QAZPOŞTA JORALǦYSY
Būrnaǧy künı «Astana pochtamty» bas ǧimaratynda Baspasözge jazyluşylar künı ūiymdastyryldy. Bükıl älemdık poşta künı merekesı qarsaŋynda osyndai ıs-şara ötkızu jyl saiyn ötkızılıp keledı. Biyl da sol ürdıs jalǧasyn tauyp, bas qalada şyǧatyn türlı basylym qyzmetkerlerı qala tūrǧyndaryn özderınıŋ gazet-jurnaldaryna jazyluǧa ündep, sol jerde qolma-qol kelesı jylǧa gazetke jazylǧan oqyrmanǧa syi-siiapat tabystaldy.
Būdan keiın «Qazpoşta» AQ filialynyŋ direktory S.Äbılbaeva öz qyzmetkerlerın käsıbi merekelerımen qūttyqtap, toǧyz aida qol jetkızgen jetıstıkterıne toqtaldy. Jyl basynan berı tolymdy tabystarǧa kenelgen eŋbek üzdıkterı marapattaldy.
– Sonau 1878 jyly 9 qazanda Şveisariiada jiyrma ekı memlekettıŋ ökılderı «Bas poşta» odaǧyn qūryp, Bern şartyna qol qoiǧaly berı atauly künge ainalǧan būl künnıŋ orny erekşe. Osy künı bız jylda oqyrmandar men redaksiia arasynda kezdesu ötkızemız. Poşta bailanysy qazırgı uaqytta damudyŋ jaŋa kezeŋıne köterıldı. Köptegen tyŋ jobalar ıske qosyldy. Mıne, sol jönınde äŋgımeleimız. Dästürlı būqaralyq aqparat qūraldary qaşan da qoǧamnan öz ornyn alyp keledı. Bügıngı bızdıŋ negızgı maqsatymyz – redaksiialar ökılderımen kezdesıp, gazet-jurnaldardyŋ oqyrmandarǧa tiımdı jolmen jetuıne yqpal jasau. Osyǧan orai kezdesuler ūiymdastyryp, baspasözge jazylu joldarymen tanystyryp, kädesyilar ūsynamyz. Osylaişa är basylymnyŋ damuyna qal-qadırımızşe üles qosamyz. Jazyluşylardyŋ jas deŋgeiı är türlı. Jastar jaǧy elektrondy nūsqany köbırek qalasa, orta buyn ökılderı arasynda merzımdık basylymdarǧa jazyluşylar köp. Oqyrmandarǧa barlyq oŋtaily jaǧdailardy qarastyramyz, – dedı Säule Äuezbekqyzy.
Saǧi ORAL