Qazaqstandyqtar zeinetaqy qorynyŋ negızgı qyzmetterın üiden şyqpai paidalanady

Bıryŋǧai jinaqtauşy zei­netaqy qory salymşylar men aluşylar üşın körsetetın qyz­met­terınıŋ jartysynan astamyn elektrondyq formatqa auystyrdy. Qazır elektrondyq qyzmetterdıŋ üles salmaǧy Qordyŋ jalpy qyzmetterınıŋ 52 paiyzyn qūrap otyr. Osylaişa otandas­tarymyz özderıne qajettı negızgı qyzmetterdı üiden şyqpai alu mümkındıgıne ie boldy. Būl olarǧa uaqytty ünemdeuge jol aşty. Al elektrondyq qyzmetterdı paidalanu bar bolǧany bırer minutty ǧana alady.

Osy rette Qorda elektrondyq qyzmetterdıŋ üles salmaǧyn 2021 jylǧa deiın 55 paiyzǧa jetkızu josparlanǧanyn aita ketken jön.
Eske sala ketsek, zeinetaqy Qory salymşylar men aluşylarǧa yŋǧaily da sapaly jäne zamanaui qyzmet körsetu maqsatynda 2017 jyldyŋ mausym aiynda Qordyŋ enpf.kz saity arqyly bırqatar maŋyzdy elektrondyq qyzmetterdı ıske qosqan edı. Sodan berı 2018 jyldyŋ 1 säuırıne qarai būl qyzmetterdı 20 myŋǧa juyq adam paidalanyp ülgerdı.
Atap aitqanda, 2298 salymşy Qor saitynyŋ «Jeke kabinet» bölımı arqyly (login jäne qūpiia söz (parol) nemese Halyqqa qyzmet körsetu ortalyǧy beretın elektrondyq sifrlyq qoltaŋbanyŋ (ESQ) kömegımen) onlain tärtıbınde jeke zeinetaqy şotyn aşsa, 987 aluşy (zeinet jasyna tolǧan azamattar men 1-şı jäne 2-şı top­tardaǧy mügedektıgı merzımsız bolyp belgılengen jandar) zeinetaqy tölemderın taǧaiyndau jönınde ötınış bergen. Al 11 754 adam jeke derektemelerıne özgerıster engızse, 4155 salymşy zeinetaqy şoty boiynşa aqparat alu täsılın internet bailanysy arqyly aluǧa auystyrǧan.
Zeinetaqy şotynyŋ jai-küiı turaly aqparatty jylyna bır ret konvert arqyly alatyndar sany bırtındep azaiyp keledı. Onyŋ ornyna elektrondyq täsılmen alatyndar sany artuda. Öitkenı öte yŋǧaily: şotqa zeinetaqy jarnalary men investisiialyq tabystyŋ qalai tüsıp jatqandyǧyn qala­ǧan uaqytta, kez kelgen jerde qada­ǧalap otyruǧa mümkındık beredı. Osylaişa 2018 jyldyŋ 1 qaŋtaryna qarai zeinetaqy şotynyŋ jai-küiın elektrondyq jolmen bılıp otyratyndar sany 4 million 700 adamǧa jettı. Olardyŋ ışınde şamamen 800 myŋ adamǧa şottan üzındı-köşırme elektrondyq poştasyna kelse, 3 mln 900 myŋ adam aqparatty qalta telefondaryna jüktegen «ENPF» ūialy qosymşasy arqyly alady.
Login men qūpiia sözdı qoldanar kezde loginnıŋ ornyna jeke kuälıktegı jeke säikestendıru nömırı (JSN) engızıledı. Al qūpiia sözdı özıŋız oilastyrasyz. Sonymen qatar, otandastarymyzǧa kez kelgen uaqytta Qor saityndaǧy «Jeke kabinet» arqyly zeinetaqy şotynyŋ jai-küiı turaly üzındı-köşırme men zeinetaqy şotynyŋ bar-joǧy turaly anyqtama alu mümkındıgı berılgen.
Aitpaqşy, derektemelerge jeke basty kuälandyratyn qūjattyŋ derekterı (türı, nömırı, künı men osy qūjatty bergen organ), poştalyq nemese elektrondyq mekenjai, telefon nömırlerı jatady.
Qor saity arqyly ötınış jolda­ǧandardyŋ qalta telefondaryna sol ötınıştıŋ oryndalu barysy jönınde SMS habarlama jıberılıp tūrady.
2017 jyldyŋ soŋynda Qordyŋ barlyq 18 filialynda özıne-özı qyzmet körsetu terminaldary ornatyldy. Endı salymşylar men aluşylar osy zamanaui tehnologiia arqyly zeinetaqy şotyn aşudan bastap, zeinetaqy tölemderın taǧaiyndauǧa deiıngı barlyq derlık elektrondyq qyzmetterdı paidalanyp, Qor mamanyna kezek kütıp otyrmaidy.
2018 jyldyŋ 28 aqpanynan bas­tap, Qor saitynda kezektı jaŋa elektrondyq servis ıske qosyldy. Ol: «JZŞ aşu jönındegı ötınıştı/zeinetaqymen qamsyzdandyru turaly şartty jaŋa redaksiiada alu» (nemese «Köşırme nūsqalar») dep atalady. Būl qyzmet qazırgı kezde Qor salymşylary arasynda erekşe tanymaldyqqa ie. Mysaly, 2016 jäne 2017 jyldary BJZQ bölımşelerınde keluşılerdıŋ sūrauy boiynşa olarǧa şarttardyŋ 2,9 millionnan astam köşırme nūsqasy berıldı.
2018 jyldyŋ alǧaşqy jartysynda Qor saitynda ESQ arqyly erıktı zeinetaqy jarnalary esebınen zeinetaqymen qamsyzdandyru turaly (öz paidasyna) şart jasasu qyzmetın ıske qosu közdelude.
Ärine, zeinetaqy Qory saitty jaŋartu jäne sifrlyq qyzmetterdı damytumen şektelıp qalmaidy. Bügınde ūialy bailanys operatorlarymen tyǧyz bailanys ornatylyp jatyr. Ondaǧy maqsat – abonentterge «ENPF» ūialy qosymşasyn trafiktı esepke almai paidalanuǧa mümkındık beru. Qazırdıŋ özınde Tele2 jäne Altel bırlesken kompaniiasynyŋ abonentterı özderınıŋ şottarynda teŋgerımnıŋ bar-joǧyna qaramastan Qordyŋ ūialy qosym­şasyn paidalana alady. BJZQ jaqyn bolaşaqta basqa da operatorlarmen osyndai kelısım jasasudy közdep otyr.
Sonymen qatar, zeinetaqy Qory tarapynan halyqtyŋ äleumettık tūrǧydan osal toptaryna, onyŋ ışınde äsırese, mümkındıgı şekteulı jandarǧa erekşe köŋıl bölınıp jatqandyǧyn aita ketken jön. Mysaly, 2017 jyly Qordyŋ «Mobildık agent» jobasy aiasynda 2016 jylǧa qaraǧanda 6,5 ese köp operasiia oryndaldy. Iаǧni, Qor mamandary ötken jyly tūtynuşylardyŋ üilerıne baryp qyzmet körsetu boiynşa 7,1 myŋ köşpelı şara ötkızıp, 189,5 myŋ operasiia jasady. Salystyryp qarasaq, 2016 jyly 1,1 myŋ ǧana köşpelı şara ötkızılıp, 29 myŋ operasiia jüzege asyrylǧan.
BJZQ salymşylary men aluşylaryn zeinetaqy şotyndaǧy jinaqtardyŋ qūnsyzdanyp ketuı mazalaityny sözsız. Būl tūrǧyda 2017 jyl tabysty jyl boldy. Salymşylar men aluşylardyŋ jeke zeinetaqy şottaryna eseptelgen taza investisiialyq tabys somasy 550,6 mlrd teŋgenı qūrap, Qordyŋ zeinetaqy aktivterınıŋ tabystylyǧy 7,92 paiyzǧa jettı. Al būl kezeŋde infliasiia deŋgeiınıŋ 7,1 paiyz bolǧanyn eske salamyz.
2018 jyldyŋ alǧaşqy üş aiy ışınde taza investisiialyq tabys 66 mlrd teŋgenı qūrady. Qordyŋ zeinetaqy aktivterınıŋ tabystylyǧy 2017 jyldyŋ nauryzy men 2018 jyldyŋ nauryzy aralyǧynda 7,99 paiyzǧa jettı.
Al būl kezeŋde infliasiia deŋgeiı 6,6 paiyzǧa jetıp, tabystylyq infliasiia deŋgeiınen joǧary boldy.
Sondai-aq, Qorda zeinetaqy aktivterınen alynatyn komissiia­lyq syiaqynyŋ şamasy 2018 jylǧa aiyna 33 paiyzǧa azaitylyp, 0,015 paiyzdy qūrady. Būǧan deiın ol 0,0225 paiyz bolatyn.
Biyl nauryz aiynda TÜV Thüringen e.V (TIýF Tiuringen, Germaniia) halyqaralyq kompaniiasynyŋ auditorlary Qordyŋ Sapa Menedjmentı Jüiesıne sertifikasiialyq audit jürgızdı. Maqsat – onyŋ halyqaralyq ISO 9001:2015 standartyna säikestıgın rastau. Sertifikasiialyq audit sättı ötıp, Qor TIýF Tiuringen kompaniiasynan halyqaralyq sertifikat aldy. Būl Qor tarapynan körsetıletın qyzmetterdıŋ joǧary sapaǧa ie ekendıgın bıldıredı.
2018 jylǧy 8 säuırıne qarai zeinetaqy jinaqtarynyŋ jalpy somasy 8 trillion teŋgege jetıp, byltyrǧy jyldyŋ säuır aiynan berı 1,1 trln teŋgege köbeidı. Iаǧni, bır jyl ışındegı ösım 16,6 paiyzdy qūrady.
Al şarttardyŋ barlyq türlerı boiynşa jeke zeinetaqy şottary­nyŋ sany 2018 jyldyŋ 1 säuırıne qarai 10 millionnan asty. Naqty: 10 114 904 şot. Būl ötken jyldyŋ säikes kezeŋımen salystyrǧanda 70 979 bırlıkke artyq. Iаǧni, ösım 0,7 paiyzdy qūrady.
Osylaişa Bıryŋǧai jinaqtau­şy zeinetaqy qory salymşynyŋ jinaqtauşy zeinetaqy jüiesıne qatynasqan bükıl kezeŋı – jeke zeinetaqy şotyn aşqannan bastap, zeinetaqy tölemderın alǧanǧa deiın oǧan onlain tärtıbınde qyzmet körsetuge daiyn ekenın däleldedı.

Japparbergen AIBOTA