Astana qalasy äkımınıŋ orynbasary Aida Balaevanyŋ töraǧalyǧymen äleumettık ärıptestık pen äleumettık jäne eŋbek qatynastaryn retteu jönındegı qalalyq üşjaqty komissiianyŋ kezektı otyrysy öttı. Osy joly kün tärtıbınde jūmysşylaryna uaqtyly jalaqy tölemeitın kompaniialar mäselesı men öndırıstık jaraqat aludyŋ jai-japsary talqylandy. Sondai-aq, biznestıŋ jauapkerşılıgın aişyqtaityn biylǧy «Paryz» konkursyn ötkızu turaly söz boldy.
Jiyndy aşqan Aida Ǧalymqyzy kün tärıtıbıne qoiylǧan mäselelerdıŋ maŋyzdylyǧyna toqtalyp, eŋbek zaŋy talaptaryn saqtau, jūmysşylardyŋ qauıpsızdıgın qorǧau ortaq müdde ekendıgın atap öttı.
Būdan keiın Astana qalasynyŋ eŋbek inspeksiiasy boiynşa basqarmasy basşysynyŋ orynbasary mındetın atqaruşy Qairat Ysqaqov söz alyp, elordalyq kompaniialardyŋ jūmysşylary aldyndaǧy bereşek mäselesı qanşalyqty şeşılıp jatqany turaly baiandady. Sondai-aq, eŋbek daulary, öndırıstık jaraqattyŋ aldyn aluǧa bailanysty şaralar äŋgıme özegıne ainaldy.
Qairat Zeinalǧabiūlynyŋ aituynşa, osy mekemenıŋ inspektorlary prokuratura ökılderımen bırlesıp, käsıporyndardyŋ jūmysşylary aldyndaǧy qaryzy qanşalyqty ekenıne monitoring jürgızıp otyrady. 20 qyrküiektegı jaǧdai boiynşa, atalǧan mamandardyŋ aralasuymen ailar boiy jalaqysyn ala almai jürgen 521 jūmysşy köpten kütken ailyǧyna qol jetkızıptı. Qaitarylǧan qaryzdyŋ jalpy kölemı 77 mln teŋgenı qūraǧan.
Osy jyldyŋ tamyz aiynda Eŋbek inspeksiiasy boiynşa basqarmaǧa «Altan TET» JŞS ūjymy ailyq eŋbekaqy berılmei jatqany turaly şaǧym tüsırgen.
–Būl jekemenşık serıktestık Almaty qalasynda tırkelgen. Ärı orta jäne şaǧyn käsıpkerlık subektılerın tekseruge tyiym salynǧanyna bailanysty tekseru jürgızılgen joq. Bıraq eŋbek dau-damaiynyŋ aldyn alu üşın käsıporyn basşylyǧymen äŋgıme jürgızılıp, jalaqyny keşıktıru sebebı anyqtaldy. Söitsek, qoqys öŋdeumen ainalysatyn serıktestıkke olarmen kelısımşartqa otyrǧan qoqys şyǧaruşy ūiymdar bereşek eken. Bügınde jalaqy qaryzy bırtındep tölenıp jatyr, – deidı Qairat Ysqaqov.
Qala äkımınıŋ orynbasary är jūmyskerdıŋ bala-şaǧasy bar ekenın, jalaqyny uaqtyly tölemeu bır otbasynyŋ äleumettık jaǧdaiyna kerı äser etetının aita kelıp, qyzmetkerlerıne jalaqy tölemeitın käsıporyndardyŋ mäselesı qataŋ qaralatynyn eskerttı.
Būdan keiın Qairat Zenelǧabiūly eŋbek qauıpsızdıgı men öndırıstık jaraqat jaiy turaly baiandady. Ädettegıdei qūrylys alaŋdaryndaǧy jaǧdai alaŋdatarlyq eken. 2014 jyldyŋ basynan berı öndırıste 101 apatty jaǧdai bolsa, sonyŋ 32-sı ölımmen aiaqtalypty.
Qazırgı taŋda Astanada 10 406 qūrylys kompaniiasy tırkelgen, sonyŋ 1438-ı bır mezgılde qyzu jūmys ıstep jatyr eken. Bıraq būlardyŋ bärınde eŋbek qauıpsızdıgı saqtalǧan deu qiyn. Kompaniialardyŋ eşqandai da mamandyǧy joq azamattardy jūmysqa qabyldauy da mäselenı uşyqtyryp otyr.
Jalpy, öndırıste jaraqat alu jaǧynan aty dardai «BI Group» kompaniiasy aldyŋǧy qatarda eken. Osy kompaniianyŋ qūrylys alaŋynda bır aptanyŋ ışınde ekı adam qaza tapqan. Osylaişa, «baqyt mekenın» saluşylar baqytsyzdyq jaǧdaiyn auyzdyqtai almai otyr. Jalpy, öndırıstık saladaǧy jazataiym oqiǧalar sany jaǧynan qūrylys salasy bırınşı orynda eken.
Jiynda eŋbek qauıpsızdıgın saqtau – eŋ aldymen tūrǧyndardyŋ densaulyǧy, bolaşaǧy ekenı aitylyp, eŋbek zaŋnamasyna şekesınen qaraǧan kompaniialardy jauapkerşılıkke tartu mäselesı qozǧaldy. Aida Ǧalymqyzy qūrylys salasyndaǧy kompaniialar jarnama jasap, öz qamdaryn küittegennen görı jūmysşylardyŋ qauıpsızdıgın saqtauǧa köbırek köŋıl bölulerı qajettıgın eskerttı.
Qymbat TOQTAMŪRAT
