Endı bır künnen keiın futboldan Europa chempionaty bastalady. Fransiia elınde ötetın dop dodasynda 24 eldıŋ qūramasy synǧa tüsedı.
Al osy jarysqa tüsetın komandalar, sondai-aq basqa qūrlyqtar men elderdıŋ de qūramalary künı keşe joldastyq kezdesuler ötkızdı.Sondai ūlttyq qūramalar arasyndaǧy oiynnyŋ bırı Qazaqstan jäne Qytai arasynda öttı.
Qytaidyŋ Dalian qalasynda bolǧan oiynnyŋ bırınşı kezeŋınde esep aşylmady. Ekı jaq ta qorǧanysqa asa män berıp oinaǧany baiqaldy. Ökınışke qarai, Qazaqstan qūramasynyŋ beldı oiynşysy Ūlan Qonysbaev bırınşı taim aiaqtalar tūsta auyr jaraqat alyp qaldy. Mamandardyŋ aituynşa talantty futbolşymyz endı üş aiǧa juyq oiynnan tys qaluy mümkın.
Ekınşı taimnyŋ 69-şy minutynda otandasymyz Azat Nūrǧaliev alaŋ ielerı qorǧauşylary arasynan sytylyp ötıp, ala dopty qarsylastar qaqpasyna tulatyp tüsırdı. Osylaişa esep aşylyp, Qazaqstan qūramasy alǧa şyqty. Alaida, ekı komanda da qanşa tyrysqanymen tablodaǧy eseptı özgerte almady. Söitıp, Qazaqstan futbolşylary Qytai qūramasyn 1:0 esebımen jeŋdı.
Būl oiynǧa Qazaqstan qūramasyn otandasymyz Talǧat Baisufinov baptap apardy. Osy bapker qūrama tızgının ūstaǧaly ūlttyq qūramamyz tört oiynda qatarynan jeŋılmei keledı. Osyǧan deiın Qazaqstan qūramasy Latviia jäne Äzerbaijan qūramalaryn jeŋse, Gruziia qūramasymen teŋ tüsken bolatyn.
