Mädeniet

QAZAQSTAN. «ASTANA – ARENA». «MUZ-TV».

12

Elordada dürıldep ötetın «Muz-TV – 2015. Gravitasiia» syilyǧyn tapsyru räsımıne deiın bır aptadai ǧana uaqyt qaldy. Keşe «Muz-TV» arnasynyŋ bas direktory Arman Däuletiiarov Ortalyq kommunikasiialar qyzmetınıŋ brifingıne kelıp, elorda tarihynda aişyqty ız qaldyratyn muzykalyq uaqiǧaǧa äzırlık jaiymen tanystyrdy.

Aituly şara ötetın «Astana – Arena» stadionynda būl künderı qyzu jūmys jürgızılude. Sahna men körermenderge arnalǧan oryndardy qūru, basqa da kerek-jaraqtardy ornatu siiaqty jūmystar aldaǧy beisenbıge deiın aiaqtaluy tiıs. Ūşaqtan tüse salyp, brifingke kelgen telearna basşysy jurnalistermen kezdesuden keiın stadionǧa baratynyn aitty. «Astana – Arena» stadionynda endı bır apta boiy qona jatamyn» dedı ol sözıne äzıl-qaljyŋdy aralastyryp.
Arman Däuletiiarovtyŋ aituynşa, saltanatty räsımge belgılı muzykanttardy, sportşylardy, mädeniet salasynyŋ maitalmandaryn, qarapaiym körermenderdı qosqanda, jiyny myŋǧa juyq qonaq keledı.
– Olardyŋ bärın ornalastyru jaǧyn jıtı qadaǧalap otyrmyz. «Jatyn oryn taba almaǧan qonaqtardy qarsy aluǧa, üiımızge qondyruǧa daiynbyz» degen ūsynys aitqan keibır astanalyqtardyŋ peiılı men nietıne rizamyn. Olarǧa köpten-köp rahmet aitqym keledı, – degen telearna direktory ülken muzykalyq merekenı elordada ötkızuge mümkındık bergen memleket pen qala basşylyǧyna alǧysyn jetkıze kettı.
«Muz-TV – 2015. Gravitasiia» syilyǧynyŋ serıktesterınıŋ qatarynda «Astana EKSPO-2017» ūlttyq kompaniiasy, «Dara» men «Aiala» qaiyrymdylyq qorlary bar. «Bızdı qoldap jatqan ūlttyq kompaniiaǧa alǧysym şeksız. Būl serıktestıkten ekı tarap ta ūtady. Jüz myŋ körermendı qamtityn «Muz-Tv» arnasy arqyly Qazaqstanda ötetın «EKSPO» körmesı jaiynda köp adam habar alady. Osy tūrǧydan alǧanda, «Muz-TV – 2015. Gravitasiia» syilyǧy – ülken jarnama» dedı A.Däuletiiarov.
Al, «Dara» men «Aiala» qaiyrymdylyq qorlarynyŋ atsalysuymen igı ıs atqarylady. Olardyŋ ūiymdastyruymen elordaǧa elımızdıŋ tükpır-tükpırınen balalar üiınıŋ tärbielenuşılerı men mümkındıgı şekteulı jetkınşekter, az qamtylǧan otbasylardan şyqqan balalar jetkızılıp, reseilık jäne qazaqstandyq änşılermen kezdesedı. Öner ielerımen türlı oiyndar oinap, 4 mausym künı «Astana – Arena» stadionynyŋ aldynda ötetın tegın konserttı tamaşalaidy.
Arman Däuletiiarovtyŋ aituynşa, būl konsertte jalpy alǧanda 60 änşı öner körsetedı. Olardyŋ jartysy – Reseiden, jartysy Qazaqstannan bolady. Osy konserttı «Qazaqstan» ūlttyq arnasy tıkelei efirde taratady. Al, «Muz-TV» telearnasy jyl ışınde bes ret körsetedı. «Osy konsert arqyly Reseidegı jūrt qazaqstandyq änşılerdıŋ şyǧarmaşylyǧynan habar alady. Būl jait osyndaǧy estrada jūldyzdarynyŋ körşı el halqyna tanyla tüsuıne septıgın tigızedı» deidı telearna basşysy.
4 mausym künı ötetın konserttı Qazaqstan tarapynan belgılı şoumen Nūrlan Qoianbaev jürgızedı. Onyŋ qasynda basqa da qazaqstandyq jürgızuşıler bolady. Alaida, olardyŋ esımderın A.Däuletiiarov jariia ete qoimady. «Ony konsert ötetın künı özderıŋız köresızder» dedı. Al, 5 mausymdaǧy «Muz-TV – 2015. Gravitasiia» syilyǧyn tapsyru räsımınıŋ tızgının būǧan deiın belgılı bolǧandai Kseniia Sobchak, Maksim Galkin, Lera Kudriavseva, Andrei Malahov ūstaidy. Nūrlan Qoianbaev būlardyŋ qataryna da qosylyp otyr. Ekınşı qazaqstandyq jürgızuşını de «Muz-TV» telearnasynyŋ bas direktory qūpiia qaldyrdy.
Jalpy, «Muz-TV – 2015. Gravitasiia» syilyǧyn ielenu üşın änşıler bırneşe atalymda öner jarystyrady. Biyl jaŋadan qosylǧan «Üzdık qazaqstandyq jyl ärtısı» atalymynda Janar Dūǧalova, Qairat Nūrtas, Nūrlan Abdullin, «MuzArt» toby jäne Äli Oqapov qarsylas atandy. Qai änşıler qara üzetını 5 mausym künı anyqtalady. Räsım qazaq jäne orys tılındegı änmen jabylady. Arman Däuletiiarovtyŋ aituynşa, biletter baǧasy qymbat emes. Az qalsa da, aituly muzykalyq şarany stadionǧa kelıp, tamaşalaimyn deitın adamdar ony aluǧa älı ülgeredı.

Amanǧali
QALJANOV

Taǧyda

Ūqsas jaŋalyqtar

Pıkır üsteu

Back to top button