasamauǧa ant ettım. Ata zaŋǧa qolymdy qoiyp, onyŋ är sözın mültıksız oryndaimyn. Halqymnyŋ aldyndaǧy osy antym aldaǧy qyzmetımde men üşın ainymas temırqazyq bolady.

Qūrmettı otandastar!

Ötken Prezident sailauy naǧyz patriottyq şara boldy. Sailau azamattarymyz­dyŋ el taǧdyryna bei-jai qaramaitynyn körsettı. Būl ädıldık ideiasynyŋ jäne halyqtyŋ erık-jıgerınıŋ saltanat qūrǧanyn, elımızdı jan-jaqty jaŋǧyrtu üderısı bastalǧanyn bıldıredı.

Sailau Qazaqstandaǧy elektoraldy prosestıŋ aşyqtyǧy men ädıldıgın jaŋa deŋgeige köterdı. Sondai-aq bızdıŋ qoǧamnyŋ saiasi mädenietı men kemeldık därejesı joǧary ekenın tanytty. Halyq sailau uchaskelerınde aldaǧy jetı jylǧa arnalǧan memlekettı damytu baǧdarlamasyna oŋ baǧa berdı. Maǧan senım artqan barşa otandasyma şeksız rizaşylyǧymdy bıldıremın.
Prezident lauazymynda elımızge adal qyzmet etuge daiynmyn. Būl – zor abyroi ärı ülken jauapkerşılık. Men üşın memleket müddesı bärınen biık. Aldaǧy jetı jylda halyqtyŋ zor senımın aqtau üşın bar küş-jıgerımdı jūmsaimyn.

Endı bızdıŋ ortaq maqsatymyz – zaŋ men tärtıp üstemdık qūratyn, azamattardyŋ qūqyǧyna laiyqty qūrmet körsetıletın Ädılettı Qazaqstandy qūru. Qoǧamdy transformasiialap, Qazaqstandy şynaiy demokratiialyq instituttary damyǧan elge ainaldyru üşın auqymdy jūmys atqaruymyz kerek. Sonda ǧana ūlttyŋ jaŋa sapasyn qalyptastyryp, qasterlı täuelsızdıgımızdı nyǧaitamyz.

Qazır bız osy qiyn-qystau joldyŋ basynda tūrmyz. Aldymyzda atqaratyn jūmys köp. Ärbır azamat eldıŋ bolaşaǧy üşın öz jauapkerşılıgın sezınuge tiıs. Memlekettık saiasatymyzdyŋ negızgı baǧyty – bılım beru ısınen bastap industriia­landyruǧa deiın qoǧamnyŋ barlyq salasyn jaŋǧyrtu. Elımızdıŋ ūzaq merzımdı ekonomikalyq ösımınıŋ negızın jaŋa tehnologiialar, joǧary eŋbek önımdılıgı, azamattardyŋ şyǧarmaşylyq bastamalary qūraidy.

Basty mındet – ısker azamattarymyzdyŋ käsıpkerlık ruhyna ziianyn tigızetın jasandy kedergıler men şekteulerdıŋ bärın joiu. Käsıpkerler bizneske jürgızıletın sebepsız tekserulerdı bırjolata ūmytuy qajet. Olar tek salyq organdarynyŋ aldynda ǧana esep beredı. Memleket pen biznes – senımdı serıktester. Şaǧyn jäne orta biznestıŋ damuyna zaŋsyz kedergı keltıretınderdıŋ bärı zaŋǧa säikes qataŋ jauapqa tartylady.

Bız auqymdy industriialandyrudy, infraqūrylymdardy saludy jäne jaŋǧyrtudy qolǧa alamyz. Keŋ baitaq elımızdıŋ är öŋırınıŋ damuyna tyŋ serpın beru maŋyzdy. Şynaiy zaŋ üstemdıgın qamtamasyz etpei, ädılettı ärı naryqtyq ekonomikany qūru, jeke menşıktı qorǧau, bäsekelestıktı damytu, sybailas jemqorlyqty joiu mümkın emes. Sondyqtan zaŋ aldynda bärınıŋ teŋ boluy – memleketımızdıŋ ūzaq merzımdı damuynyŋ negızgı şarty. Barlyq mäsele, äsırese tüitkıldı jäne dauly problemalar konstruktivtı dialog arqyly, eŋ aldymen, Parlamentte şeşıluge tiıs. Aldaǧy Senat jäne Mäjılıs sailauy osy mümkındıktı beredı.

Bız «türlı közqaras, bıraq bırtūtas ūlt» qaǧidatyn qataŋ saqtauymyz kerek. Bız «bırlıgımız – äraluandyqta» formulasynda körınıs tapqan halqymyzdyŋ tarihi jetıstıkterın jan-jaqty eseleuge tiıspız. Qoǧamda arazdyq tuǧyzatyn jäne ūlttyŋ bırlıgın būzatyn, tüptep kelgende, memleketımızge qarsy baǧyttalǧan arandatuşylyq äreketterge qataŋ tosqauyl qoiylady.

Bız halyqtyŋ tılegı men zaman talabyna sai tiımdı memleket qūruǧa mındettımız. Būl – maŋyzdy tarihi mındet. Memlekettık qyzmetke naqty sektordan meritokratiia jäne aşyq bäsekelestık qaǧidattaryna sai ırıkteuden ötken jaŋa basqaruşy azamattardy alamyz. Prezidenttık kadr rezervınıŋ müşelerın belsendı türde tartamyz.

Bızdıŋ basty bailyǧymyz – adam. Sondyqtan azamattardyŋ igılıgı üşın barlyq jaǧdaidy jasau asa maŋyzdy. Elımız damu jolynda, negızınen, öz küşıne senedı. Sonymen qatar şetelden tıkelei investisiia tarta otyryp, türlı saladaǧy halyqaralyq yntymaqtastyqty belsendı türde damytady.

Qazaqstan öz ūlttyq müdde­sın qorǧauǧa baǧyttalǧan teŋgerımdı jäne konstruktivtı syrtqy saiasatyn jüzege asyrudy jalǧastyrady. Reseimen, Qytaimen jäne Ortalyq Aziiadaǧy bauyrlas memlekettermen, integrasiialyq bırlestıkter jönındegı serıktestermen aradaǧy özara tiımdı yntymaqtastyq pen strategiialyq ärıptestık mäselelerı basty nazarda bolady. AQŞ-pen, Europalyq Odaqpen, Aziia, Taiau Şyǧys jäne Kavkaz memleketterımen, sondai-aq basqa müddelı elderdıŋ barlyǧymen köpjaqty yntymaqtastyqty damytu üşın bar küş-jıgerımızdı jūmsaimyz. Qazaqstan qazırgı halyqaralyq qūqyq pen BŪŪ Jarǧysyn berık ūstanatyn el bolyp qala beredı.

Qymbatty otandastar!

Bız ädılettı memleket, ädılettı ekonomika jäne ädılettı qoǧam qūramyz. Osy qaǧidattar menıŋ sailau aldyndaǧy tūǧyrnamamda naqty körınıs tapty. Men onyŋ är sözıne, är söilemıne tereŋ män berdım. Sailaualdy baǧdarlamam – būl ūzaq oi-tolǧau men ızdenıstıŋ nätijesı. Tıptı, jüregımnen şyqty desem, artyq aitqandyq emes. Halyqtyŋ bastamalarǧa qoldau bıldırıp, ülken ümıt kütıp otyrǧanyn bılemın. Tūǧyrnamanyŋ ärbır tarmaǧy tolyq oryndaluǧa tiıs. Men ol üşın barlyq küş-jıgerımdı jūmsaimyn. Osyǧan bailanysty arnaiy Jarlyqqa qol qoiamyn. Būl Jarlyq naqty ıs-şaralardyŋ jüzege asuyn qamtamasyz etedı. Baǧdarlamanyŋ mültıksız oryndaluyn jeke baqylauyma alamyn.

Qazır – sailaudaǧy jeŋıstı toilaityn kez emes, aianbai eŋbek etetın kez. Sol sebeptı arqany keŋge salmai, bırden ıske kırısuımız kerek, bosaŋsuǧa bolmaidy. Osy oraida eŋ aldymen, qolǧa alatyn bırneşe mäselege arnaiy toqtalǧym keledı.

Men sailaualdy sözderımde auyldy örkendetu ısıne basa nazar audardym. Bügınde Qazaq­stan halqynyŋ 40 paiyzǧa juyǧy auylda tūrady. «Auyl – el besıgı» dep halqymyz beker aitqan joq. Sondyqtan auyldaǧy jaǧdaidy jaqsarta almasaq – bärımızge syn. Sol üşın men bügın auyldy damytu mäselesı turaly Jarlyqqa qol qoiamyn. Osy qūjat arqyly Ükımetke auyldy damytudyŋ 5 jylǧa arnalǧan naqty josparyn äzırleudı tapsyramyn. Būl menıŋ jaŋa prezidenttık merzımdegı bırınşı Jarlyǧym bolady. Ükımet auyldy damytuǧa arnalǧan barlyq jobany jüielı türde rettep, jinaqtau­ǧa tiıs. Sodan keiın maqsatty türde tiımdı jūmys jürgızemız.

Kelesı maŋyzdy baǧyt. Bız ädıldıktı qalpyna keltırıp, elden zaŋsyz şyǧarylǧan barlyq aktivtı qaitaruǧa tiıspız. Būl üşın Ükımet zaŋsyz şyǧarylǧan kapitaldy qaitaru üşın qajettı räsımderdı retteitın zaŋ jobasyn äzırleidı. Sonymen qatar zaŋ jobasy ädıletsız baiuǧa jäne aktivterdı zaŋsyz şyǧaruǧa yqpal etetın sebepter men şarttardy joiuǧa baǧyttalady. Qaitarylǧan barlyq qarajat azamattardyŋ igılıgıne jūmsaluǧa tiıs. Būl qarjyny joǧary tehnologiia­ly öndırıs oryndaryn aşuǧa, mektepter men auruhanalar saluǧa, äleu­mettık jobalardy jüzege asyruǧa paidalanu kerek. Tiıstı Jarlyqqa bügın qol qoiamyn. Jaqyn arada auqatty käsıpkerler halyqtyŋ igılıgı üşın özderınıŋ äleumettık jauap­kerşılıgın jandandyrady dep oilaimyn.

Memlekettık qūrylysta bız «küştı Prezident – yqpaldy Parlament – esep beretın Ükımet» formulasyn naqty ūstanamyz. Prezident sailauy bilıktıŋ barlyq negızgı institutyn däiektı türde jaŋǧyrtu üderısın bastauǧa jol aşty. Sailau auqymdy elektoraldy sikldıŋ bastapqy kezeŋı boldy.

Bız saiasi jaŋǧyru üderısın josparly türde jalǧastyramyz. Bügın men «Qazaqstan Respublikasy Parlamentı Senaty deputattarynyŋ sailauyn taǧaiyndau turaly» Jarlyqqa qol qoiamyn. Osylaişa, joǧarǧy palata deputattarynyŋ kezektı sailauy konstitusiialyq reformany naqty jüzege asyrudyŋ jalǧasy bolmaq. Sailau qorytyndysy boiynşa Senattyŋ deputattyq korpusynyŋ bır bölıgı bäsekelestık jäne aşyqtyq qaǧidattary negızınde jaŋarady.

Būdan bölek, bügın men kons­titusiialyq reformany jüzege asyrudyŋ kelesı satysy retınde «Qazaqstan Respublikasy Joǧary auditorlyq palatasynyŋ keibır mäselelerı turaly» Jarlyqqa qol qoiamyn. Kelesı kezeŋ – ony tolyqqandy transformasiialau. Basqa maŋyzdy ärı özektı mäseleler boiynşa şeşımderdı keiınırek jariialaimyn. Taǧy da qaitalap aitamyn, alda atqaratyn şarua köp. Būl – jeŋıl jūmys emes, bıraq elge paidasy tietın qyzmet. Men bükıl memlekettık apparattan osy mındettı abyroimen oryndaudy talap etemın.

Qolynan ıs keletın jäne elge berıle qyzmet jasaityn azamattarǧa ǧana ortamyzda oryn bar. Olarǧa qoldau körsetemız, al qoǧam qūrmetın bıldıredı. Halqymyzdyŋ naqyl sözın säl türlendırıp aitsaq: «Bailyq pen mansap – qolǧa ūstaǧan mūz, eridı de ketedı. Al elge jasaǧan qyzmet – artta qalǧan ız, ol ūrpaqtan-ūrpaqqa jetedı». Osyny är azamat tüsınuı kerek.

El müddesı – bärınen biık. Men barlyq memlekettık qyz­metşıden öz jūmysyn adal atqarudy talap etemın. Bır sözben aitsam, käsıbilık, adaldyq jäne qarapaiymdylyq bızdıŋ basty qaǧidattarymyz boluǧa tiıs. Qoǧamda jaŋa qūndylyqtar ornyqtyryp, jaqsy qasietterge ie bola almasaq, reformanyŋ bärı beker.

Kök bairaǧymyz, tölqūjatymyz jäne memlekettık tılımız bızdıŋ bırtūtas halyq ekenımızdı bıldıredı. Babalarymyz bırtūtas el bolyp, Euraziia törınde daŋqty şejıresın at tūiaǧymen jazǧan Altyn orda men Qazaq handyǧy siiaqty memleketter qūrǧan. Sondai-aq halqymyz el basyna kün tuǧan kürdelı sätterde azattyǧy üşın arpalysty. Äigılı handarymyzdyŋ, batyrlarymyzdyŋ jäne ūlt qairatkerlerınıŋ erlıgı – osynyŋ aiqyn körınısı.

Ūlttyŋ bostandyq jolyndaǧy tabandy küresınıŋ arqasynda Qazaq elı täuelsızdıgın aldy. Egemen memlekettıŋ qūryluyna, onyŋ ırgesın bekıtu jolynda orasan zor eŋbek sıŋırgen tarihi tūlǧalary­myzǧa ädıl baǧa beruımız kerek.

Tabystardy jäne olqylyq­tardy ajyratatyn būl – uaqyt jäne tarih. Uaqyt – eŋ ädıl qazy, al tarih – bärıne tarazy. Sondyqtan saiasi nau­qanşyldyqqa jol bermeuımız qajet. Bız bolaşaqta ädılettı memleket bolamyz desek, ötkenge ädıldıkpen qarap, odan taǧylym ala bıluımız kerek. Jaqsydan üirenıp, jamannan jirenu – ösetın eldıŋ belgısı. Otanşyldyq, eŋbekqorlyq, bılımpazdyq, jaŋaşyldyq, jasampazdyq, janaşyrlyq, meiırımdılık siiaqty asyl qasietterdı boiǧa sıŋıruımız qajet. Men būl turaly jiı aityp jürmın.

Ädılettı Qazaqstanda eŋbek adamyna erekşe qūrmet körsetıluge tiıs. Äsırese ūstaz, därıger, tärtıp saqşysy, qūtqaruşy, jūmysşy, şarua siiaqty mamandardyŋ märtebesın odan ärı arttyra tüsuımız qajet. Olar elımızdegı eŋ syily azamattarǧa ainaluy kerek. Osy käsıp ielerı tiıstı qūrmet pen syiǧa ie bolǧanda ǧana qoǧamymyz şynymen jaŋardy dep aita alamyz.

Köpşılık qazırgı uaqytta naǧyz batyrlardyŋ jetıspeitının aitady. Bıraq naǧyz qaharmandar jūrttyŋ nazarynan tys jerde. Olar bızdıŋ aramyzda. Batyrlar kün saiyn zauyt stanogynda jūmys ısteidı, qoǧamdyq kölık jürgızedı, ūşaq şturvalyna otyrady, qūtqaruşynyŋ qorǧanys kiımın kiedı, nauqasqa jedel järdem beruge asyǧady, äskeri tehnikany meŋgeredı. Naǧyz batyrlar balalarymyz ben qart ata-analarymyzdyŋ dastarhany as-auqatqa toly boluy üşın auylda taŋmen talasa oianady. Bızdıŋ batyr­lar – özınıŋ jeke käsıbın bastaityn, jūmys oryndaryn aşatyn, qyzmetkerlerı men olardyŋ otbasylaryna jaŋa mümkındıkter tudyratyn käsıpkerler. Bızdıŋ batyrlar – özınıŋ mahabbaty men küş-quatyn, täjıribesı men bılımın, mülkı men qarajatyn qoǧamǧa riiasyz ūsynatyn erıktıler men igı ıs jasaityndar. Olardyŋ barlyǧy – halyqtyŋ maqtanyşy ärı ümıtı. Mıne, osyndai eŋbek adamdary – elımız ben memleketımızdıŋ tıregı.

Bız örkeniettıŋ alǧy şebındegı memleketke ainalu üşın tek üirenetın emes, özgege üiretetın ūltqa ainaluymyz qajet. Sondai-aq tek tūtynuşy emes, jaŋa dünienı öndıruşı ūlt atanuymyz kerek. Oǧan halqymyzdyŋ äleuetı, daryny, qarym-qabıletı jetedı.

Men bızdıŋ jastarymyzdyŋ ūşqyr jäne ozyq oily ekenın maqtan etemın. Sol sebeptı Maǧjan aqynnyŋ «Men jastarǧa senemın» degen sözın ünemı aitamyn. Şyn mänınde, bärımız jastarymyzdy qol­dauymyz kerek. Öitkenı öskeleŋ ūrpaq qana elımızdı jarqyn bolaşaqqa bastaidy. Bıraq jastar jetıstıkke jetu üşın köp eŋbektenuı kerek. Jaŋa bılım aluǧa, tyŋ täjıribe jinauǧa ūmtylǧan jön. Sonda jastarymyz öz käsıbınıŋ has şeberı atanady. Ärdaiym sūranysqa ie bolady, qoǧamda syily bolady. Mıne, osylai ömır sürgen adam eşqaşan, eşteŋeden ūtylmaidy.

Qazırgı zaman uaqytty jyldamdatyp, oqiǧalar tızbegın qabattastyrady. Sözımız ben ısımızdıŋ şynaiy baǧasyn tarih tarazysy ǧana beredı. Ar-ūjdanymyzdyŋ tazalyǧy men halqymyzdyŋ qūrmetı – bärımız üşın ülken syi.

Bız ruhani mūrasy bai, qarqyndy damu äleuetı zor, quatty ärı özın-özı tolyq qamtamasyz ete alatyn ūlt­pyz. Şyǧystyŋ ūly ūstazy ­­äl-Farabi adamdardy ädıl boluǧa, aqiqatty süiuge, ­ar-namysty qasterleuge, sabyrly boluǧa jäne qaşan da bılımge ūmtyluǧa ündedı. Memlekettılıgımızdıŋ damuynda quatty serpılıs jasai alǧan ūrpaq retınde tarihta qaluǧa zor mümkındıgımız bar ekenıne senımdımın. Eldıŋ keleşegı bızge, barlyǧymyzdyŋ qajyr­ly eŋbegımızge bailanysty.

Täuelsız elımızdı quatty memleket retınde ūrpaqqa amanattau – bızdıŋ boryşymyz. Alda talai synaqtar, kürdelı kezeŋder boluy mümkın. Degenmen yrysty yntymaǧymyzdy saqtai bılsek, alynbaityn asu joq.

Men bügın halqymnyŋ aldynda tūryp, bastaǧan ısımız berekelı bolsyn dep tıleimın.

Qazaq – yrymşyl halyq. Men biyl qasiettı Mekkege barǧan kezde Qaǧba törınde ata-baba ruhyna qūran baǧyştap, Alladan bır-aq närse sūradym. Ol – eldıŋ amandyǧy. Şyn mänınde, elımız aman bolsa, jerımız bütın, bırlıgımız bekem, memlekettıgımız mäŋgı bolady. Osy qūndylyqtardy myzǧymastai etıp bekıtu – qazaqtyŋ perzentı, Qazaqstannyŋ Prezidentı retındegı menıŋ qasiettı paryzym. Aşyǧyn aitqanda, qyzmet – uaqytşa, al halyq – mäŋgı.

Men prezidenttık missiiamdy halqymmen bırge aldaǧy jetı jylda abyroimen atqaryp şyǧamyn dep senemın. Bızdıŋ Otanymyz – bır, memleketımız – bır, halqymyz – bır! Sondyqtan ärqaşan bırge bolaiyq, aǧaiyn!

Elımız örkendei bersın!

Otanymyz – Qazaqstan Respublikasy jasasyn!

Halqymyz jasasyn!

Halqymyz ärqaşan aman bolsyn!

Täuelsız Qazaqstanymyz jasasyn!

Taǧyda

admin

«Astana aqşamy» gazetı

Ūqsas jaŋalyqtar

Pıkır üsteu

Back to top button