Qazaqstanda qanşa eŋbek migranty bar?
1 jeltoqsandaǧy jaǧdai boiynşa jergılıktı atqaruşy organdardyŋ rūqsatymen Qazaqstan aumaǧynda 13951 şetel azamaty eŋbek etedı. Būl turaly Eŋbek jäne halyqty äleumettık qorǧau ministrlıgı mälımdedı.
Şetel jūmys küşın tartuǧa rūqsattyŋ arasynda mynadai sanat bar: basşy men onyŋ orynbasarlary üşın 568 rūqsat (bırınşı sanat), qūrylymdyq bölımşenıŋ basşylary üşın 3017 rūqsat (ekınşı sanat). Tartylǧan ŞJK negızgı bölıgı üşınşı (mamandar) jäne törtınşı (bılıktı jūmysşylar) sanatqa jatady, tiısınşe olar – 7 436 jäne 810 adam. Sondai-aq mausymdyq jūmysqa – 564 adam, al korporativtık auystyru aiasynda 1556 adam tartyldy.
Qazırgı uaqytta Qazaqstanda ŞJK paidalanatyn 1679 jūmys beruşı bar. Olarda 384 myŋnan astam Qazaqstan azamaty jūmys ısteidı, būl – qyzmetkerlerdıŋ jalpy sanynyŋ 97 paiyzy.
Ekonomikalyq qyzmet türlerı boiynşa eŋ köp jūmys ısteitınder qūrylys salasynda – 5780 adam (42 paiyz); tau-ken önerkäsıbı jäne karerlerdı qazu – 1 476 adam (11 paiyz); käsıbi, ǧylymi jäne tehnikalyq qyzmet – 1 057 adam (8 paiyz); öŋdeu önerkäsıbı – 953 adam (7 paiyz); auyl, orman jäne balyq şaruaşylyǧy – 547 adam (4 paiyz).
Eŋbek migranttary keletın negızgı elder: Qytai – 3518 adam, Ündıstan – 1645 adam, Türkiia – 1577 adam, Angliia – 1091 adam, Özbekstan – 693 adam.
Esterıŋızge sala keteiık, ışkı eŋbek naryǧyn qorǧau maqsatynda Eŋbek jäne halyqty äleumettık qorǧau ministrlıgı jyl saiyn respublikaǧa şeteldık mamandardy tartuǧa kvota belgıleidı jäne böledı. Biylǧy qaŋtar aiynda Eŋbek ministrlıgı ŞJK tartu kvotasyn būryn josparlanǧan 28 352 bırlıkten 21 097 bırlıkke deiın, iaǧni 7 255 bırlıkke (25 paiyzǧa) qysqartty. Osy jyldyŋ jeltoqsanynda kvota qosymşa 997 bırlıkke qysqartylyp, jalpy sany 20 100-dı qūrady.