Jastar saiasaty

Qazaqstannyŋ volonterlık qyzmetınde aşyqtyq bar ma?

Prezident Qasym-Jomart Toqaev Elbasynyŋ bastamasymen ötken Jastar jylynyŋ zaŋdy jalǧasy retınde 2020 jyldy Volonterler jyly dep jariialaǧan bolatyn. Sodan bergı bır jyl ışınde elımızdegı volonterlık ūiymdardyŋ sany 3 esege, al tūraqty volonterler 4 esege ösken, dep habarlaidy Elorda İnfo.

Aqparat jäne qoǧamdyq damu vise-ministrı Bolat Tılepovtıŋ aituynşa, atalǧan merzımde 600 volonterlık ūiymǧa 200 myŋ belsendı tartylypty. Denı äleumettık salaǧa şoǧyrlanǧan. Endı olar ainalysatyn ıs-şaralardyŋ aşyqtyǧyn qamtamasyz etu üşın qaiyrymdylyq ūiymdardyŋ reestrı jasalmaq.

Būl rette biyl Volonter jylynyŋ resmi jabylu räsımıne qatysqan Memleket basşysy Qasym-Jomart Toqaev Qaiyrymdylyq ūiymdarynyŋ reestrı barlyq aqparattyq jüiege engızılıp, qaiyrymdylyq ūiymdarynyŋ qyzmetımen, olardyŋ qarjylyq esebımen tanysqysy keletın kez kelgen azamatqa qoljetımdı boluy tiıstıgın eskerttı. Elektrondy qaiyrymdylyq salasynda azamattardy alaiaqtardan qorǧau jüiesın äzırleu de maŋyzdy ekenı basa aityldy.

«Sol üşın ministrlık Volonterlıktı damytudyŋ 2021-2023 jyldarǧa arnalǧan jol kartasyn äzırlegen bolatyn. Ol volonterlık bastamalardy odan ärı damytuǧa yqpal etıp, azamattardyŋ volonterlık qyzmetke qatysuyn jandandyruǧa, volonterlık mädeniettı odan ärı nyǧaitu üşın jaǧdai jasauǧa mümkındık beredı», – deidı Bolat Tılepov.

Odan bölek, «Yntymaq» qoǧamdastyqty damytu baǧdarlamasynyŋ jetekşısı Maia Şamenova erıktılık kezındegı faktcheking (faktılerdı tekseru) mäselesın köterdı. Onyŋ aituynşa, adamdarǧa aqparatty tekserudı, volonterlık kömektı qalai körsetu kerektıgın ǧana emes, ony qalai qabyldauǧa bolatynyn üiretıp, olardy volonterlık sauattylyq tūrǧysynan daiyndaǧan jön.

«Eger sızge erıktıler kelgen bolsa, onda mındettı türde olardyŋ barlyq qūjattaryn tekserıp şyǧu kerek. Anyqtamalar men dälelderdı talap etuge ūialmaǧan dūrys. Sadaqa jinap jürgen balalardy körgende, tūrǧyndar olardan qordyŋ barlyq qūjattaryn, kımge jäne ne üşın aqşa jinalyp jatqanyn sūrasa eken deimız. Mysaly, men volonter balalardan rūqsat qūjattaryn, kömekke mūqtaj balanyŋ ata-anasynyŋ bailanys derekterın, balanyŋ diagnozyn rastaityn qūjattar qaida ekendıgın ünemı sūraimyn», – deidı Maia Şamenova.

İä, būl rette qaiyrymdylyq qorlaryndaǧy qarjynyŋ aşyqtyǧy da özektı. Endı sol qamqorşy azamattar men olardan kömek aluşylardyŋ reestrı qaiyrymdylyq jobalar arqyly ötetın qarjynyŋ jūmsaluyna aqparattyq jäne qoǧamdyq baqylaudy qamtamasyz etuı şart. Äitpese el arasynda «ırı kompaniialar qaiyrymdylyqpen salyqtan jaltaru üşın ǧana ainalysady» degen de ūşqary pıkır bar. Alaida «Aiala» qaiyrymdylyq qorynyŋ prezidentı Aidan Süleimenova ony jaŋsaq tüsınık dep esepteidı.

«Kommersiialyq emes qaiyrymdylyq qory retınde bız korporativtık tabys salyǧyn tölemeimız. Öitkenı qaiyrymdylyqpen ainalysatyndar salyqtan bosatylǧan. «Qaiyrymdylyq salyqtan qūtylu üşın jasalady» degen tüsınık – basybütın qate!» – deidı ol.

Sondai-aq Nūr-Sūltan qalasy ūlttyq erıktıler jelısınıŋ ökılı Aisūlu Jamaşeva da özderınıŋ kompaniiasyna 58 äleumettık ūiym tırkelgenın, olardyŋ şynaiylyǧy tolyqtai tekseruden ötkenın alǧa tartyp otyr.

«Men olarǧa senımdımın. Öitkenı olardy bız – erıktıler jelısı tekseremız», – deidı Aisūlu Jamaşeva.

Demek, qazır Qazaqstannyŋ volonterlık qyzmetınde aşyqtyq bar deuge osy mysaldardyŋ özı-aq jetkılıktı siiaqty. Eŋ bastysy, Memleket basşysy volonterler aldynda söilegen sözınde qaiyrymdylyq pen volonterlıktıŋ pandemiia kezınde jalpyūlttyq sipat alǧanyn atap ötıp, onyŋ äleumettık normaǧa ainalǧanyn jäne halyqtyŋ dūrys qabyldaǧanyn jetkızdı.

Taǧyda

Taŋatar Töleuǧaliev

«Astana aqşamy» gazetınıŋ tılşısı

Pıkır üsteu

Back to top button